San Mateo 23

1Ts'acal to un, ti Jesuse xi laj yalbe ya'i ti jnaclejetique xchi'uc ti yajchanc'optaque: 2—Ti jchanubtasvanejetic yu'un ti oy c'usi tsots sc'oplal albile xchi'uc ti fariseoetique, ja' sva'anoj sbaic ta yalbel smelol smantal ti Moisese. 3Ja' yu'un un, ch'unbeic, pasic ti c'usi ta xalique. Ja'uc le' une, mu xachanbeic ti stalelique. Yu'un ti stuquique mu'yuc ta spasic ti c'usi ta xalique. 4Mu no'ox albajuc yalal ti icatsil ta xaq'uic ti mu'yuc buch'u xlic yu'une. Naca xac'beic no'ox yicatsin ti yane. Mi ja'uc juteb ta stic' sc'obic ta yiquel icatsil ti stuquique. 5Ta spasic scotol jech taje yo' ta staic ti lec ta x'ilatic yu'un ti yane. Yu'un lec ta xa'iic ti chucajtic ta sti'baic ta sc'obic ti smantal Dios ts'ibabil ta jamal poq'ue, xchi'uc lec nat ta slap ti sc'u'ic ti oy stsitsimaltaque. 6Oy ta yo'ntonic ti stuquic no'ox cajal sc'oplal c'oticuc ta jujun ve'el uch'ubajele, xchi'uc ti oy ta yo'ntonic ta xchoti ya'iic ta chotlebal sventa ich'el ta muc' ta jujun ch'ul nae. 7Ta sc'anic ti nupbilic ich'bilic ta muc' yu'un ti jnaclejetique xchi'uc ta calleetic ti albatuc jchanubtasvanejetique. 8“Ti vo'oxuque ma'ucuc oy ta avo'ntonic ti ta xa'albatic jchanubtasvaneje, yu'un co'ol no'ox achi'il abaic. Yu'un jun no'ox ti jchanubtasvanej avu'unique, ja' ti Cristoe. 9Mu'yuc buch'u xabis ta totil li' ta banomile. Oy no'ox jun Atotic ti xi s'elane: ja' ti Buch'u oy ta vinajele. 10Ma'ucuc oy ta avo'ntonic ti bisbiloxuc ta banquilale, yu'un ja' banquilal avu'unic ti Cristoe. 11Ti buch'u cajal sc'oplal oy ta atojolique, ja' ti buch'u ta xac' sba ta tunel ta stojol ti yane. 12Ja'uc ti buch'u xcajet xtoyet xa'i sbae, ta spec'tsanbat sc'oplal. Yan ti buch'u biq'uit yac'oj sbae, cajal sc'oplal ta xc'ot. 13“¡Mu cha'belucoxuc un, jchanubtasvanejetic yu'un ti oy c'usi tsots albil sc'oplale, jpac'taejba fariseoetic! ti mu xavaq'uic ochuc ti buch'utic ta sc'anic ventainel yu'un ti Diose. Mi ja'uc xa'ochic, mi ja'uc xavac' ochicuc ti buch'utic ta sc'an ta x'och ya'iique. 14“¡Mu cha'belucoxuc un, jchanubtasvanejetic yu'un ti oy c'usi tsots albil sc'oplale, jpac'taejba fariseoetic! ti xapojbeic no'ox snaic ti me'unal antsetique. Yo' mu xvinaj ti jech ta xapasique, jal ti c'opojel ti'inel avu'unic ta xapasique. Ti jech taj une, ta xavich'ic tsots tsitsel. 15“¡Mu cha'belucoxuc un, jchanubtasvanejetic yu'un ti oy c'usi tsots albil sc'oplale, jpac'taejba fariseoetic! ti avac'ojic yipal ti yalel muyeloxuc ta sa'el mi oy bu jun vinic ta xchanubtasel jech c'u cha'al ti ach'unojique. C'alal mi laj xa xch'un avu'unic une, chpucujib o avu'unic ta j'ech'el ti lajebal xa sq'ueloj batel jech c'u cha'al ti vo'oxuque. 16“¡Mu cha'belucoxuc un, jnit-ma'satetic ti xi ta xavalique! ‘Ti buch'u laj sva'an sba ta yalel ti oy c'usi ta xac' ti ja' no'ox laj sva'an ta rextico ti ch'ulnae, mu'yuc stijel ta c'op. Ja'uc ti buch'u ta sva'an ta rextico ti oro yu'un ti ch'ulna ti oy c'usi ta xaq'ue, oy xa stijel ta c'op ti ac'o yaq'ue.’ 17¡Jeche'oxuc ta j'ech'el, ma'satoxuc! ¿Bu junucal ti oy xi tsots sc'oplale, mi ja' ti ch'ulnae, mi ja' ti oro ti ventainbil ic'ot yu'un ti ch'ulnae? 18Yu'un xi ta xavalic xtoque: ‘Mu'yuc stijel ta c'op ti buch'u laj sva'an ta rextico ti altar ti oy c'usi ta xaq'ue. Yan mi laj sva'an ta rextico ti smoton Dios cajal ta altar une, oy stijel ta c'op ti c'otuc ta pasel yu'une.’ 19¡Ma'satetic! ¿Bu junucal ti xi oy tsots sc'oplale, mi ja' ti altare, mi ja' ti smoton Dios ti ja' ventainbil c'ot yu'un ti altare? 20Ti buch'u ta sva'an ta rextico ti altare, ma'uc no'ox ta sva'an ta rextico ti altare, laj xa sva'an ta rextico ti smoton Dios cajal ta altare. 