1 Corintios 12

1Quermanotac, ta jc'an chana'beic lec smelol c'u x'elan li jmotontic chijyac'butic Ch'ul Espiritue. 2Xana'ic c'u xa'elanic ti c'alal mu'yuc to'ox ach'unojique, lo'labiloxuc to'ox yu'un li adiosic avich'ojic ta muc' ti mu xc'opojique; laj to'ox sventainoxuc. 3Ja' yu'un chcac' ana'ic, li boch'o ventainbil yu'un Ch'ul Espiritue mu xu' chchopolc'opojic ta sventa li Jesuse. Jech noxtoc mu'yuc boch'o xu' chal: “Ja' Cajval li Jesuse”, xi, ti me muc ta sventauc Ch'ul Espíritu chc'opoje. 4Ep ta chop li matanale, pero jun no'ox li Ch'ul Espíritu chijyac'butique. 5Ep ta chop li abtele, pero jun no'ox li Yajvale. 6Ep ta chop li c'usi tsotsic ta pasele, pero jun no'ox li Dios ti chac' ta pasel scotole. 7Li c'usi xu' cu'untic spasel ac'bilutic jujunutic ta sventa li Ch'ul Espiritue, ja' sventa chtun cu'untic scotol. 8Oy boch'otic ch-ac'bat sna'ic yu'un Ch'ul Espíritu chalic c'usi tsc'an Dios sventa chijbijubutic. Oy yan ch-ac'bat yalic li c'usi yotquinojic ti yilojic xa leque, pero jun no'ox li Ch'ul Espíritu chaq'ue. 9Oy boch'otic ch-ac'bat ep xch'unojel yo'ntonic; oy boch'o ch-ac'bat svu'elic sventa tscoltaic jchameletic, pero jun no'ox li Ch'ul Espíritu chaq'ue. 10Oy boch'o ch-ac'bat spasic sq'uelubiltac stsatsal Dios. Oy boch'o ch-ac'bat yalic c'usi tsc'an Dios. Oy boch'o ch-ac'bat sna'ic me ja' yabtel Ch'ul Espíritu li c'usi chc'ot ta pasele, o me mu ja'uc. Oy boch'o ch-ac'bat sbijilic sventa xu' yu'un chc'opojic ta c'opetic ti mu'yuc boch'o jech xc'opoje. Oy boch'o ch-ac'bat sjelubtasic li yantic c'ope. 11Scotol le'e jun no'ox li boch'o tspase. Jun no'ox li Ch'ul Espíritu chac' ta na'ele, ja' ti c'u x'elan lec chil stuque. 12Jech chac c'u cha'al li jbec'taltique jun no'ox, pero ep ta chop stsacoj sba. Ac'o me ep ta chop c'u x'elan ch-abtejic, pero jun no'ox oyic. Ja' no'ox jechutic ec ta stojol li Cristoe. 13Yu'un c'alal laj quich'tic vo' jcotoltic ta sventa li Ch'ul Espíritu ti jun no'ox oye, jech jun no'ox jbec'taltic lic'ot jcotoltic, ac'o me judío, me yanlum, me ochem ta mozoil, me mu ochemuc ta mozoil. Jech noxtoc jun no'ox li Ch'ul Espíritu laj quich'tic jcotoltique. 14Ja' jech chac c'u cha'al li jbec'taltique mu jchopuc no'ox oy. Ep ta chop stsacoj sba. 15Ti jechuc chal li cacantique: “Vu'une muc c'obilucun, jech mu'yuc tsacalun ta venta yu'un jbec'tal”, ti xiuque, ¿me mu'yuc xa tsacal ta venta chcom o ta sbec'tal ti jech chale? 16Ti jechuc chal li jchiquintique: “Vu'une muc satilucun, jech mu'yuc tsacalun ta venta yu'un jbec'tal”, ti xiuque, ¿me mu'yuc xa tsacal ta venta chcom o ta sbec'tal ti jech chale? 17Ti scotoluc puru satil oy ta jbec'taltique, ¿bu chca'itic c'op ti jechuque? Ti scotoluc puru chiquinil oy ta jbec'taltique, ¿bu chca'ibetic yic' c'usitic oy yic' ti jechuque? 18Ja' yu'un li Diose yantic o yabtel laj yac'be jujuchop jbec'taltic jech chac c'u cha'al la sc'an yo'nton stuque. 19Ti jchopuc no'ox yabtel ta scotol li jbec'taltique, mu'yuc chapal jbec'taltic ti jechuque. 20Pero mu jechuc. Ep ta chop stsacoj sba, ac'o me jun no'ox li jbec'taltique. 21Li jsatique mu xu' jech chalbe li jc'obtique: “Vo'ote mu'yuc atu cu'un”, mu xu' xut. Li joltique mu xu' jech chalbe li cacantique: “Vo'ote mu'yuc atu cu'un”, mu xu' xut. 22Yu'un ti bu toj c'un jchopuc li jbec'taltique, pero ja' tsots stu. 23Ti bu q'uexlal sba chca'itic li jbec'taltique, lec ta jpix ta jmactic. Ti bu mu ac'baj ta q'uelel chca'itic li jbec'taltique, lec ono'ox ta jq'uel ta jtuc'ulantic. 24Yan ti bu lec chquiltique, mu'yuc c'usi ta jpasbetic. Pero li Diose lec la xchapan, yu'un ja' lec ta jq'uel ta jtuc'ulantic ti bu mu'yuc tsots sc'oplal chquiltique. 25Yu'un jech mu me svoq'uilan sba li jbec'taltique, jech jmoj tsots sc'oplal cha'ay sba ta scotolic. 26Ja' yu'un me oy svocol jchopuc li jbec'taltique, oy svocol cha'ay ta scotolic. Me lec c'uxubinbil jchopuc li jbec'taltique, lec c'uxubinbil cha'ay ta scotolic. 27Li vo'oxuque sbec'taloxuc li Cristoe. Li jujunoxuque te nabaloxuc ta sbec'tal. 28Ja' yu'un ta jujutsob jch'unolajeletique li Diose la sva'an boch'o chtun ta stojolic. Li sbae ja' li yajtacbolaltac Jesuse. Li xchibale ja' li boch'otic chalic c'usi ch-ac'bat sna'ic yu'un Diose. Li yoxibale ja' li jchanubtasvanejetique. Ja'o te xtal li boch'otic tspasbeic sq'uelubil stsatsal Diose, xchi'uc li boch'otic tscoltaic jchameletique, xchi'uc li boch'otic chcoltavanic ta c'usiuc no'ox tsc'an pasele, xchi'uc li boch'otic chventainvanique, xchi'uc li boch'otic ja' smotonic chc'opojic ta yantic c'ope. 29¿Me scotol ja' yajtacbolaltac Jesús? ¿Me scotol j'alc'opetic? ¿Me scotol jchanubtasvanejetic? ¿Me scotol tspasbeic sq'uelubil stsatsal Dios? 30¿Me scotol tscoltaic jchameletic? ¿Me scotol chc'opojic ta yantic c'op? ¿Me scotol jelubtasej c'opetic? 31Ja' yu'un chacalboxuc, ja' c'anic li amotonic ti tsots sc'oplale. Vu'un chacac'boxuc avilic jun be ti toj leque.


Copyright
Learn More

will be added

X\