Apocalipsis 13

1Laj quil loc' talel ta nab jcot jti'oval chon ti oy vucub sjole, ti yich'oj lajuneb xulube, ti oy sronail ta jujun ti xulube. Yajcontra Dios le'e, xi yich'oj jun biil ta jujun sjoltac. 2Ti jti'oval chon loc' talel ta nab laj quile, co'ol s'elan yilel jchop o ta bolom, co'ol s'elan oso ti yoc sc'obe. co'ol s'elan león ti yee. Smuc'ul stsatsal ti muc' ta tsajal jti'oval chone, xchi'uc ti bu ta spas mantale, ti tsots yabtel yich'oje, laj yac'be jelavel ta stojol ti xi'bal sba jti'oval chon ti loc' talel ta nabe. 3Ti jun ta scotol ti sjole, oy syayijemal ti jutuc xa mu cham o xchi'uc yilele; ja'uc le'e, colem xa ti syayijemale. Scotol ti jnaclejetic ta sjoylej banomile, elom laj ya'iic, bat sts'acliic ti jti'oval chon loc' talel ta nabe. 4Ti jnaclejetic ta banomile lic yich'ic ta muc' ti muc' ta tsajal jti'oval chone, ta sventa ti ac'bat smuc'ul stsatsal yu'un ti jti'oval chon loc' talel ta nabe, xchi'uc laj yich'ic ta muc' ti jti'oval chon loc' talel ta nab ti xi ta xalbeique: “¿Buch'u xa la yan xu' yu'un jech c'u cha'al ti xi'bal sba jti'oval chon li'e, xchi'uc buch'u la xu' ta stsal yu'un?” 5Ac'bat yich' stsatsal ti jamal ye ta yalel ti c'usiuc no'ox chopol ta xloc' ta alel yu'une, ti c'usiuc no'ox chopol xalilan ta stojol ti Diose, xchi'uc ti oy sc'oplal ta xich' tsots yabtel o'lol xchanibal jabile (3.5). 6Jech lic chopol c'opojuc ta stojol ti Diose, sbisel ta cotol chaval ti sbie, ta stojol ti xch'ulnae, ta stojol ti buch'utic oyic ta vinajele. 7Ac'bat yich' stsatsal xtoc ta stsaquel ta leto ti buch'u yu'untac ti Diose, ja' to ti c'uxi tsalbil ta xc'ot yu'une. Ac'bat yich' stsatsal xtoc ta spasel ta mantal ti jnaclejetic oyic ta sjoylej banomile, ti jujuchop sc'opique, ti jujun tos lume, ti jujun muc'tiquil lumetique. 8Ti jti'oval chon loc' ta nab taje, ta x'ich'atic ta muc' yu'un ti jnaclejetic ta banomile, ja' ti buch'utic mu'yuc tsacal sbiic ta jpoc vun sventa cuxlejal c'alal mu'yuc to ox meltsajem ti banomile, xchi'uc ta jpoc vun ti oy ta yoc ta sc'ob ti jcot ta Uni Chij ti laj yich' svocol ta milele. 9Ti oy buch'u oy xchiquine, ac'o ya'i lec smelol ti xi s'elan li'e: 10“Ti buch'utic oy sc'oplal chuquel ta xbate, chuquel ono'ox ta xbat. Ti buch'utic oy sc'oplal espada ya'i xcham xlaje, espada ono'ox ta xve' yu'un.” Ti buch'utic ja' yu'untac ti Diose, sc'anuc xa no'ox yip yo'ntonic, junuc yo'ntonic xchi'uquic ti c'u s'elan c'otem ta ch'unel yu'unique. 11Ts'acal to un, laj quil yan jti'oval chon ti loc' muyel tal ta banomile. Oy chib xulub co'ol s'elan xulub uni tot chij. Ti sc'opojele co'ol s'elan sc'opojel ti muc' ta tsajal jti'oval chone. 12Jech yich'oj tsots yabtel ec jech c'u cha'al ti ba'yel jti'oval chon ti loc' talel ta nabe, ti ta sba ta sat stuc ti c'otuc ta pasel ti scotoluc ti jnaclejetic ta banomile, ti yich'icuc ta muc' ti ba'yel jti'oval chon ti colem xa ti syayijemal sjol ti jutuc xa mu cham o xchi'uque. 13Xu' yu'un ec ta yaq'uel iluc c'usitic muc'tic ta xc'ot ta pasel ti ch'ayal ta xc'ot o'ntonal yu'une. Xu' xtoc ta yaq'uel iluc ta sba ta sat ti jnaclejetique, ti syales talel c'oc' ta vinajel ta xvul ta banomile. 14Ta sventa ti jech ac'bat spas ti c'usitic ch'ayal ta xc'ot o'ntonal yu'un ta stojol ti jti'oval chon loc' talel ta nabe, laj slo'la ti jnaclejetic ta banomil ti ac'o spasbeic sloc'obbail ti jti'oval chon ti cuxul xa ti jutuc xa mu cham ta scoj ti yayij ta espada ti sjole. 15Ti xcha'cotal jti'oval chone, ac'bat stsatsal ta yac'bel xcuxlej sloc'obbail ti ba'yel jti'oval chone, yo' xu' ta xc'opoj ti loc'obbaile, yo' jech ta xac' ta milel scotolic ti buch'utic mu snijan xchiman sbaic ta stojole. 16Ja' jech xtoc laj yal mantal, c'alaluc ta biq'uit ta muc', scotol ti jnaclejetic ta banomile, ac'o yich' smarcail ta sbats'i c'obic, mi ta sti'baic, mi jc'ulejetic, mi me'onetic, mi mosoviletic, mi ma'uc mosoviletic. 17Mu'yuc buch'u xu' ta xmanolaj, ta xchonilaj mi mu'yuc yich'ojbe ti smarcaile, mi mu'yuc yich'ojbe sbi ti jti'oval chone, mi mu'yuc yich'ojbe snumeroal ti jti'oval chone. 18Taje, ja' no'ox ti buch'u oy sbijile xu' ta xchap bu c'alal ta xac' snumeroal ti jti'oval chone, yu'un ja' snumeroal jun vinic. Ti númeroe yich'oj vaquib ciento xchi'uc vaquib xchanvinic (666).


Copyright
Learn More

will be added

X\