Romanos 1

1Vu'un Pabloun, yajtunelun ti Jesucristoe. Laj staun ta iq'uel yo' ta xi'och ta yajtacbolal ta yalel batel ti colebal lequil ach' c'op yu'un ti Diose, 2ti vo'ne ono'ox yaloj ti Dios ta sventa ti ch'ul c'op ti laj sts'ibaic comel ti yaj'alc'optaque. 3Taje, ja' sc'oplal ti Xnich'one, ti ja' Cajvaltic Jesucristoe, ti voc' talele, ti laj yich' sbec'tal ti lic ta stojol snitilultac ti ajvalil Davide. 4Vinajesbat sc'oplal yu'un ti Ch'ul Espíritu ti oy smuc'ul stsatsale, ti yich'ojbe stalel ti Diose, ti ja' Xnich'on Dios ta sventa ti cha'cuxie. 5Ta sventa ti Jesucristoe, lic'ot ta yajtunel yo' ta jujun muc'tiquil lum oyuc buch'u c'otuc ta yo'ntonic ta xch'unel, xchi'uc ta snijan xchiman sbaic ta stojol. 6Ti ta scotolic taje, oyoxuc ta venta ec ti laj staoxuc ta iq'uel ti Jesucristoe. 7Jech o xal ta jts'ibaboxuc talel jvun ti li' nacaloxuc ta Romae, ti c'uxubinbiloxuc yu'un ti Diose, ti t'ujbiloxuc yo' xac'otic ta yu'untaque. Ich'beic slequilal yutsilal yo'nton ti Jtotic Diose xchi'uc ti Cajvaltic Jesucristoe, lamajemuc avo'ntonic. 8Ta sventa ti Jesucristoe, ba'yel ta xcal, coliyalbun ti Dios cu'une, yu'un buyuc no'ox vinajem ac'oplalic ti c'otem ta avo'ntonic ta xch'unele. 9Ta stojol ti Diose, sjunul co'nton cac'oj jba ta tunel yu'un ta yalel ti lequil ach' c'op yu'un ti Xnich'one. Ja' yiloj ti mu xajch'ayoxuc ta co'nton ta c'opojel ti'inel ta aventaic. 10C'alal tey ono'ox ta xic'opoj xiti'ine, ta jc'anbe ono'ox ti Diose ti loc'uc ayanuc ta yo'nton stuc yo' ta xtal jq'ueloxuque. 11Yu'un oy ta co'nton ta jq'ueloxuc ca'i yo' jech ta jcoltaoxuc, yo' ayanuc to ech'el yip avo'ntonic, 12ti xcaltique, yo' co'ol ta jtsatsubtasbe jba co'ntontic ta jujun tale, ti c'u s'elan c'otem ta avo'ntonic ta xch'unele jech c'u cha'al jch'unoj eque. 13Ti jech junotic xae, sc'an ta xana'ic ti oy ono'ox ta co'nton jc'an ta xtal jq'ueloxuc ca'i ta yalel ti sc'op Dios ta atojolique, yo' ta xa'epajic jech c'u cha'al epajic xa ti jyanlumetique. Avi tana li' une, li' to macalun ta be ta j'ech'ele, mu'yuc c'usi xcut. 14Yu'un jbainoj ta xca'i ta yalel ti lequil ach' c'op ta stojol ti jnaclejetic ta banomile, mi chanubtasbilic, mi mu'yuc chanubtasbilic, mi oy sbijilic, mi mu'yuc sbijilic, ac'o ya'iic scotolic. 15Jech o xal juteb ta co'nton ta yalbeloxuc ava'iic ti lequil ach' c'op ti vo'oxuc nacaloxuc ta Romae. 16Mu xiq'uexav yu'un ta yalel ma' ti lequil ach' c'ope, yu'un ja' smuc'ul stsatsal Dios sventa yo' ta sta scolelic ti buch'u ta xc'ot ta yo'nton ta xch'unele, ti ba'yel oy sc'oplal ti israeletique, ti oy sc'oplal ec ti jyanlumetique. 17Yu'un ti lequil ach' c'ope, xi s'elan ta xac' ta na'el ti c'u s'elan ta tael ti lec xij'ile yu'un ti Diose: Ti buch'u staoj yav c'otem ta yo'nton ta xch'unel ti tubbil ti smule, lec x'ile. Yu'un ti ts'ibabil ta ch'ul c'ope xi ta xale: “Ti buch'u tuc' yo'nton ta xquile, ja' no'ox ti buch'u c'otem ta yo'nton ta xch'unele, jech ta xcuxi o.” 18Ti Dios ti oy ta vinajele ta xac' ta ilel sc'ac'al yo'nton ta yac'bel svocol ta tsitsel ti chopol jnaclejetic ta banomil ti mu'yuc stuq'uil smelolique, ti me'inem ta yo'ntonic ti mulile, ti ta xchopolal sjol yo'ntonic ta smaquic ya'iic ta be ti c'usi ja' melele. 