1 Corintios 13

1Ac'o me lec xu' cu'un chic'opoj ta sc'op ep ta chop cristianoetic, xchi'uc ta sc'op j'almantaletic, pero me mu jna' xic'anvane, ja' jech chic'ot jech chac c'u cha'al campano ti jeche' no'ox sts'ints'une, o jech chac c'u cha'al sepsep taq'uin ti jeche' no'ox xchac'chune. 2Ac'o me xu' cu'un chcal c'usitic tsc'an li Diose, ac'o me jna' scotol li c'usitic snopoj Dios ti mu'yuc boch'o la sna'e, ac'o me xcotquin scotol, ac'o me bats'i yan sba xch'unojel co'nton sventa xu' cu'un ta jloq'ues batel li vitsetique, pero me mu jna' xic'anvane, mu'yuc jtu o. 3Ac'o me xu' cu'un ta jq'uelan scotol c'usitic oy cu'un, ac'o me xu' cu'un ta jq'uelan jbec'tal sventa chich' chiq'uel ta c'oc', pero me mu xic'anvane, mu'yuc c'usi jtu o. 4Li boch'o chc'anvane oy smuc'ul yo'nton, lec yo'nton, mu xti'etuc yo'nton. Mu xac' sba ta ich'el ta muc' ta sventa c'usi xu' yu'un; mu stoyilan sba. 5Muc sc'a'epal satinojuc xchi'iltac; muc ja'uc no'ox tsa' c'usi lec cha'ay stuc; mu xlic sc'ac'al yo'nton; mu xac' ta venta li c'usi chopole. 6Mu xcuxetuc xa yo'nton me oy c'usi chopol chc'ot ta pasele. Ja' xcuxet yo'nton me ja' chich' pasel li c'usitic tuq'ue. 7Li boch'o chc'anvane chch'ay no'ox ta yo'nton scotol. Ta xch'un scotol ti ja' melel c'usi ch-albate, tsmala no'ox yil scotol, tsts'ic yu'un scotol. 8Li c'anvaneje mu xlaj o sc'oplal. Yan li yalel c'usi chijyac'butic jna'tic Diose chlaj sc'oplal; li c'opojel ta yantic c'ope chlaj sc'oplal. Scotol li c'usitic jna'tique chlaj sc'oplal scotol. 9Yu'un mu to ts'acaluc cotquinojtic; mu ts'acaluc jna'tic yalel li c'usi tsc'an Diose. 10Pero c'alal me la sta yorail ti ts'acal ta jna'tic scotole, ja' chlaj sc'oplal o li c'usi jutuc no'ox jna'tique. 11C'alal ololun to'oxe, ja' jech lic'opoj jech chac c'u cha'al olol; ja' jech la jnop jech chac c'u cha'al tsnop olol; ja' jech la jchapan jech chac c'u cha'al chchapan olol. Pero c'alal jta jva'leje, la jcomtsan ti c'u to'ox x'elan jtalel c'alal ololun to'oxe. 12Pero ac'o me muc'utic xa, jutuc no'ox li c'usi jna'tique. Jech chac c'u cha'al ti mu xvinaj lec jsatic c'alal mu'yuc lec li nene. Pero me lijc'ot ta vinajele, chc'ot jna'tic scotol. Li' ta orae jutuc no'ox xu' chcotquintic, pero tsta yorail chcotquintic lec scotol jech chac c'u cha'al lec xijyotquinutic li Diose. 13Ja' yu'un oy oxib li c'usi mu xlaj sc'oplale: Ja' li xch'unojel co'ntontique, xchi'uc li smalael c'usi jpatoj co'ntontic yu'une, xchi'uc li c'anvaneje. Pero ti bu xjelov tsots sc'oplal yu'un li oxib li'i, ja' li c'anvaneje.


Copyright
Learn More

will be added

X\