Apocalipsis 2

1Xi xats'ibabe batel ta stojol ti buch'u sbainoj ti jch'unolajeletic ti oy ta jteclum Efesoe: “Xi ta xal ti Buch'u stsacoj ta sbats'i c'ob ti vucbej c'anale, ti xva'et ta xanav ta o'lol ti bu oy ti vucub yavil cantila meltsanbil ta oroe: 2Jna' lec scotol ti c'usi ta xapase. Quiloj lec ti avac'ojbe yipal ti abtele, ti oy smuc'ul avo'ntone, ti mu jutebuc lec ta xava'i ti buch'utic chopolique. Jna' lec ti laj aq'uelbe yo'ntonic ti buch'utic sbisoj sbaic ta cajcholc'optac ti c'alal ma'uque, jech laj avil ti ja' jutc'opetique. 3Jna' lec ti ts'iquem cuchem avu'un ti avocole, ti yepal ta xa'abtej ta jventae, ti mu ja'uc juteb lalubtsaje. 4Oy jtos xi s'elan ti mu lecuc ta xquile: tub xa ti syail xc'uxul avo'nton ta jtojole, mu xa jechuc jech c'u cha'al ta sliquebale. 5Jech o xal un, vuleso ta avo'nton bu layanij. Sutan talel ta stojol ti Diose. Cha'tamo liquel jech c'u cha'al ta sliquebale. Yan mi mu jechuc ta xapase, ta xital no'ox ta atojol, ta jloq'uesbot ech'el ti yav cantila ti oy ta yavil mi mu xasut talel ta stojol ti Diose. 6Manchuc mi jech un, oy to jtos ta atojol ti lec ta xquile, ja' ti mu lecuc ta xava'i ti c'u s'elan ta xchanubtasvanic ti nicolaítaetique, ti c'alal jech chopol ta xquil eque. 7Ti buch'u oy xchiquine, ac'o ya'i lec c'u s'elan ta x'albat yu'un Ch'ul Espíritu ti jch'unolajeletique. Ti buch'u ta stsal yu'un scotole, ta xcac'be slo' ti sat te' ti sventa cuxlejal ti teq'uel ta yavil ts'unubal yu'un ti Diose.” 8Xi xats'ibabe batel ta stojol ti buch'u sbainoj ti jch'unolajeletic oyic ta Esmirnae: “Xi ta xal ti Buch'u sbainoj ti sliqueb spajebe, ti Buch'u cham cha'cuxie: 9Jna' lec scotol ti avocole, ti ame'unal amu'natile, ti c'alal jc'ulejot ono'oxe. Jna' lec ti ta xavich' chopol c'optael yu'un ti buch'utic sbisoj sbaic ta israeletique, ti c'alal ja' yu'untac ti pucuje. 10Mu xaxi' yu'un ti avocol ta xc'ot ta atojole, yu'un oy jlom avu'unic ta xatiq'ueic ta chuquel yu'un ti pucuje, yo' jech ta xich' q'uelel ti avo'ntonique. Yu'un ta xavich' avocolic lajuneb c'ac'al. Staojuc yav avo'ntonic xacham xalajic, ta xcac'boxuc ti acuxlejalic ti ja' amotonique. 11Ti buch'u oy xchiquine, ac'o ya'i lec c'usi ta x'albatic yu'un Ch'ul Espíritu ti jch'unolajeletique. Ti buch'u ta stsal yu'un scotole, mu xa c'usi ta spasbat yu'un ti xcha'cojal chamebal lajebale.” 12Xi xats'ibabe batel ta stojol ti buch'u sbainoj ti jch'unolajeletic oyic ta jteclum Pérgamoe: “Xi ta xal ti Buch'u yich'oj ti jich'il espada ti yich'oj cha'jot yee: 13Jna' lec scotol ti tey nacalot ti bu ta spas mantal ti pucuje. Manchuc mi jech un, staoj yav jun avo'nton ta jtojol, yu'un mi ja'uc lachibaj ta jtojol c'alal laj yich' milel ti lequil caj'abtel Antipas ti bu snacanoj sba ti pucuje. 14Oy jaytos ti xi s'elan mu lecuc ta xquil ti oy ta atojole: yu'un oy jlom avu'unic mu sc'an ta xictaic comel c'u s'elan chanubtasvan ti Balaam ti c'alal laj sbijubtas ti Balaque, ti laj sta smul yu'un ti israeletic c'alal laj slajesic smoton ti c'usi meltsanbil ta c'abale, xchi'uc ti laj sbolomalin sbaic yu'une. 15Ja' jech xtoc oy jlom avu'unic mu sc'an xictaic comel c'u s'elan chanubtasvan ti nicolaítaetique, ti mu lecuc ta xquile. 