19Yilojic ta satic c'u s'elan ta ojtiquinel ti Diose. Ta sventa ti oy c'usi spasojan ti Diose, sna'ic lec, yu'un laj svinajes stuc. 20Mi nijil chimil ta snopilane, ta xvinaj ti oy jun Dios ta sventa ti yabtel spasojane. C'alal lic meltsajuc talel ti banomile, xvinaj lec ta q'uelel oy ti Diose, ti sbatel osil mu'yuc stsutseb ti oy smuc'ul stsatsale. Laj sc'oplal ma' ti stac' spac sc'oplal ti buch'u mu'yuc xch'ulel xa'i sbae. 21Ac'o mi sna'ic ti oy Diose, mu sbisic ta Dios, mu xich'ic ta muc', mi ja'uc ta xalbeic colyalbun. C'ajomal no'ox batem ta yo'ntonic ta snopel ti c'usi mu'yuc smelole, ti yac'ojbeic yipal ta spasel ti c'usi xtal ta sjolique. Laj ta alel ma' ti oy lec snopbenal yu'unic une. 22Ac'o mi ta xalic ti bijique, pimuneb xa'i sbaic ta j'ech'el. 23Laj sc'atbunic slequilal yutsilal ti Dios ti mu jutebuc oy sc'oplal ta xchame, yu'un laj sbisic ta Dios sloc'obbail ti viniquetic ti sna' xchame, xchi'uc sloc'obbail ti mutetique, xchi'uc sloc'obbail ti chonetique, xchi'uc sloc'obbail chonetic ti yich'oj chanib yacane. 24Jech o xal ac'bat comel ta sbaic yu'un Dios ta spasel ti sbolil yo'ntonique, ti q'uexlal sba c'usitic lic spasbe sbaic ta jujun tale. 25Laj ta alel yu'unic ti oy bu sc'oplal ja' melel yu'un ti Diose, yu'un lec laj ya'iic ta xch'unel ti naca lo'laele. Lic snijan xchiman sbaic ta yich'el ta muc' ta xrioxinel ti c'usitic pasbil yu'un ti Diose. Ma'uc laj yich'ic ta muc' ti Diose ti c'alal ja' oy sc'oplal ich'biluc ta muc' sbatel osile. Jechuc. 26Jech o xal un, ti Diose laj yac'be comel ta sbaic ti c'usitic q'uexlal sba ta pasele. Ti antsetic eque, ma'uc ta xchi'in sbaic ta xchi'inel ti bu albil sc'oplal stac' xchi'ine, lic xchi'in sba stuquic. 27Ja' jech ti viniquetic eque, ma'uc ta xchi'in sbaic xchi'uc ti ants ti albil sc'oplal stac' xchi'ine, yac'ojbeic yipal ta spasbel sbaic ta jujun tal ti c'u s'elan xlaet ti yo'ntonic ta xa'iique. Q'uexlal sba ta j'ech'el ti c'usitic ta spasique, yu'un stuc viniquetic ta xchi'in sbaic, ti j'ech'el ta staic tsitsel ti jech ta xilbajin ti sbec'talic ta scoj ti c'usitic mu'yuc smelol ta spasique. 28Ti jech mu sc'an sbic'tajes sbaique, ti mu'yuc c'usi bal o ta xa'iic ti Diose, ac'batic comel ta sbaic ta spasel ti c'usi mu stac' pasele. 29Me'inem ta yo'ntonic ta j'ech'el ti c'usitic toj ech'em chopole, bolinebic, ta xu'nin ya'iic ti ma'uc yu'unique, me'muliletic, j'it'ix o'ntonetic, jmilvanejetic, jsoquesej c'opetic, jlo'lavanejetic, jti' o'ntonetic, 30xbet'bun no'ox yeic ta slo'iltael ti xchi'ilique, jcontrainej Dios, mu'yuc xch'ulel xa'i sbaic, stuc xa no'ox jech ta xa'i sbaic, jtoyobbaetic, xtal no'ox ta sjolic ta spasel ti c'usi chopole, mu xch'unbeic smantal stot sme'ic, 31mu xa'iic albel, mu xc'ot xc'opojic, mu'yuc yutsil slequil yo'ntonic, mu sna' xch'ayic ti mulil ta yo'ntonique, mu'yuc xc'uxul yo'ntonic. 32Ti buch'utic jech ta spasic taje, sna'ic lec ta mantal ti oy c'usi tsots sc'oplal yaloj ti Diose ti ja' xtun o ti ac'o chamicuque. Ac'o mi jech un, yac'ojbe yipal ta spasel ti c'usi chopole, xchi'uc xmuyubajic xa yu'un ti jechuc spasic ti yane.


Copyright
Learn More

will be added

X\