1 Corintios 11

1Ja' chanic c'usi ta jpas jech chac c'u cha'al ja' ta jchan c'usi la spas li Cristoe. 2Colavalic ta sventa ti mu xach'ay ta avo'ntonic li c'usitic laj calboxuque, ti chapasilanic o ti c'u x'elan la jchanubtasoxuque. 3Pero ta jc'an chana'ic noxtoc, scotol li viniquetique ja' sjolic li Cristoe. Li antsetique ja' sjolic li viniquetique. Li Cristoe ja' sjol li Diose. 4Ja' yu'un me macal sjol c'alal tsc'opanic Dios li viniquetique, xchi'uc c'alal chalic c'usi ch-ac'bat sna'ic yu'un Diose, ja' chac' ta q'uexlal li sjolique, ja' li Cristoe. 5Pero me mu'yuc macal sjol tsc'opanic Dios, xchi'uc chalic c'usi ch-ac'bat sna'ic yu'un Dios li antsetique, ja' chac' ta q'uexlal ec li sjolique. Yu'un co'ol chc'otic jech chac c'u cha'al li boch'o juxbil sbejlijil sjole. 6Me mu sc'an smac sjol li antse, ja' lec ac'o yich' loc'bel li sjole. Pero me chq'uexov cha'ay ti loc'bil, o me juxbil sbejlijil sjole, ja' lec ac'o smac. 7Yan li viniquetique mu xu' tsmac sjolic, yu'un ja' sloc'obal Dios, yu'un ja' chac' vinajuc slequilal yutsilal li Diose. Yan li antse ja' chac' vinajuc slequilal yutsilal li vinique. 8Yu'un li vinique ma'uc iloc' ta sventa ants; ja' ants ti iloc' ta sventa vinique. 9Jech noxtoc, li vinique ma'uc laj yich' pasel ta sventa ants. Ja' ants ti laj yich' pasel ta sventa vinique. 10Ja' yu'un li antsetique tsc'an chac'be senyail ta sjolic ti ventainbil yu'un smalalique, yu'un q'uelbilic yu'un li yaj'almantaltac Diose. 11Pero ta stojol Cajvaltique co'ol oy stu xchibal. Yu'un me mu'yuc antsetique, mu'yuc li viniquetique. Me mu'yuc viniquetique, mu'yuc li antsetique. 12Jech chac c'u cha'al ta sventa vinic i'ayin li antse; ja' no'ox jech ta sventa ants ch-ayin ec li viniquetique. Pero scotol liquem tal ta stojol Dios. 13Nopo lec ava'ay atuquic. ¿Me smelol ti mu smac sjol c'alal tsc'opanic Dios li antsetique? 14Jech noxtoc, me ja' chac' natubuc sjol li viniquetique, ¿me mu q'uexlaluc sba ta q'uelel? ¿Me mu ja'uc te chvinaj o ti mu jechuc jtaleltique? 15Pero me ja' chac' natubuc sjol li antsetique, ja' snupic c'otem, yu'un ja' xpix sjol ac'bilic ti nat stsotsil sjolique. 16Me oy boch'o chlic ta bic'talvulvunel xchi'uc ti laj calboxuc ac'o smac sjol antsetique, ac'o me sna' ti ja' jech jtaleltique, xchi'uc ja' jech stalelic ec li yantic steclumal Diose. 17Li c'usi chacalboxuc tal li'i: “Colavalic ti lec c'usi chapasique”, mu xu' xacutoxuc. Yu'un li c'usi chapasic c'alal chatsob abaique, ma'uc sventa chalecubic; ja' sventa chasoques abaic. 18Li c'usi ba'yuc chacalboxuque, ja' li c'usi ca'yoj chapasic ti c'alal jmoj chatsob abaic vo'oxuc ti ach'unojique. Ca'yoj ti chavoq'uilan abaique. Ta jch'un ti oy bu jech chapasic ta melele. 