Apocalipsis 15

1Laj quil yan muc' ta senyail ta vinajel ti labal sba ta j'ech'ele. Oy vucub anjeletic oy ta sc'ob ti slajeb vuctos cuxul j'ilbajinvanej vocole, ti ja' c'ot ta pasel ti bu xa c'alal mu ts'icbaj laj ya'i sc'ac'al yo'nton ti Dios ti ta scunan yalel tale. 2Laj quil xtoc ti co'ol s'elan nen capal ta c'oq'ue. Laj quil ti oy buch'utic ac'bil yarpaic yu'un ti Diose, ti va'ajtic ta sts'el ti nab taje, ja' ti buch'utic mu'yuc lajic ta lo'lael yu'un ti jti'oval chone, ti mu'yuc laj yich'beic ta muc' ti sloc'obbaile, ti mu'yuc laj yich'beic snumeroal sbi ti chone. 3Tey ta sq'uejintabeic sq'uejimol ti Moisés ti yajtunel ti Diose, xchi'uc sq'uejimol ti jcot ta Uni Chij ti xi ta xalique: “Cajval, Ch'ul Dios ti scotol xu' avu'une, jun yutsil, mu no'ox albajuc smuc'tiquil ti c'usi ta xapase. Ch'ul Ajvalilot yu'un ti muc'tiquil lume, ti bu atamoj batele, jbel sc'oplal lec tuc' scotol. 4¿Buch'u la ti mu ta xi'taote, Cajval, Ch'ul Dios? ¿Buch'u la ti mu ta xalbot ti alequilale? Yu'un vo'ot no'ox Ch'ul Diosot. Scotol ti muc'tiquil lum oy ta sjoylej banomile, ta xtal snijan xchiman sbaic ta atojol, yu'un laj xa yilic ta sba ta satic ti oy slequil yutsil ti c'usi ta xapase.” 5Laj ti va'i s'elan taje, laj jtoy jsat, laj quil jam ti ch'ulna ti oy ta vinajele, sc'oplal ti axibalna bu q'uejbil ti pech pech ton sventa ti tratee. 6Ti ta ch'ulnae, loq'uic batel ti yan vucub ánjel ti oy ta sventaic ti vuctos cuxul j'ilbajinvanej vocole. Xlaplun no'ox yutsil saquil lino ti sc'u' slapojic batele, ti c'otem ta sti' yo'ntonic ti oro chuquil xchuquinojic batele. 7Ti vucub anjele, ac'batic jujun sbisic naca meltsanbil ta oro yu'un jun ta xchanibal ti c'usi cuxule, ti bu colbil xa yalel sc'ac'al yo'nton ti Dios ti Buch'u stalel cuxul sbatel osile. 8Ti ta ch'ulnae, noj ta ch'ail ti lic talel ta sventa yutsilal smuc'ul stsatsal ti Diose. Mu'yuc buch'u ta x'och batel, mi junuc mi mu'yuc to ech' ti vuctos cuxul j'ilbajinvanej vocol ti yich'ojic batel ti vucub anjele.


Copyright
Learn More

will be added

X\