San Mateo 25

1Ti Jesuse xi laj yal xtoque: —Ti ventainel yu'un ti Dios ti oy ta vinajele, co'ol s'elan jech c'u cha'al lajuneb tsebetic ti yich'ojic batel ti slamparaic ti chba snupic ta be ti jnupunel vinique. 2Oy vo'ob ti mu'yuc sbijilique. Oy vo'ob ti oy sbijilique. 3Ti vo'ob ti mu'yuc sbijilique, c'alal laj yich'ic batel ti slamparaique, mu xa bu laj yich'ic batel yan aceite yo' ta snojesic yan velta. 4Ja'uc ti vo'ob bijique, c'alal laj yich'ic batel ti slamparaique, laj to yich'ic batel yan aceite ta limite. 5Jalij ti jnupunel vinique. Jech o xal lic nicavicuc scotolic. Ta jech yepal un och svayelic. 6Nopol xa nan o'lol ac'ubal ti c'alal ja' o oy buch'u xi tsots avane: ‘Tal xa ti jnupunel vinique, loc'anic talel, la' nupic ta be.’ 7Scotol ti tsebetique julavic, lic xchapanic ti slamparaique. 8Ja'uc ti vo'ob mu'yuc sbijilique xi laj yalbeic ti vo'ob bije: ‘Ac'buncutic jutebuc avaceiteic, yu'un ti jlamparacutique ta xa sc'an ta xtub ya'i.’ 9Ja'uc ti vo'ob bijil tsebetique xi laj staq'uique: ‘Mu stac'. Mi ta xcac'cutique, mu xloc' o cu'uncutic, mi ja'uc xa la ta xloc' sventa avu'unic ec un. Ja' lec, batanic ti bu ta xchone. Manic ti ta xtun avu'unique.’ 10C'alal ja' o batemic ta smanel yaceite ti tsebetic mu'yuc sbijilique, ja' o vul ta loq'uel ti jnupunel vinique. Ti bijil tsebetique ochic batel xchi'uc ti jnupunel vinique. Mac xi ti ti'nae. 11Ts'acal sutic tal ti yan tsebetique, xi laj yalique: ‘Cajval, Cajval, jambuncutic ti ti'nae.’ 12Ja'uc ti jnupunele xi laj staq'ue: ‘Ta melel mu xacojtiquinic.’ 13Xi to laj sts'ac batel lo'il ti Jesuse: —Vic'luc asatic ti vo'oxuque, yu'un mu xana'ic c'usi ora, c'usi c'ac'alil ta xital ti vu'un co'ol j'elantique. 14Ti Jesuse xi laj yal xtoque: —Ti ventainel yu'un ti Dios ti oy ta vinajele, co'ol s'elan jech c'u cha'al jun vinic ti c'alal ta xloc' batel ta yan lume, laj sta ta iq'uel ti yaj'abteltac ta yac'bel comel sventain ti staq'uine. 15“Oy jun yaj'abtel, ac'bat comel vo'ob (5,000) mil taq'uin. Ti june, i'ac'bat comel cha'mil (2,000) ta sep taq'uin. Ti jun xtoque, i'ac'bat comel jmil (1,000). Jech laj spas ti j'abtele, ja' ti c'u s'elan xtojobic ta spiquele. Ti ajvalile loc' batel ta nom. 16Ti j'abtel ti buch'u laj yich' comel ti vo'ob mil (5,000) taq'uine, lic abtejuc xchi'uc, jolin yu'un vo'ob mil (5,000). 17Ja' ec ti jun j'abtel ti buch'u laj yich' comel ti cha'mil (2,000) taq'uine, lic abtejuc xchi'uc, jolin yu'un cha'mil (2,000). 18Ja'uc ti j'abtel ti buch'u laj yich' comel ti jmil (1,000) ta sep taq'uine, ja' no'ox bat sjots'be ch'enal ta banomil, laj snac'be staq'uin ti yajvale. 19“Ta sjalil to un, sut talel ti ajvalile, lic xchapan cuenta xchi'uc ti yaj'abteltaque. 20Ja' ba'yel c'ot ta stojol ti buch'u laj yich' ti vo'ob (5,000) mil ta sep taq'uine, xi laj yale: ‘Cajval, li' oy ti ataq'uin laj avac'bun comel ti vo'ob (5,000) mil ta sepe, jolin cu'un vo'ob mil (5,000).’ 21Ti ajvalile xi laj yale: ‘Lec oy. Lequil j'abtelot. Lec laj aventain ti juteb laj cac'bot comele. Jech o xal yepal to ta xcac'bot aventain. Muyubajan, ochan talel ta jtojol.’ 22Ts'acal to c'ot ta stojol ti buch'u laj yich' comel ti cha'mil (2,000) ta sep taq'uine, xi laj yale: ‘Cajval, li' oy ti cha'mil (2,000) ta sep taq'uin laj avac'bun comele, jolin cu'un cha'mil (2,000).’ 23Ti ajvalile xi laj yale: ‘Lec oy. Lequil j'abtelot. Lec laj aventain ti juteb laj cac'bot comele. Yepal to ta xcac'bot aventain. Muyubajan, ochan talel ta jtojol.’ 24C'alal c'ot ta stojol ti buch'u laj yich' jmil (1,000) ta sep taq'uine, xi laj yalbe ti yajvale: ‘Cajval, jna' lec ti tsots vinicote. Ta xatsob ti ts'unobal ti bu mo'cot laj ats'une. Jech xtoc ta xatsob ti ts'unobal ti bu mo'cot laj avije. 