San Mateo 14

1Ti jech yorail taje, ti Herodes ti ochem ta its'inal ajvalil ta Galilea banomile, laj ya'ibe sc'oplal ti Jesuse. 2Xi laj yalbe ti yajtuneltac ti oy ta stojole: —Taje, ja' ti Juan j'ac'-ich'-vo' cha'cuxie. Jech o xal oy ta stojolal ta yaq'uel iluc ti c'usi ch'ayal ta xc'ot o'ntonal yu'une. 3Ti Herodese sna' lec ti laj stic' ta chuquel ti Juane, ti laj xchuc ta cadena taq'uin ta scoj ti ants Herodiase, yajnil ti yits'ine, ti Felipe sbie. 4Ti Juane yu'un xi laj yalbe ti Herodese: —Mu xu' xavajnilanbe yajnil ti avits'ine., 5Ti Herodese ta ox smil ya'i ti Juane, ja'uc le' une xi' yu'un ti jnaclejetique, yu'un xch'unojic ti ja' jun j'alc'ope. 6C'alal sta sc'ac'alil c'usi ora voc' ti Herodese, ic'bat yo'nton ti Herodes ti c'u s'elan c'upil sba ac'otaj yantsil ol ti Herodiase ta sba ta sat ti buch'utic ic'bilic yu'une, 7ti laj sva'an sba ta yalbel ya'i ta yac'bel ti c'usiuc ta sc'ane. 8Va'i un, ti bijubtasbil yu'un ti sme'e, xi laj yalbe ya'i ti ajvalile: —Ac'bun tal ta jun platu sjol ti Juan j'ac'-ich'-vo'e. 9Och ta at o'nton ti Herodese. Ta scoj ti laj xa sva'an sba ta yalel ta stojol ti buch'utic ic'bilic yu'une, laj yal ti ich'batuc talele. 10Va'i un, laj yal mantal ti sc'ocbeicuc sjol ti Juan tiq'uil ta chuquele. 11Yich'ojbeic batel ch'amal ta jun platu ti laj yac'beic ti tsebe, laj yac'be jelavel ti sme' eque. 12C'otic ti yajchanc'optac ti Juane, laj yich'beic loq'uel ti sbec'tal stacopale, laj smuquic. Ts'acal to un, ba yalbeic ya'i ti Jesuse. 13C'alal laj ya'i ti Jesuse, stuc loc' batel ti bu taje, och batel ta jun barco. Bat bu sts'ijlajan ti banomile. Laj ya'iic ti jnaclejetique. Ta yacan laj stamic batel ti loq'uic ech'el ta jteclumetic yo' ta sts'acliic. 14C'alal loc' ta barco ti Jesuse, laj yil ti mu albajuc yepalique. C'uxubaj yo'nton yu'un. Laj scoles ti jchameletic ti yic'ojanic batele. 15C'alal ta xa x'ic'ub talele, ti yajchanc'optaque nopajic batel ti laj yalbeique: —Mal xa c'ac'al ta j'ech'el. Li'e, mi junuc jnaclej. Albo ya'i ti jnaclejetic ti baticuc xa ta smanel ti sve'elic ta jujun bic'tal lume. 16Xi tac'batic yu'un ti Jesuse: —Laj to c'op ma' ti ta xbatic une. Ac'beic sve'el ti vo'oxuque. 17Xi laj stac'beique: —Mu xa yepaluc ma' ti c'usi oy li' une, c'ajomal no'ox vo'ob pan xchi'uc cha'cot choy. 18—Ich'beicun talel taje —xi ti Jesuse. 19Ti Jesuse laj yalbe ya'iic ti chotiicuc ta yaxaltic scotolique. Ts'acal to un, laj stsac ti vo'bej pane xchi'uc ti cha'cot choye. Sq'uel xch'a muyel vinajel, laj yalbe vocol ti Diose. Laj xet' ti pane xchi'uc laj sc'os ti choye. Laj yac'be jelavel ti yajchanc'optaque. Lic spucbeic scotol ti c'u yepal oye. 20Sta scotolic ti bu xa c'alal xal yo'ntonic ta snojesel sbaique. Com to lajcheb (12) moch ti scomelale. 21Ti c'u yepal ve'ique, oy nan vo'miluc (5,000) viniquetic, mu'yuc tsacbil ta atel ti antsetique, ti ololetique. 22Laj ti va'i s'elane, ti Jesuse laj yac' ochicuc batel ta barco ti yajchanc'optaque yo' ba'yel ta xjelavic batel ta jot nab. Com to ti stuque yo' ta sc'oponan comel ti jnaclejetique. 23C'alal laj sc'oponan comele, imuy batel ta vits ti Jesuse yo' ta xc'opoj xti'in stuc. Ti bu taje, xch'ul tuc c'alal och talel ti ac'ubale. 24Ja'uc ti barcoe o'lol nab xa xcajetic batel, ta xmajelane yu'un xyuc'benal nab ti barcoe, ta yeloval ic' oy. 25Ta sacubel xa talel un, xanav batel ta ba vo' ti Jesús ti bu oyique. 26Laj yilic ti yajchanc'optac ti ta xanav batel ta ba vo'e, avanic ta xi'el ti xi laj yalique: —Sbel banomil xa ma' le'e. 27Ti Jesuse xi laj yale: —Tsotsanic, mu xaxi'ic. Vu'unun. 28Xi albat yu'un ti Pedroe: —Mi vo'ote, Cajval, ta aventauc xanavcun batel ta ba vo' ta snupelot ta be ti bu oyote. 29—La' cha'e —xi ti Jesuse. Ti Pedroe yal ta barco, xanav batel ta ba vo' yo' chbat bu oy ti Jesuse. 30C'alal laj ya'i tsots xjumet ti iq'ue, lic xi'uc. Ti laj ya'i ta xa xmut'ij yalel ta vo'e, xi lic avanuque: —Coltaun, Cajval. 31Ti Jesuse ta ora no'ox ba snitbe ti sc'obe, xi laj yalbee: —Mu'yuc c'usi ach'unoj jutebuc, ¿c'u cha'al xana'et? 32C'alal ochic ta barcoe, ts'ij xi ti iq'ue. 33Va'i un, ti buch'u oyic ta barcoe lic squejan sbaic ta stojol ti Jesuse, ti xi laj yalbeique: —Ta melel vo'ot Xnich'onot ti Diose. 34Jelavic ta jot nab, c'otic ta Genesaret banomil. 35Ti jnaclejetic ti bu taje laj sna'ic ti ja' ti Jesuse. Laj spuquic ya'yejic ta sjunul ti slumalique. Laj yiq'uic talel ti jchameletic ta stojole. 36Laj sc'anbeic vocol ti ac'o yac' ta spiquel jutebuc sti'il ti sc'u'e. Scotol ti buch'utic laj sta ta picbel sti'il ti sc'u'e, colic.


Copyright
Learn More

will be added

X\