San Mateo 6

1Xi laj yal ti Jesuse: —Scotol ti c'usi ta xapasic ta sventa ti Diose, bijanic, ma'ucuc me x'och ta avo'ntonic ti lec xa'ile yu'un ti yane. Ti jech ta xapasique, mu xata amotonic yu'un ti Jtotic ti oy ta vinajele. 2“C'alal ta xacolta ti buch'u abol sbaique, mu xavinajes ta stojol yan jech c'u cha'al ta spasic ta ch'ulna, mi ta bebetic ti jpac'taejbailetique, yo' jech ta xlequil-c'oplaltaatic yu'un ti yane. Ta xcalboxuc ava'iic, ja' no'ox jech yepal laj sta ti smotonique. 3C'alal ta xacolta ti buch'u abol sbaique, avo'ntonuc no'ox sna'. 4Yu'un ti Jtotic Diose yiloj ti jech ta xacolta ta mucule, ta xayac'boxuc ti amotonique. 5“C'alal ta xac'opoj xati'ine, mu jechuc xapas jech c'u cha'al ti buch'u ta spac'ta sbaique, ti lec xa'iic va'ajtic ta xc'opoj xti'inic ta ch'ul naetic, ta jujun xuc'avtac ti bu xvolvun ti jxanbile yo' jech ta x'ilatic yu'un ti yane. Ta melel xcalboxuc ava'iic, ja' no'ox jech yepal laj sta ti smotonique. 6C'alal ta xac'opoj xati'ine, ochan batel ta yut ana, maco ti sti' anae. Ti jech ach'ul tuc xchi'uc ti Diose, c'opojan ti'inan ta stojol ti Jtotic Diose. Ti Jtotic Diose yiloj ti jech ta xapase, ta xac'bot amoton. 7“C'alal ta xac'opoj xati'ine, ma'ucuc ti xlic xcaj no'ox ti c'usi ta xavalilan jech c'u cha'al ta spas ti buch'u yan yajvalique. Yu'un ta snopic ti ja' to jech ta x'a'yibat sc'opic yu'un ti Diose. 8Mu jechuc xapasic jech c'u cha'al ti stuquique. Yu'un ti Jtotic Diose sna'oj xa ti c'usi ta xtun avu'unic c'alal mu to ta xlic ac'anbeique. 9Xi sc'an xavalic c'alal ta xac'opoj xati'inique: ‘Dios Totil, ti oyot ta vinajele, ich'biluc ta muc' ach'ul bi cu'uncutic. 10La' ventainuncutic. C'otuc ta pasel ti c'usi ta sc'an avo'nton li' ta banomile jech c'u cha'al ta xc'ot ta pasel ta vinajele. 11Ac'buncutic jve'elcutic ti ta xtun cu'uncutic ti c'ac'al tanae. 12Ch'aybuncutic ti c'usi mu lecuc ta jpascutique jech c'u cha'al ta jch'aybecutic ti buch'u ta sa' smul ta jtojolcutique. 13Mu xavac'uncutic ta lajeltsael, pojuncutic ta yoc ta sc'ob ti pucuje. Yu'un jelavem amuc'ul, oy alequilal, ta xapas mantal sbatel osil. Jechuc.’ 14“Mi ta xach'aybe smul ti buch'u laj xa sa' smul ta atojole, ti Jtotic Dios ti oy ta vinajele ta xch'aybot amul ec. 15Mi mu xach'aybe smul ti yane, jech ti Jtotic Diose mu xch'ayboxuc ti amulique. 16“C'alal ta xacomtsan avotique, mu xavaq'uic ta ilel ti oyoxuc xa ta at o'nton jech c'u cha'al ta spasic ti buch'u ta spac'ta sbaic yo' ta x'ilatic yu'un yan ti yictaoj yotique. Melel ta xcalboxuc ava'iic, ja' no'ox jech yepal laj sta ti smotonique. 17C'alal ta xacomtsan avotique, poquic asatic, tusetanic, ch'aletanic. 18Jech xapas yo' jech mu sna'ic ti yan ti avictaoj avotique, c'ajomaluc no'ox sna' stuc ti Jtotic ti tey xchi'inoxuque, ta xac'boxuc ti amotonique. 