Romanos 6

1¿C'usi ta xcaltic un cha'e? ¿Mi ta xcac'betic yipal ta sa'el ti jmultique yo' x'ech' to ta jtatic c'uxubinel yu'un ti Diose? 2¡Bu xata ti ja' jeche! yu'un ti vo'otique chamemotic ta stojol ti mulile. Jech o xal un, ma'uc xa smelol ti jech staoj yav ti ta jsa'ilantic ti jmultique. 3¿Mi mu xana'ic ti c'alal laj quich'tic vo' ta sventa ti Jesucristoe, jmoj lijchamotic xchi'uc? 4Yu'un c'alal laj quich'tic ti vo'e, jmoj lijchamotic, jmoj lijmucatotic xchi'uc ti Cristoe yo' jech ta jtamtic batel ti ach' cuxlejale jech c'u cha'al ti Cristo ti c'alal cha'cuxesat ta sventa smuc'ul stsatsal ti Diose. 5Yu'un mi junotic xchi'uc ti Cristo c'alal chame, ja' jech ta xquich'tic cha'cuxesel jech c'u cha'al laj yich' cha'cuxesel ti Cristoe. 6Ti c'u j'elantic ta ba'yele, jna'tic lec ti jipil ta curus cham xchi'uc ti Cristoe yo' jech ta xlaj yip ti c'u j'elantic ti naca jsa'mulilotique, yo' mu staojuc yav ta xispasotic ta mantal ta xismosovinotic ti mulile. 7Yu'un ti buch'u cham xae, col xa loq'uel ta stojol ti mulile. 8Ti jech jmoj lijchamotic xchi'uc ti Cristoe, jpatoj co'ntontic ti jmoj ta xijcuxiotic xchi'uque. 9Jna'tic lec ti cha'cuxi ti Cristoe. Mu'yuc xa sc'oplal ta xcham no'ox xtoc. Laj to sc'oplal ma' ti yip ti lajel tubel ta stojole. 10C'alal cham ti Cristoe, jun no'ox velta cham ta scoj ti mulile. Ti jech cha'cuxie, cuxul ta stojol ti Diose. 11Jechucoxuc ec, nopic ti lajem tubem yip ti mulile, ti ja'uc cuxuloxuc ta stojol Dios ta sventa ti junoxuc xa xchi'uc ti Cristo Jesús ti Cajvaltic cu'untique. 12Jech o xal un, mu xavac' abaic ta tsalel yu'un ti mulile yo' jech mu xapasic ti c'usi sc'an ti abec'talic ti sna' xchame. 13Mu xavaq'uic ta tunesel abec'talic yu'un ti mulile, ta spasel ti c'usi chopole. Ja' lec, ac'o abaic ta tunel yu'un ti Diose, yu'un cha'cuxiemoxuc xa ti chamemoxuc to oxe. Ja' yu'un un, ac'o abaic ta tunel yu'un ti Diose yo' jech ta xapasic ti c'usi lec ta xile. 14Laj to sc'oplal un ti oy yip ti mulil ta atojolique, yu'un ma'uc xa oyoxuc ta yoc ta sc'ob ti oy c'usi tsots albil sc'oplale. Yu'un oyoxuc xa ta slequilal yutsilal yo'nton ti Diose. 15Ti jech mu'yuc xa oyotic ta yoc ta sc'ob ti oy c'usi tsots sc'oplal albile, ti jech oyotic ta stojol ti yutsilal slequilal yo'nton ti Diose, xcaltic unbi, cac'betic yipal ta spasel ti mulile. ¡Bu xata! 16Ti vo'oxuque xana'ic lec ti mi oy bu ta xavac' abaic ta pasel ta mantal ta stojol jun ajvalil ta xch'unbel ti smantale, c'otemot ta mosovil yu'un ti ajvalile. Ja' jech xtoc un, mi ta xavac' abaic ta pasel ta mantal yu'un ti mulil ti lajel tubel sq'ueloj batele, lac'ot ta smosov. Ja' jech xtoc un, mi ta xach'un ta spasel ti c'usi ta sc'an ti Diose, ta xata alequilal. 17Ti ta vo'ne ti vo'oxuque, avac'oj abaic ta mosovinel to ox yu'un ti mulile. Ja'uc tana le'e, coliyal ti Dios ti ta sjunul avo'ntonic laj ach'unic ti c'u s'elan laj avich'ic chanubtasele. 18Ti j'ech'el lacolic loq'uel ta mosovinel yu'un ti mulile, la'ochic ta spasel ti leque. 19Ta jc'oponoxuc ti c'u s'elan lec ta a'yibel ti smelole, yu'un mu to xava'ibeic lec ti smelole. Ti vo'oxuc ta vo'nee, laj avac' abaic ta tunel ta spasel ti mulil ti mu stac' albel sc'oplale, ti chopol ta j'ech'ele. Avi tana li'e, ac'o abaic ta tunel ta stojol Dios ta spasel ti c'usi leque yo' jech staoj yav lequil jtuneloxuc ta stojol ti Diose. 20C'alal mosovinbiloxuc to ox yu'un ti mulile, mu'yuc laj avac' abaic ta tunel ta spasel ti c'usi leque. 21¿C'usi lec laj ataic yu'un ti jech laj apasic taj une? Avi tana un, ja' no'ox q'uexlal sba ta xava'iic. Ja' no'ox laj ataic ti ta xachamic yu'une. 22Ti jech lacolic loq'uel ta mosovinel yu'un ti mulil avi tana le'e, la'ochic ta yajtunel ti Diose. Ti jech taje, xloc' venta, yu'un ta xavac' abaic ta tunel yu'un ti Diose. Ts'acal to un, ta xataic acuxlejalic sbatel osil. 23Ti stojol ti mulile, naca lajel tubel sq'ueloj batel. Ja'uc ti matanal ti ta xac' ti Diose, ja' jcuxlejaltic sbatel osil ta sventa ti jech junotic xchi'uc ti Cajvaltic Cristo Jesuse.


Copyright
Learn More

will be added

X\