San Mateo 5

1C'alal laj yil ti mu albajuc yepalique, ti Jesuse muy chotluc ta jol vits. Ti yajchanc'optaque nopajic talel ta stojol. 2Xi lic chanubtasvanuc ti Jesuse: 3—Yan yutsil ti buch'utic ta xa'iic ti ch'abal yutsil slequil yo'ntonique, ta staic ventainel yu'un ti Dios ti oy ta vinajele. 4“Yan yutsil ti buch'utic oyic ta at o'ntone, ja' ta xpatbat yo'nton yu'un ti Diose. 5“Yan yutsil ti buch'utic ta sbic'tajes sbaique, ta x'ac'bat sventainic ti banomil ti yaloj ono'ox ti Dios ta xaq'ue. 6“Yan yutsil ti buch'utic co'ol s'elan vi'nal taqui ti'il ta xa'i ta spasel ti c'usi ta sc'an ti Diose, ja' ta xcoltaatic yu'un. 7“Yan yutsil ti buch'utic oy xc'uxul yo'ntonic ta stojol ti yane, ta xc'uxubinatic yu'un ti Diose. 8“Yan yutsil ti buch'utic oy slequil stuq'uil yo'ntonique, ti stuquique ta xilbeic sat ti Diose. 9“Yan yutsil ti buch'utic yac'ojbeic yipal ta slamajesel ti c'ope, ta sbis ta xnich'nab stuc ti Diose. 10“Ti buch'utic ta xich'ic ilbajinel ta spasel ti c'usi ta sc'an ti Diose, yan yutsil, c'otem ta stojolic ti ventainel yu'un ti Diose. 11“Yan avutsilic ti ilbajinbiloxuque, ti chopol coptabiloxuque, ti c'usiuc no'ox ta sa' amulic ta jventae. 12Muyubajanic, junuc avo'ntonic, yu'un ta xavich'ic ti muc' ta matanal oy ta vinajele. Yu'un jech ono'ox laj yich'ic ilbajinel ti j'alc'opetic c'alal mu'yucoxuc to oxe. 13“Ta stojolal ti yane, co'ol s'elan ats'am c'otemoxuc. Mi ta xch'ay yutsil xchi'il ti ats'ame, ¿mi xu' to ta xtun xtoc un? J'ech'el mu'yuc xa c'usi xtun o, jip xi loq'uel, tec' xi yu'un ti jbeinele. 14“Ta stojolal ti yane, co'ol s'elan luz c'otemoxuc. Ti jun jteclum ti oy ta jol vitse, mu'yuc ta nac'al. 15Mu'yuc ta xich' tsanel jun lampara ti chba yich' aq'uel ta yolon caxae. Ta xich' aq'uel ta toyol yo' ta xilic xojobal ti c'u yepal oyic ta nae. 16Ac'beic yipal, vinajuc xojobinel aluzic ta stojol ti yane. C'alal ta xilic ti lec c'usitic ta xapasique, ta slequil-c'optaic ti Dios avu'unic ti oy ta vinajele. 17“Ti litale, mu xanopic tal jch'ayesbe sc'oplal smantal ti Moisese, mi ja'uc ti c'u s'elan chanubtasvanic ti j'alc'opetique. Ti litale, ja' tal jvinajesbe ti bats'i smelole. 18Melel ta xcalboxuc ava'iic, ti c'u sjalil oy ti vinajel banomile, mu'yuc ta xich' ch'ayesel jbeluc ti mantale ja' to mi c'ot ta pasel scotol ti c'usi ta ono'ox xc'ot ta pasele. 19Jech o xal buch'uuc no'ox ti mu xac' ta venta ti oy c'usi jbel albil ta sventa ti mantale, ac'o mi mu tsotsuc yuni c'oplal, mi jech ta xchanubtasvan taje, peq'uel sc'oplal ta xc'ot ti bu ta xventainvan ti Diose. Buch'uuc no'ox ti ta xac' ta venta ti mantale xchi'uc ti ta xchanubtas ti yane, cajal sc'oplal ta xc'ot ti bu ta xventainvan ti Diose. 20Ta xcalboxuc ava'iic, mi mu xavac' avo'ntonic ta spasel ti c'usi ta sc'an ti Diose, mi jech ta xapasic jech c'u cha'al ta spas ti fariseoetique xchi'uc ti jchanubtasvanejetic yu'un ti mantale, mu cha'beluc xu' xa'ochic batel ti bu ta xventainvan ti Diose. 21“Ti vo'oxuque ava'binojic xi albatic ti amolmuc'totique: “Mu xamilvan. Ti buch'u ta xmilvane jbel sc'oplal ta stoj.” 22Ta xcalboxuc ava'iic ti vu'une, buch'uuc no'ox ti xti'et sjol yu'un ti xchi'ile, ta stoj. Ti buch'u ta sa' ta c'op ti xchi'ile, ta xich' chapanel ta stojol ti banquilal jchapanvanejetique. Ti buch'u ta sbis ta cotol chaval ti xchi'ile, xi'bal sba, yu'un xu' ta xbat ta lajebal bu oy ti c'oq'ue. 23“Mi ta xavich' batel ti matanal ta altare, mi ja' o vul ta avo'nton ti oy bu mu lecuc ta xayil ti achi'ile, 24ta lec no'ox, ictao to comel ta sti'il altar ti matanal ta xavac' oxe. Batan, ba'yel ba lajesbo yo'nton ti achi'ile. Ts'acal to xu' xtal avac' ti matanal ti ta xavac' ono'oxe. 25“Mi oy buch'u ta xac'ot ta chapanele, c'alal ta xaxanav batel ta be xchi'uque, lajesbo yo'nton yo' mu xba yac'ot ta sc'ob ti jchapanvaneje. Ti jchapanvaneje ta xac'ot batel ta sc'ob ti mayole. Ti mayole ta stic'ot ta chuquel. 