19Ta ono'ox xc'ot ta pasel chavoc' abaic me mu co'oluc c'usi chanopique, yu'un jech ac'o vinajuc li boch'o lec xch'unoj avu'unique. 20Yu'un c'alal chatsob abaic sventa chapasic sna'ubil Cajvaltique, ma'uc sventa Cajvaltic chapasic. 21Yu'un ta jujunoxuc chc'ot ave' ta ora atuquic li ave'elique. Jech oy boch'o chvi'naj; oy boch'o te chyacub o. 22¿C'u yu'un ti jech chapasique? ¿Me mu'yuc anaic xu' te xave'ic, xavuch'ic vo'? ¿C'u yu'un ti solel mu'yuc stu chavilic li jch'unolajeletique? ¿Me yu'un ja' chac'an chavaq'uic ta q'uexlal li boch'o mu'yuc c'usi oy yu'unique? ¿C'usi chac'an chacalboxuc, “Colavalic ti jech chapasique”, me xacutoxuc? Ta sventa ti jech chapasique, mu'yuc chajtojboxuc ta vocol. 23Yu'un ti c'u x'elan la jchanubtasoxuque, ja' jech la xchanubtasun ec li Cajvaltique. C'alal yorail xa ch-ac'at ta c'abal ta ac'ubaltic li Cajvaltic Jesuse, la stsac jun pan; 24la stojbe ta vocol Dios, lic svoc' li pane, jech laj yal: “Li'i ja' jbec'tal ti ac'bil ta aventaique. Jech me xapasilanic o sventa chana'ilanicun”, xi. 25C'alal ilaj yo'ntonic ta ve'ele, la stsac noxtoc jun vaso. Ja' co'ol la spas jech chac c'u cha'al la spas ta sventa li pane. Jech laj yal: “Li sbel vaso li'i ja' sventa li c'usi ach' chapanbil ti ta sventa jch'ich'al chc'ot ta pasele. C'alal chapasilanic jujun veltae, ja' me jech xapasilanic sventa chana'ilanicun o”, xi. 26Ja' yu'un c'alal chave'ic jujun velta li pane, c'alal chavuch'ic jujun velta li ya'lel ts'usube, ja' chavaq'uic ta ilel ti vo'oxuc ta acojic icham li Cajvaltique. Ja' to chlaj sc'oplal ta pasel c'alal me ital li Cajvaltique. 27Ja' yu'un li boch'o vovil tsacbil no'ox tspas li pane xchi'uc li vasoe, oy smul chc'ot ta sventa sbec'tal xchi'uc ta sventa xch'ich'al li Cajvaltique. 28Ja' yu'un li jujunoxuque a'yo abaic lec c'u xa'elanic ti c'alal chave'ic li pane, xchi'uc c'alal chavuch'ic li ya'lel ts'usube. 29Yu'un li boch'o vovil ve'bil, vovil uch'bil no'ox tspase, ti mu snop lec ti ja' sventa sbec'tal Cajvaltique, ja' no'ox sventa tsa' svocol stuc. 30Ja' yu'un oy ep jchameletic; oy ep boch'otic mu'yuc stsatsalic, xchi'uc ep xa jch'unolajeletic ichamic te yo' bu oyoxuque. 31Yu'un me ta jnoptic lec ba'yuc c'u xij'elan jujunutique, mu xijyac'butic jvocoltic li Diose. 32Pero me oy chijyac'butic jvocoltic li Diose, ja' sventa ac'o bijubcutic, yu'un jech mu co'oluc chbat jtoj jmultic xchi'uc li yan cristianoetic li' ta banamil ti mu xch'unic Diose. 33Ja' yu'un quermanotac, c'alal chatsob abaic sventa chave'ique, malao me aba acotolic. 34Me oy boch'o chvi'naje, ac'o ve'uc ta sna, yu'un jech mu ja'uc no'ox chasa' avocolic ti c'alal chatsob abaique. Li c'usitic yan muc xacalboxuc tale, te chc'ot calboxuc ti c'alal chtal jq'ueloxuque.


Copyrighted Material
Learn More

will be added

X\