San Mateo 22

1Ti Jesuse xi lic yal yan babac'opetic: 2—Ti ventainel yu'un ti Diose, co'ol s'elan jech c'u cha'al jun ajvalil ti laj spas q'uin sventa ta xnupun ti xnich'one. 3Ti ajvalile laj stac batel yaj'abteltac ta stojolic ti buch'utic ic'bilic yu'une. Ti buch'utic ic'bilic une, mu sc'an xtalic. 4Laj xcha'tac batel yan yaj'abteltac ta stojol ti buch'utic ic'bilic yu'une, ti xi laj sc'ubanbee: ‘Ba albeic ya'iic ti chapal xa cu'un ti ve'lile, ti laj xa jtac ta milel ti vacaxe xchi'uc ti yan chon bolometic ti lec jubemique. Chapal xa scotol ti c'usitic ta xtune, talicuc ta uch'vanej.’ 5Ti buch'utic ic'bilique mu'yuc xich'ic ta muc' sc'op yaj'abtel ti ajvalile. Oy jlom bat abtejicuc ta yosilic. Oy jlom batic ta chonolajel. 6Ti jlom xtoque laj stsaquic ta majel, laj smilic yaj'abteltac ti ajvalile. 7Ti ajvalile ech'em soc sjol. Laj yalbe mantal ti yajsoldadotaque ac'o ba smilic ti jmilvanejetique xchi'uc ac'o chic'beic ti slumalique. 8Ts'acal to ti ajvalile xi laj yalbe ti yaj'abteltaque: ‘Chapajem xa scotol cu'un sventa ti q'uine. Ti buch'utic ic'bilique, ma'uc ic'bil cu'un jna'. 9Batanic un cha'e ti bu ta x'ech'ic ti jbeinel ta jujun calleetique, iq'uic talel ta q'uin ti c'u yepal ta xataique.’ 10Ti j'abteletique loq'uic batel ta calleetic. Laj yiq'uic tal scotol ti jbeineletic ti c'u yepal laj staique. Mu t'ujbiluc laj spasic. Noj yut sna ti ajvalile. 11“C'alal och batel ti ajvalil ta yut sna ta sq'uelel ti buch'utic ic'bilic yu'une, laj sta ta ilel jun vinic ti mu'yuc bu slapoj ochel c'u'il sventa ti nupunele. 12Xi laj yalbee: ‘Chi'iltic, ¿c'usi laj avut la'och talel li'e, ti c'alal mu'yuc alapoj talel c'u'il sventa ti nupunele?’ Ts'ijil icom ti vinique. 13Va'i un, ti ajvalile xi laj yalbe ya'i ti buch'u sventainoj ta yaq'uel ti ve'lil ta mexae: ‘Chucbeic yoc sc'ob ti vinic li'e. Jipic batel ta ic'al osil ti bu ta x'oc'olet xc'uxuxet ti yee.’ 14Yepal ti buch'u ic'bilique, jun chib ti buch'u t'ujbilique.” 15Laj taj une, ti fariseoetique bat scomonopic yo' oy c'usi ta sjac'beic ti Jesuse, yo' ta stabeic smul ti mi oy c'usi chopol ta xale. 16Laj staquic batel un jun chib svinictac xchi'uc jun chib svinictac ti ajvalil Herodese, ti xi laj yalbeic ti Jesuse: —Jchanubtasvanej, jna'ojcutic lec ti ja' melel ti c'usi ta xavale. Ta xavac' jna'cutic jech c'u cha'al ta sc'an ti Dios ta jpascutique. Mu labluc xava'i c'usitic ta snopic ti jnaclejetique, yu'un mu t'ujbiluc ta xapas. 17Albun ca'icutic c'usi ta xanop yu'un ti xi s'elan li'e: ¿Mi lec ti ta jtojcutic patan taq'uin sventa ti ajvalil romanoe, mi mu lecuc? 18Ti Jesuse laj yilbe yo'nton ti yan o c'usi snopojic talele, xi laj yalbee: —Jpac'taejbailetic, ¿c'u cha'al ta xabajesicun ava'iic ta c'oc'? 19Ac'bun quil jsepuc taq'uin sventa ta xatojic o ti patane. Laj yac'beic tal jsep denario taq'uin. 20C'alal laj sq'uel ti Jesuse, xi laj sjac'bee: —¿Buch'u sat, buch'u sbi li' tsacale? 21Xi laj stac'beique: —Ja' ti banquilal ajvalile —xiic. Va'i un, xi laj yal ti Jesuse: —Ac'beic ti bu ja' yu'un ti ajvalile. Ac'beic xtoc ti bu ja' yu'un ti Diose. 22C'alal jech laj ya'iique, ch'ayal c'ot yo'ntonic, laj yictaic comel ti Jesuse, loq'uic batel. 