26C'alal tiq'uilot xa ta chuquele, ta xcalbot ava'iic, mu xaloc' talel ta jeche' no'ox ja' to mi laj atoj comel scotol ti amultae. 27“Ava'binojic xi albatic ti amolmuc'totique: “Mu xasa' avantsic. Antsetic, mu xalo'labe sjol viniquetic.” 28Ta xcalboxuc ava'iic, buch'uuc no'ox ta sq'uel jun ants ti oy ta yo'nton ta sc'upin ya'ie, co'ol s'elan laj xa sc'upin ta x'ile yu'un ti Diose. 29“Jech o xal un, mi ta scoj asat ta xata amul yu'une, pitso loq'uel, jipo batel ta nom. Yu'un ja' lec mi ta xach'ay ti jbejuc asate, ja' toj chopol mi sjunul abec'tal jip xi ochel ta c'oq'ue. 30Mi ta xata amul yu'un ti abats'i c'obe, seto loq'uel, jipo batel ta nom. Ja' lec mi jun no'ox ac'ob ta xch'aye, ja' toj chopol mi sjunul abec'tal jip xi ochel ta c'oq'ue. 31“Ava'binojic xi albatic ti amolmuc'totique: “Buch'uuc no'ox ta sbaj ti yajnile, ac'o smeltsanbe ti svunal bajobbaile.” 32Mi oy buch'u ta sbaj ti yajnile, ta xcalboxuc ava'iic, ja' no'ox xu' ta sbaj mi ta xac' sba ta c'upinele. Yan mi ta sbaj ta jeche' no'oxe, ta acoj vinic ta sta smul ti antse. Ja' jech xtoc, ti buch'u ta xic' ti bajbil antse, ta sta smul ec. 33“Ava'binojic xi albatic ti amolmuc'totique: “C'otuc ta pasel avu'unic ti laj xa ava'an ta rextico ti Dios ti oy c'usi ta xavac'bee.” 34Ti vu'une xi ta xcalboxuc ava'iique: Mu'yuc c'usi xava'anic ta rextico, mi ja'uc ti vinajele, yu'un ja' xchotleb ti bu chotol ta spas mantal ti Diose. 35Mu xava'anic ta rextico ti banomile, yu'un ja' stec'leb yoc ti Diose. Mu xava'anic ta rextico ti jteclum Jerusalene, yu'un ja' steclumal ti Ajvalil Diose. 36Mu ta ajoluc no'ox atuc ti ta xava'anic aba ta rexticoe, yu'un mu xu' ta xasacubtas ta xavic'ubtas ti stsotsil ajolique. 37Liquem talel ta stojol pucuj ma' ti jutbilal c'ope. Jech o xal alic, mi jech, yu'un jech; mi mo'oj, yu'un mo'oj. 38“Ava'binojic xi albatic ti amolmuc'totique: ‘Buch'uuc no'ox ta stubbe sat ti xchi'ile, jech ta xich' ec. Buch'uc no'ox ta sc'asbe stanal ye ti xchi'ile, jech ta xich' ec.’ 39Ta xcalboxuc ava'iic ti vu'une, mu me xapacbe sutel ti chopol vinique. Mi ta smaj jot xocon asate, ac'o smaj ti jote. 40Mi oy buch'u ta xic'ot batel ta stojol jchapanvanejetic yo' ta spoj ti ac'u'e, ac'o yich' batel ti yan ac'u' xtoque. 41Mi oy buch'u ta xasujic ta xcuchel icatsil o'lol revae, ja' lec cuchbo batel jun reva. 42Buch'uuc no'ox mi oy c'usi ta sc'anbote, ac'bo. Buch'uuc no'ox mi oy c'usi ta xch'amunbote, ac'bo. 43“Ava'binojic xtoc xi albatic ti amolmuc'totique: ‘C'uxubino ti buch'u lec xavil abaic achi'uque, contraino ti avajcontrae.’ 44Ta xcalboxuc ava'iic ti vu'une, c'uxubino ti avajcontrae. C'anbeic slequilal Dios ti buch'u ta xaschopol-c'optaoxuque. Pasic lec ta stojol ti buch'u xti'et sjol ta atojolique. C'oponbeic Dios ta stojol ti buch'utic ta xayilbajinoxuque. 45Mi jech ta xapasique, ja' xnich'naboxuc ti Dios ti oy ta vinajele. Yu'un ti Diose ta xac'be talel xojobal c'ac'al ti buch'u oy slequil stuq'uile xchi'uc ti buch'u ch'abal slequil stuq'uile. Ta xac'be tal vo' ti buch'u oy slequil stuq'uile xchi'uc ti buch'u ch'abal slequil stuq'uile. 46Yan mi ja' no'ox ta xac'uxubin ti buch'u c'ux ta xaya'iique, ¿c'usi matanal ta xavich'ic ti jech ta xapasique? Yu'un ti jc'an-patan-taq'uinetique c'ux ta xa'iic ti buch'u c'ux ta x'a'yie yu'une. 47Mi ja' no'ox lec ta xac'opon ti buch'u lec xavil aba achi'uque, ¿c'usi ti lec ta xapasique? yu'un ti buch'u yan yajvalique, jech ta spasic ec. 48Oyuc yutsil avo'ntonic jech chac c'u cha'al oy yutsil yo'nton ti Dios oy ta vinajele —xi ti Jesuse.


Copyright
Learn More

will be added

X\