San Mateo 9

1Laj taj une, ti Jesuse och batel ta barco, jelav batel ta jot sti'il nab. C'ot ta slumal stuc. 2Ja' o poybil talel jun moch'. Ti Jesuse laj yil ti c'otem lec ta yo'ntonic c'u s'elan xch'unojique, xi laj yalbe ti jchamele: —Tsotsan, tamo aba, nich'on, ch'aybil xa amul. 3Oy jlom jchanubtasvanejetic yu'un ti mantale ti xi laj snopique: “Ti vi s'elan laj yal le'e, ta soquesbe yo'nton ti Diose.” 4Ti Jesuse sna'oj xa ono'ox ti c'u s'elan ta snopique. Xi laj sjac'bee: —¿C'u cha'al toj chopol ti snopobil avu'unique? 5¿Mi ja' oy smelol ti xi ta alele: ‘ch'aybil amul’, mi ja' ti xi ta alele: ‘lican, va'lan, batan’? 6Lec oy cha'e, ti vu'un co'ol j'elantique ta xcac' avilic ti quich'oj tsots cabtel li' ta banomil ta xch'ayel ti mulile. Va'i un, xi laj yalbe ti jmoch'e: —Tamo aba, va'lan, ich'o batel ti avuni puch'lebe, batan ta ana. 7Ti jmoch'e laj stam sba, va'i, bat ta sna. 8Ti jech laj yilic ti jnaclejetique, xi'ic, xchi'uc xlequil-c'opojic xa ta stojol ti Dios ta sventa ti oy buch'u ac'bil smuc'ul stsatsalique. 9Ti Jesuse loc' batel ti bu taje. Laj yil jun vinic, ti Mateo sbie, chotol bu ta stojic ti patan ta sventa ti Romae. Xi albat yu'un ti Jesuse: —Batic. Va'i un, ti Mateoe lic batel ta xchi'inel. 10C'ot ta pasel ti yacal ta xve' ti Jesús ta jbej nae. Yepal no'ox ti jc'an-patanetic sventa Romae xchi'uc yan ti mu'yuc lec sc'oplalique, c'ot chotliicuc ta xocon mexa bu oy ti Jesús xchi'uc ti yajchanc'optaque. 11Ti jech taj une, ti fariseoetique xi laj sjac'beic ti jchanc'opetique: —¿C'uxi ta alel ti avajchanubtasvanejique ti jmoj ta xve'ic xchi'uc ti jc'an-patanetique xchi'uc ti jsa'muliletique? 12Ti Jesuse laj ya'i ti xi albatic yu'une: —Mu xtun yu'unic jpoxtavanej ti buch'u mu'yuc xchamelique. Ja' no'ox ta xtun yu'unic jpoxtavanej ti buch'u oy xchamelique. 13Batan, ba nopbeic talel smelol ti oy bu xi ta xal ti ch'ul c'ope: ‘Ti ta jc'ane, c'uxubinvananic, ma'uc ti ta xamilbeicun ti matanaletique.’ Ti vu'une ma'uc tal jsa' ti buch'u oy slequilique, ja' tal jsa' ti jsa'muliletique yo' ta sutes ti yo'ntonique. 14Ti yajchanc'optac Juan j'ac'-ich'-vo'e nopajic batel ta stojol Jesús ti xi laj sjac'beique: —Ti vu'uncutic xchi'uc ti fariseoetique, mu albajuc ta xquicta ti cotcutique. ¿C'u cha'al mu xicta yotic ti avajchanc'optaque? 15Ti Jesuse xi laj staq'ue: —¿Mi yu'un la oyic ta at o'nton xana' ti buch'u ic'bilic ta uch'vanej ta sventa ti nupunel c'alal li' to oy ta stojolic ti jlecvaneje? Ta sta sc'ac'alil un, ta x'iq'ue batel ti jlecvaneje. Va'i unbi ta xicta yotic. 16“Mu'yuc buch'u ta spac' ta ach' manta ti poco' c'u'ile. Mi jech ta spase, ta smuts ti ach' mantae. Ta xjatolaj ti poco' c'u'ile. Ta x'epaj ti sjatemale. 17Ja' jech xtoc mu'yuc buch'u ta stic' ochel ta spoco'-avil ti ach' vinoe. Mi jech taje, ta xt'om ti spoco'-avile, ch'ay o ti yavile xchi'uc ti vinoe. Jech o xal un, ch'ol xi ochel ti vino ta ach' yavile yo' mu xch'ay ti xchibale.” 