23Ta sc'ac'alil ono'ox taje, oy jlom saduceoetic batic ta stojol Jesús. Ti jsaduceoetique ta xalic ti mu'yuc ta xcha'cuxi ti animaetique. Jech o xa xi yich'ojbeic batel sc'opic jech c'u cha'al li'e: 24—Jchanubtasvanej, ti Moisese xi laj yale: ‘Mi oy ta xcham jun vinic ti ch'abal xnich'on ta xcome, jech o xal ti yits'ine, tsots sc'oplal ac'o yic' ti me'unal antse yo' mu xch'ay sts'unobal ti anima sbanquile.’ 25Ti lec xcaltic ava'ie, oy bu jech c'otem ta jtojolcutic, yu'un oy jchi'ilcutic vucubic (7) ta voq'uel. Ti sba banquilale laj sa' yajnil, cham, mu'yuc xnich'on com. Ts'acal to, ti its'inale laj yic'be yajnil ti anima sbanquile. 26Ti its'inal une cham xtoc, mu'yuc xnich'on com. Ts'acal to ti yoxibal its'inale laj yic' xtoc, cham no'ox xtoc, mu'yuc xnich'on com. Ja' jech ech' ti yucvo'alique. 27Ts'acal to un, cham ec ti antse. 28Ti xcaltic une, c'alal ta sta sc'ac'alil ta xcha'cuxiic ti animaetique, ¿buch'u junucal ta xajnilin ti ants c'alal laj smalalin ti vucub (7) viniquetique? 29Xi tac'batic yu'un ti Jesuse: —Ch'ayemoxuc ta j'ech'el ti jech ta xavalique ta scoj ti mu xana'ic c'usi ta xal ti ch'ul c'opetique xchi'uc smuc'ul stsatsal ti Diose. 30C'alal ta xcha'cuxi ti animaetique, mu xa ta xnupij sts'aquijic. Mu'yuc xa ta xaq'uic ta nupunel ti yalab xnich'nabique. Ta xc'otic jech c'u cha'al yaj'ánjeltac ti Dios ti oy ta vinajele. 31Ti c'u s'elan sc'oplal ta xcha'cuxiic ti animaetique, ¿mi mu'yuc avilojic ti xi laj yal ti Dios ta xch'ul c'ope? 32‘Diosun yu'un ti Abrahame, ti Isaaque, xchi'uc ti Jacobe.’ Ta stojol ti Diose, mu'yuc buch'u chamem, scotolic cuxulic ta sventa. 33C'alal laj ya'iic ti jnaclejetic ti va'i s'elan chanubtasvan ti Jesuse, ch'ayal c'ot yo'ntonic. 34Ti fariseoetique lic stsob sbaic c'alal laj yilic ts'ijil com yu'un saduceoetic ti Jesuse. 35Oy jun, ja' jchanubtasvanej yu'un ti oy c'usi tsots albil sc'oplale, yo' ta sbajes ya'i ta c'oc' ti Jesuse, xi laj sjaq'ue: 36—Jchanubtasvanej, ¿c'usi mantalil ti tsots sc'oplal ta xal yu'un ti c'usi oy jbel tsots albile? 37Xi laj stac' ti Jesuse: —‘Ti Ajvalil Dios avu'une, c'uxuc xava'i ta sjunuluc avo'nton, ta sjunuluc ach'ulel, ta sjunuluc snopobil avu'un.’ 38Taje, ja' sliquebal sba mantal ti tsots sc'oplale. 39Ti xchibal mantale, jutuc mu co'oluc sba, yu'un xi ta xale: ‘C'uxubino ti achi'iltaque jech c'u cha'al ta xac'uxubin aba atuc.’ 40Ti chib mantal taje, tey xa stsoboj scotol sventa smantaltac ti Moisese xchi'uc ti c'u s'elan chanubtasvanic ti j'alc'opetique. 41C'alal tey to tsobolic to ti fariseoetique, xi laj sjac' ti Jesuse: 42—¿C'usi ta xanopic ta stojol ti Cristoe? ¿Buch'u snitilul? Xi tac'avique: —Ja' snitilul ti Davide. 43Va'i un, ti Jesuse xi laj yale: —¿C'u cha'al ya'yel un cha'e, ‘Cajval’, xi laj yal ti David ta sventa ti ventainbil yu'un ti Ch'ul Espiritue? yu'un ti Davide xi laj yale: 44‘Ti Diose xi laj yalbe ti Cajvale: La', chotlan ta xocon ta jbats'i c'ob ja' to mi nijil chimil c'ot cu'un ta avoc ta ac'ob ti avajcontrataque.’ 45“¿C'u ono'ox la xi un, ja' snitilul David ti Cristoe c'alal ‘Cajval’, xi stuc ti Davide?” 46Mu'yuc buch'u junuc tac' yu'unic jbeluc ti c'ope. Ja' o jech c'ac'al laj yicta sbaic, mu xa c'usi laj sjac'beic jbeluc ti Jesuse.


Copyright
Learn More

will be added

X\