25Lixi', jech o xal bat jnac' ta lum ti ataq'uine. Li' oy ti ja' avu'une.’ 26Ti ajvalile xi laj yale: ‘Ch'ajil j'abtel, chopol j'abtelot. Xana' xa ono'ox lec cac'tic ti ta jtsob ti bu mo'cun laj jts'une, ti ta jtsob ti bu mo'cun laj jvije. 27Ti jechuque, laj avich' batel ta banco ti jtaq'uin yo' oy xa sjol ti jtaq'uin ta xquich' c'alal ta xivule.’ 28Jech o xal ti ajvalile xi laj yalbe ya'i ti buch'u tey ono'ox oyique: ‘Pojbeic tal ti jmil (1,000) taq'uin yich'oje. Ba ac'beic ti buch'u yich'oj lajunmile (10,000). 29Ti buch'u oy ono'ox yu'une, ta x'ac'bat to yan yo' yepal no'ox oy yu'un. Ja'uc ti buch'u mu x'abtej xchi'uc ti juteb ac'bate, ta xpojbat sutel ti juteb ac'bile. 30Ti chopol j'abtel li'e, jipic batel ta ic'al osil ti bu ta xoq'uita sbae, ti bu xc'uxuxet ti yee.’ ”, 31Ti Jesuse xi laj yale: —C'alal xtal ochcun ta Ajvalil ti vu'un co'ol j'elantique, xojobin no'ox ti cutsilal jlequil ti joyolic ta jxocontac ti caj'ánjeltac ta xichoti ta lequil chotlebal ti bu jun yutsile. 32Ta stsob sbaic tal ta jtojol scotol ti jnaclejetic ti oyic ta jujun lume. Ta jch'ac ti jnaclejetic jech c'u cha'al ta spas ti jq'uel-chij ti ta xch'ac loq'uel ti xchij ti capal xchi'uc ti tentsune. 33Ti chije ta xcac' ta jbats'i c'ob, ja'uc ti tentsune ta xcac' ta jts'et c'ob. 34Ti Ajvalilune xi ta xcalbe ya'i ti oyic ta jbats'i c'obe: ‘La'ic ta jtojol ti vo'oxuc la'ich'atic ta c'ux yu'un ti Jtote. Ochanic ti bu ta xventainvan ti Jtote, yu'un jech ono'ox chapanbil ac'oplalic c'alal mu'yuc to ox bu meltsajem ti banomile. 35C'alal ta xivi'naje, laj amalq'uinicun. C'alal ta xca'i taqui ti'ile, laj avac'beicun vo' cuch'. C'alal jcotcovil laj avilicune, laj aviq'uicun ochel ta anaic. 36C'alal ch'abal jc'u' laj avilicune, laj avac'beicun. C'alal jchamelun laj avilicune, ay avu'lanicun. C'alal tiq'uilun ta chuquele, ay aq'uelicun.’ 37Va'i un, ti buch'utic oy slequil stuq'uilique xi ta xalique: ‘Cajval, ¿bu laj jmalq'uinotcutic c'alal oyot ta vi'nale? ¿Bu laj cac'botcutic avuch' vo' c'alal oyot ta taqui ti'ile? 38¿Bu laj quilotcutic ti jcotcovilote ti laj quic'otcutic ochel ta jnacutique? ¿Bu laj cac'botcutic ac'u' c'alal ch'abal ac'u'e? 39¿Bu ay jvu'lanotcutic c'alal ip ta xava'ie? ¿Bu ay jq'uelotcutic c'alal tiq'uilot ta chuquele?’ 40Ti vu'un Ajvalilune xi ta jtac'beique: ‘Ta xcalboxuc ava'iic ta melel, ta sventa ti laj ac'uxubinic ti jun jchi'ile, ti peq'uel yuni c'oplale, vu'un laj ac'uxubinicun.’ 41“Ti vu'un Ajvalilune xi ta jtac'beic ti buch'u oyic ta jts'et c'obe: ‘Ch'aco abaic loq'uel ta jtojol ti bisbiloxuc ta cotol chaval yu'un ti Diose. Sbatel osil, batanic ta c'oc' ti bu chapanbil ta sventa ti pucuje xchi'uc ti yaj'ánjeltaque. 42Yu'un c'alal oyun ta vi'nale, mu'yuc bu laj amalq'uinicun. C'alal oyun ta taqui ti'ile, mu'yuc bu laj avac'beicun vo' cuch'. 43C'alal laj avil jcotcovilune, mu'yuc bu laj aviq'uicun ochel ta anaic. C'alal ch'abal jc'u'e, mu'yuc bu laj avac'beicun. C'alal ipune, c'alal ja' o tiq'uilun ta chuquele, mu'yuc ay aq'uelicun avu'lanicun.’ 44Va'i un, xi ta sjaq'uique: ‘Cajval, ¿mi yu'un oy la bu laj quilotcutic ti c'alal oyot ta vi'nale, ti oyot ta taqui ti'ile, ti jcotcovilote, ti ch'abal ac'u'e, ti ip ta xava'ie, ti tiq'uilot ta chuquele, ti mu'yuc xajcoltacutic ta xavale?’ 45Ti vu'un Ajvalilune xi ta jtac'beique: ‘Ta xcalboxuc ava'iic ta melel, ta sventa ti mu'yuc laj ac'uxubinic ti achi'ilique, ti peq'uel yuni c'oplalique, vu'un mu'yuc laj ac'uxubinicun.’ 46Taj une, ta xbatic ta tojob mulil sbatel osil. Ja'uc ti buch'u oy slequil stuq'uilique ta xbatic ta cuxlejal sbatel osil.”


Copyright
Learn More

will be added

X\