18C'alal yacal to ta xc'opoj ti Jesús ta stojolique, ja' o vul ta loq'uel jun banquilal yu'un ti israeletique, ti xi laj yal ti laj squejan sba ta stojole: —Naca to cham ti cantsil nich'one. Mi ta xtal acajan ac'ob ta sbae, ta xlic xcuxiuc un. 19Ti Jesuse va'i liquel, chi'inbil batel yu'un ti yajchanc'optaque, xchi'inojic batel ti vinique. 20Va'i un, oy jun ants ti oy xa xlajchebal (12) jabil xmalmun ti xchamele, nopaj talel ta spat Jesús ti laj spicbe ti sti'il sc'u'e, 21yu'un xi laj snope: “Tauc jtabe ta picbel sti'il sc'u'e, toj colel ti jchamele.” 22Joybij ti Jesuse, laj yil ti antse. Xi laj yalbee: —Tsotsan, tamo aba, tseb, ta sventa ti tac'al c'ot avu'un ti c'u s'elan ach'unoje, lacol yu'un ti achamele. Toj colel c'ot un. 23C'alal c'ot ti Jesús ta sna ti banquilal yu'un ti israeletique, laj yil ti chapalic xa ti jtij-vobetic yo' chba smuquic ti animae, ti smil xa sbaic ta oq'uel ti jmuclumaletique. 24Xi laj yal ti Jesuse: —Loc'anic batel li'e. Ti tsebe mu'yuc chamem, ja' no'ox vayem. Tse'ej laj ya'iic scotolic ti jmuclumaletique. 25Laj stac loq'uel ti jmuclumaletique. Laj snitbe liquel sc'ob ti tsebe, tots liquel. 26Ti bu taje, puc sc'oplal ta jujujot ti va'i s'elan c'ot ta pasele. 27C'alal jech iloc' batel ti Jesuse, xi x'avetic xa batel cha'vo' ma'sat: —Xnich'on David, c'uxubinuncutic. 28C'alal och batel ta na ti Jesuse, nopajic talel ti cha'vo' ma'sate, xi laj sjac'bee: —¿Mi ach'unojic xana' ti xu' ta jam ti asatique? Xi tac'avique: —Jech, Cajval. 29Va'i un, ti Jesuse laj spicbe ti satique, ti xi laj yalbee: —C'otuc ta pasel jech c'u cha'al ach'unojique. 30Jam ti satique, xi c'ubanbatic yu'un ti Jesuse: —Mu me buch'u xa'i avu'unic. 31Naca to no'ox loq'uic batel, c'ot yalic ta sjunul sbanomilic ti c'usi laj spas ti Jesuse. 32C'alal loq'uic xa batel ti ma'satetique, oy buch'u yic'ojic talel ta stojol Jesús jun uma' ti ch'amunbil yu'un ti pucuje. 33C'alal ti Jesuse laj stac loq'uel ti pucuje, ti uma'e lic c'opojuc. Scotol ch'ayal c'ot yo'ntonic ti xi ta xalique: —Mu'yuc bu xquiltic o li' ta Israel jech c'u cha'al le'e. 34Ja'uc ti fariseoetique xi ta xalique: —Ti vinic le'e ta sloq'ues pucuj ta sventa stsatsal ti banquilal yu'unique. 35Ti Jesuse ech' chanubtasvanuc ta jujun ch'ul naetic ti oy ta jujun jteclume xchi'uc ti oy ta jujun bic'tal lume. Ta xalbe sc'oplal ti lequil ventainel yu'un ti Diose. Ta scoles ti c'usiuc no'ox chamelal ti ip ta xa'iique. 36Ti jech laj yil ti jnaclejetic ti Jesuse, c'uxubaj yo'nton yu'un ti abol sbaique, ti vul o'nton oyique, ti co'ol s'elan chij ti ch'abal buch'u xq'uelune. 37Xi laj yalbe ti yajchanc'optaque: —Yepal ta jmec ti ts'unobal sc'an tsobele. ¡C'u stu un! jutuc ti j'abteletique. 38Jech o xal, c'oponbeic yajval ti ts'unobale, ac'o stac talel j'abteletic yo' ta xich' tsobel ti ts'unobale.


Copyright
Learn More

will be added

X\