19“Mu xatsob ac'ulejal li' ta banomile, ti bu sna' xlilij ta xjoch'e, ti sna' xch'aye, ti xu' ta xelc'an ti j'eleq'ue. 20Ja' lec, tsobo ac'ulejalic ta vinajel ti bu mu xlilij ta xjoch'e, ti bu mu xch'aye, ti bu mu xelc'an ti j'eleq'ue. 21Yu'un ti bu oy ac'ulejale, tey batem avo'nton. 22“Ti asatique co'ol s'elan junuc lampara c'otem yu'un ti abec'tal atacopalique. Mi lec ti sbec' asatique, xojobin no'ox sjunul ti abec'talique. 23Mi mu'yuc lec ti sbec' asatique, oy ta ic'al osil sjunul ti abec'talique. Mi ic' ta j'ech'el ti xojobal ti oy ta atojole, mu'yuc xa yan ic'al osil jech c'u cha'al ti ic'al osil taje. 24“Mu'yuc buch'u xu' ta xac' sba ta tunel ta cha'vo' ajvalil. Mu lecuc ta xil ti june, xc'uxubinoj ti june. Jun yo'nton ta stojolal ti june, sjipoj stenoj ti june. Mu stac' ta xatunic yu'un ti Dios ti mi ja' batem avo'ntonic yu'un ti taq'uine. 25“Jech o xal un, xi ta xcalboxuc ava'iique: Mu xavul avo'ntonic c'u s'elan ta xata ave'el avuch'omic yo' ta xacuxiic, mi ja'uc ti ac'u'ic ta xalapique. ¿Mi mu ja'uc to x'ech' sc'oplal ti acuxlejalique, ti ja' mu sta sc'oplal ti ave'elique? ¿Mi mu ja'uc to x'ech' sc'oplal ti abec'talique, ti ja' mu sta sc'oplal ti ac'u'ique? 26Q'uel avil ti mutetic ti xvilajet ta vinajele, xi s'elan oye: Mu sna' sts'unobajic, mu xc'ajavic, mu spoco'-tsob sve'elic. Manchuc mi jech un, malq'uinbilic yu'un ti Jtotic ti oy ta vinajele. X'ech' to ac'oplal ma' ti vo'oxuc une, ja' mu sta sc'oplal ti mutetique. 27¿Mi yu'un ta to xnatij c'uc sjaliluc acuxlejalic ti jech xvulvun avo'ntonique? 28“¿C'u cha'al xvulvun avo'ntonic yu'un ti ac'u'ique? Tuc'ulano avil lec c'u s'elan ta xch'i ti nichimetic ti oy ta yaxaltique. Mu'yuc ta x'abtejic, mu'yuc ta xnaujic. 29Manchuc mi jech un, ta xcalboxuc ava'iic, ja' jelavem yutsil ti nichime, ja' mu sta yutsil ti c'u s'elan laj sta ti ajvalil Salomone xchi'uc ti c'u s'elan laj slap ti sc'u'e. 30Mi jech ta spas ti Dios ta stojol ti nichim ti teq'uel ta yaxaltic tanae, ti oc'om ta xchiq'ue ta c'oq'ue, x'ech' to ta sc'u'iltasoxuc ti Diose, ja' no'ox to vo'oxuc ti mu xach'unic leque. 31Ma'uc xvulvun avo'nton ti xachi ta xajac'olanbe abaique: ‘¿C'usi ta jtun ta jlajestic? ¿Bu ta jtatic ti jc'u'tique?’ 32Scotol ti va'i s'elan taje, ja' jech ta svulilan yo'ntonic ti buch'u yan yajvalique. Ja'uc ti vo'oxuque oy ta atojolic ti Jtotic ti oy ta toyol cajale, sna' scotol ti c'usi ta xtun avu'unique. 33Ja' yu'un un, ac'o ta avo'ntonic ti ventainel yu'un ti Diose, pasic ti c'usi tsots sc'oplal ta xil ti Diose. Ta xa'ac'batic scotol unbi ti c'usi ta xtun avu'unique. 34Mu xavulilan avo'ntonic yu'un ti c'ac'al ta xtal ta yoc'omale. Yu'un ti jujun c'ac'ale oy c'usi ta xc'ot ta pasel ti xavul xa avo'nton yu'une.”


Copyright
Learn More

will be added

X\