San Mateo 4

1Ta jech yepal un, ti Jesuse iq'ue batel ta sbajtical banomil yu'un ti Ch'ul Espiritue yo' jech ta xlajeltsae yu'un ti pucuje. 2Cha'vinic (40) c'ac'al, cha'vinic (40) ac'ubal, mu'yuc xve'. Ts'acal to un, lic ya'i vi'nal. 3Ti pucuje nopaj batel ta stojol ti Jesuse yo' ta slajeltsa ti xi laj yalbee: —Mi melel Xnich'onot ti Diose, paso ta mantal ti tonetic li'e ti joybijuc ta pan avu'une. 4Ti Jesuse xi laj staq'ue: —Xi ta xal ti sc'op Diose: ‘Ma'uc no'ox ta pan ta xch'i xc'opoj ti vinique. Ta xch'i xc'opoj ta sventa jujubel c'usi ta xal ti Diose.’ 5Ta jech yepal un, iq'ue batel ti Jesús yu'un ti pucuj ta ch'ul jteclum Jerusalén ti muy batel yu'un ti bu xa slajeb toyol ti ch'ulnae. 6Xi laj yalbee: —Mi melel Xnich'onot ti Diose, jipo aba yalel li'e, yu'un xi ta xal ti sc'op Diose: ‘Ti Diose ta xalbe mantal ti yaj'ánjeltaque yo' ta xchabiot, ta xic'ot ta sc'ob yo' jech mu xyayij avacan ta ton.’ 7Ti Jesuse xi laj staq'ue: —Xi ta xal ti sc'op Dios xtoque: ‘Mu xalajeltsa ti Ajvalil Dios avu'une.’ 8Ti pucuje laj yic' batel xtoc ta jun toyol vits ti bu laj yac'be yil scotol yutsilal slequilal ti muc'tiquil lume. 9Xi laj yalbee: —Mi ta xaquejan aba ta yich'elun ta muq'ue, ta xcac'bot avu'nin scotol le'e. 10Ti Jesuse xi laj stac'bee: —Batan, Pucuj, ti sc'op Diose xi ta xale: ‘Ich'o ta muc' ti Ajvalil Dios avu'une, ac'o aba ta tunel yu'un.’ 11Ti pucuje laj xch'ac sba batel ta stojol, tal ánjeletic ti laj scolta ti Jesuse. 12C'alal laj ya'i Jesús ti tiq'uil ta chuquel ti Juane, bat ta Galilea. 13Mu'yuc xa xcom nacluc ta jteclum Nazaret. Bat nacluc ta jteclum Capernaum ti oy ta ti' nab ta yosilal ti Zabulone, ti Neftalie. 14Taje, yo' ta xc'ot ta pasel ti xi laj sts'iba comel ti j'alc'op Isaiase: 15“Ti yosilal ti Zabulone, ti Neftalie ti bu ta x'ech' ti be ti ta xc'ot ta nabe, ta jot sti'il ti uc'um Jordane, ti Galilea sbi xtoque, ti bu nacalic jyanlumetic ti yan yajvalique, 16scotol ti jnaclejetic taje, ti oyic ta ic'al osile, laj yilic saquilal osil un. Ti buch'utic oyic ta squeoval ti chamel lajebale, c'ot ta stojolic un ti saquilal osile.” 17Ja' o yorail laj sliques yabtel ti Jesuse, ti xi laj yale: —Na'o aba ava'iic, sutanic talel ta stojol ti Diose, yu'un nopol xa yorail ta xventainvan ti Dios ti oy ta vinajele. 18C'alal ta xanav batel ta sti'il nab Galilea ti Jesuse, ja' o laj yil cha'vo' viniquetic ti yits'in sbanquil sbaique. Ti june, Simón sbi, Pedro ti yan sbi xtoque. Ti june, Andrés. Ja' yabtelic ti mas choye. Ja' o ta sjipic ochel ta nab ti smasobil xchoyique. 19Ti Jesuse xi laj yalbee: —La' chi'inicun, ta xcac' yan avabtelic ta yiq'uel talel ti jnaclejetique. 20Ti stuquique ta ora no'ox laj yictaic comel ti smasobil xchoyique, batic xchi'uc ti Jesuse. 21C'alal xi snatil xanav batel ti Jesuse, ja' o laj yil yan cha'vo' viniquetic ti xi s'elan yits'in sbanquil sbaique: Ti june, Jacobo; ti june, Juan, ti ja' xnich'nabtac ti Zebedeoe. Oyic ta yut barco xchi'uc ti stotique, yacalic ta sts'isel ti smasobil xchoyique. Iq'ueic talel yu'un ti Jesuse. 22C'alal jech laj ya'iique, ta ora no'ox laj yictaic comel ti sbarcoique xchi'uc ti stotique, laj xchi'inic batel ti Jesuse. 23C'alal ta xani batel scotol Galilea banomil ti Jesuse, ta x'ech' chanubtasvanuc ta jujun ch'ul naetic ti buyuc no'oxe. Ta xalbe sc'oplal ti ventainel yu'un ti Diose. Ta scoles xtoc ti c'usiuc no'ox ip c'ux ta xa'iic ti jnaclejetique. 24Laj ya'ibeic sc'oplal Jesús ti jnaclejetic ta Siria banomile. Laj yiq'uic talel ta stojol ti c'usiuc no'ox chamelal ta xa'iique, ti ta x'avan ti sjol sbaquilique, ti ta x'ilbajinatic yu'un ti pucuje, ti jtub-iq'uetique, ti pasemic ta moch'e. Scotol ti jchameletique colic ta sventa ti Jesuse. 25Yepal no'ox jnaclejetic laj sts'acliic batel ti Jesús ti liquemic talel ta Galilea banomile, ti liquemic talel ta Decápolise, ti liquemic talel ta Jerusalene, ti liquemic talel ta Judeae, xchi'uc ti liquemic talel ta sloq'ueb c'ac'al ti oy ta jot uc'um Jordane.


Copyright
Learn More

will be added

X\