16Jech o xal un, sutan talel ta stojol ti Diose. Mi mu jechuc ta xapase, ta xital no'ox ta atojol, ta jtsaquic ta contra scotolic ta sventa ti espada ti oy ta que jti'e. 17Ti buch'u oy xchiquine, ac'o ya'i lec ti va'i s'elan ta x'albat yu'un Ch'ul Espíritu ti jch'unolajeletique. Ti buch'u ta stsal yu'un scotole, ta xcac'be sve' ti maná nac'bil leque, xchi'uc ta xcac'be jbej saquil ton ti bu tsacbil jun ach' biil ti mu'yuc buch'u xojtiquine, ti ja' no'ox ta xojtiquin ti buch'u ta xich'e.” 18Xi xats'ibabe batel ta stojol ti buch'u sbainoj ti jch'unolajeletic oy ta Tiatirae: “Xi ta xal ti Xnich'on Diose, ti Buch'u co'ol s'elan leb c'oc' ti sbec' sate, ti xnobobet yoc jech c'u cha'al ti tsatsal c'anal taq'uin ti ch'ulbil loq'uel yic'obal ta c'oq'ue: 19Jna' lec scotol ti c'usi ta xapase: ti oy xc'uxul syail avo'ntone, ti lec c'otem ta avo'nton ta xch'unele, ti avac'oj aba ta tunele, ti mu xavicta abae, ti x'ech' to avac'ojbe yipale, ti ja' mu sta ta sliquebale. 20Ja'uc le'e, xi s'elan ta jta jtos ta atojol ti mu lecuc ta xquile: tey no'ox ta xavac' chanubtasvanuc ti ants Jezabele, ti ta xal ti ta xc'opoj ta sventa ti Diose. Ti c'u s'elan ta xchanubtasvane, c'ajomal no'ox ta slo'la ti cajtuneltaque, yo' ta xlic mulivajuc xchi'uc, yo' ta stun slajesic smoton ti c'usi meltsanbil ta c'abale. 21Jmalaoj ora ti sutuc talel ta stojol ti Diose. Mu jechuc oy ta yo'nton, yu'un mu ono'ox xicta comel ti ta sbolomalin sbae. 22Jech o xal ta xcac' yaluc ta chamel ti puch'ul ta xcom ta steme. Ti buch'utic mu xictaic ti mulivajel xchi'uque, ta xcac'be ya'iic tsots svocolic ti mi mu xictaic ti c'u s'elan chanubtasatic yu'un ti antse. 23Yalabtac xtoc ti antse, ta jtubbe sc'oplal. Ta xlic sna'ic scotol ti jch'unolajeletic unbi, ti xcojtiquin c'u s'elan ta snop ti o'ntonale, xchi'uc acotolic ta xcac' atojic ti c'u s'elan laj apasic ti jujunoxuque. 24Ti c'u avepalic nacaloxuc ta Tiatirae, ti mu'yuc xch'unojic c'u s'elan ta xchanubtasvan ti antse, mi ja'uc ta xbat avo'ntonic yu'un ti cajal sc'oplal ta xava'i ti bijubtasel yu'un sc'op ti pucuje, mu'yuc xa c'usi yan mantal ta xcalboxuc ava'iic. 25Ja'uc le'e, staojuc yav avo'ntonic yu'un ti c'u yepal laj xa ataique, ja' to mi litale. 26Ti buch'u ta stsal yu'un scotole, ti staoj yav yo'nton xcham xlaj ta spasolanel ti c'usi lec ta xquile, ta x'och ta pas mantal cu'un ta sventainel ti muc'tiquil lumetique, 27jech c'u cha'al laj yac'bun cabtel ti Jtote. Jech tsots ta xich' yabtelic, jbel xc'opojic ta spasel ta mantal ti jnaclejetic ta banomil ti co'ol s'elan tsatsal taq'uin ti cajal ta xc'ot ta sba ti bine, ti toj lilijel ta xc'ote. 28Ja' jech xtoc ta xcac'be yich'ic ti muc' ta c'anal ti ta xvinaj jujun sob ic'lumane. 29Ti buch'u oy xchiquine, ac'o ya'i lec ti va'i s'elan ta xal ti Ch'ul Espíritu ta stojol ti jch'unolajeletique.”


Copyright
Learn More

will be added

X\