21Ti buch'u ta sva'an ta rextico ti ch'ulnae, ma'uc no'ox ta sva'an ta rextico ti ch'ulnae, laj xa sva'an ta rextico ti Diose, yu'un sventainoj ti ch'ulnae. 22Ti buch'u ta sva'an ta rextico ti vinajele, laj xa sva'an ta rextico ec ti mucul chotlebal ti bu chotol ti Diose. 23“¡Mu cha'belucoxuc, jchanubtasvanejetic yu'un ti oy c'usi tsots albil sc'oplale, jpac'taejba fariseoetic! Ja' no'ox tsots sc'oplal ta xava'iic ta sloq'uesel ti jujun ta lajlajuneb ti tul nichime, ti culantue, ti cominoe, yo' ta xavac'beic smotonin ti Diose. Mi ja'uc xavich'ic ta muc' ti c'u s'elan ta xchanubtasvan ti oy c'usi tsots sc'oplal albile, ti ta xalbe sc'oplal ti lequilale, ti xc'uxul o'ntonale, ti junuc o'ntonal ta stojol ti Diose. Ja' tsots sc'oplal ta xapasic ti jechuque xchi'uc mu xavictaic ta yaq'uel ti jujun ta lajlajunebe. 24Jnit-ma'satetic, mu xac'an xabiq'uic ti nene us avalojique, lec xava'iic sbiq'uel ti muc' ta camelloe. 25“¡Mu cha'belucoxuc, jchanubtasvanejetic yu'un ti oy c'usi tsots albil sc'oplale, jpac'taejba fariseoetic! Ti spat xocon ti vasue, ti sets'e, lec pocbil avu'unic. Ja'uc ti yut une mu jechuc, nojem ta yu'ninel, ta yelc'anel ti c'usi oy yu'un ti achi'iltaque. 26Ma'sat fariseo, poco ba'yel ti yut avasue, ti yut asets'e, yo' lec ti yute ti spate. 27“¡Mu cha'belucoxuc, jchanubtasvanejetic yu'un ti oy c'usi tsots albil sc'oplale, jpac'taejba fariseoetic! Co'ol a'elanic jech c'u cha'al sna ti anima ta ba muquinale, ti lec c'upil sba sac lapan ta q'uelel ti spate. Ti ta yut une noj ta baquetic xchi'uc ti ep ta tos c'usitic chopol x'ayan teye. 28Yu'un xi a'elanique: Jun yutsil ta xilic apat axoconic ti jnaclejetique. Ja'uc ti yut avo'ntonique noj ta mulil, ta pac'taejbail. 29“¡Mu cha'belucoxuc, jchanubtasvanejetic yu'un ti oy c'usi tsots albil sc'oplale, jpac'taejba fariseoetic! Ta xameltsanbeic lec sba smuquinal ti j'alc'opetique. Ta xanichimtaic bu va'al sloc'ol ti buch'u lequic ech'ic ta banomile. 30‘Ti oyucotic xa ox c'alal cuxulic to ox ti jmolmuc'totique, mu'yuc laj jtic' jbatic ta smilel ti j'alc'opetic ti jechuque’, xachiique. 31Ti jech ta xavalique, laj avinajes abaic ti ja' snitiluloxuc ti buch'utic laj smilic ti j'alc'opetique. 32Tsutsesic xcha' yabtel ti amolmuc'totic ti c'u s'elan laj sliquesic talele. 33“¡Xnich'nab jti'oval chon! ¿c'usi xavut ta xapoj abaic yu'un ti tsitsel yu'un ti c'atimbaque? 34Ta jtac talel ta atojolic un ti j'alc'opetique, ti jchanubtasvanejetique, ti bijil viniquetique. Ti vo'oxuc une ta xamilic, ta xajipanic ta curus jlomuc. Ti jlome, ta xamajic ta jujun ch'ul na avu'unic, nutsbil avu'unic ta jujun jteclum. 35Jech o xal cajal ta xc'ot ta abaic ti lajic ta milel scotol ti lequil tuq'uil viniquetique, ti lic ono'ox talel ta stojol ti Abel ti oy slequil stuq'uile, ti vul c'alal ta stojol ti Zacarías xnich'on ti Berequiase, ti vo'oxuc laj amilic ta yut ch'ulna ta sts'el ti altare. 36Ta xcalboxuc ava'iic ta melel, ti jech lajic ta milel ti lequil tuq'uil viniquetique, scotol cajal ta xcom ta abaic avi tana li'e. 37“Jerusalén, Jerusalén, ta xamilic ti j'alc'opetique, ta xalombeic ton ti buch'utic tacbilic tal yu'un ti Diose. Ep ta velta ti co'ntonuc ca'i jtsoboxuc jech chac c'u cha'al ti me' alac' ta stsob ti yalab ta yolon xiq'ue. Mu jset'uc xac'anic. 38A'yio ava'iic un, jipbil tenbil ta xcom avu'unic ti ana ac'ulebique. 39Ta xcalboxuc ava'iic, tana li'e, slajeb laj avilic ti jsate, ja' to ta xavilic jsat mi xachi ta xavalic liquele: ‘Jun yutsil ti Buch'uc tacbil talel yu'un ti Diose.’ ”


Copyright
Learn More

will be added

X\