San Mateo 11

1C'alal laj yo'nton ti Jesús ta sbijubtasel ti lajcha'vo' yajchanc'optaque, loc' batel, bat chanubtasvanuc ta jujun jteclum ti bu taje. 2C'alal tiq'uil ta chuquel ti Juane, laj ya'ibe sc'oplal ti oy c'usi ta spas ti Cristoe. Jech o xal laj stac batel jun chib yajchanc'optac ta stojol Jesús. 3Xi c'ot sjac'beique: —¿Mi vo'ot la ti oy ono'ox sc'oplal ta xatale? ¿Mi ta to jmalacutic yan? 4Xi laj stac' ti Jesuse: —Batanic, ba albeic ya'i ti Juan ti c'usi ta xavilique, ti c'usi ta xava'iique. 5Chapbeic ya'i, ti ma'satetique jam xa ti satique. Ti coxovetique ta xanavic xa. Ti jc'a'emal-chameletique, pocbil tusbilic xa. Ti macal xchiquinique ta xa'iic xa c'oponel. Ti animaetique cha'cuxiic xa. Ti buch'u abol sbaique, yich'ic xa albel sc'oplal ti colebale. 6Yan yutsil ti buch'u mu stsic' yo'nton ta jtojole. 7C'alal loq'uic batele, ti Jesuse xi lic yalbe ya'iic sc'oplal Juan ti jnaclejetique: —¿C'usi ay aq'uelic ta xocol banomil? ¿Mi jun aj ti xla'et ta iq'ue? 8Mi ma'uque, ¿c'usi ay aq'uelic? ¿Mi ay aq'uelic jun vinic ti jun yutsil sc'u'e? Xana'ic lec, ti buch'u jun yutsiquil sc'u' sna' slapique, ta sna ajvaliletic ta tael. 9Ti xcaltic une, ¿c'usi ay aq'uelic ta melel? ¿Mi ja' jun j'alc'op? Melel, ay aq'uelic ti x'ech' to sc'oplal jech c'u cha'al junuc j'alc'ope. 10Ti Juane, ja' jun ti oy bu xi ta x'albat sc'oplal ta ch'ul c'ope: ‘Ta jtac jelavel caj'abtel ta atojol yo' ta smeltsanbot abe.’ 11Ta xcalboxuc ava'iic ta melel, ja' no'ox stuc Juan j'ac'-ich'-vo' xjelav to cajal ti sc'oplale, ja' mu sta jech sc'oplal ti yane. Manchuc mi jech un, ti buch'u slajeb xa peq'uel sc'oplal ti bu ventainel yu'un ti Diose, x'ech' to cajal sc'oplal, ja' mu sta ti Juane. 12“Ti c'uxi ora vul ta loq'uel ti Juan j'ac'-ich'-vo'e, jech to tana li'e, tsots ta xich' ilbajinel ti ventainel yu'un ti Diose. Ti buch'u tsots sjol yo'ntonique, yo'ntonuc xa ya'iic sc'an scontrainic ta persa ti ventainel yu'un ti Diose. 13Scotol ti c'u s'elan laj scaj'alic ti j'alc'opetique, xchi'uc ti oy c'usi tsots sc'oplal albil yu'un ti Moisese, laj yalbeic ono'ox sc'oplal ti ventainele, ja' to vinaj lec ti c'uxi vul ta loq'uel ti Juane. 14Mu xac'an xach'unic, ti Juane, ja' ti j'alc'op Elías ti oy ono'ox sc'oplal ta xtale. 15Ti buch'u xchiquintaj yu'une, ac'o ya'i lec. 16“¿C'u s'elan ta jco'oltas ti jnaclejetic tana li'e? Co'ol s'elan ololetic ta xtajinic ta ch'ivit ti xi ta xavta ti yan xchi'ilique: 17‘Laj coq'uisancutic ti amae, ti vo'oxuque mu'yuc xa'ac'otajic. Xme'inaj xa liq'uejincutic, mu'yuc xa'oq'uic.’ 18Tal ti Juane ti mu sna' xve' yuch' vo'e, ta xavalic ti ventainbil yu'un ti pucuje. 19Lital ec un, ti vu'un co'ol j'elantic ti jna' xive' xcuch' vo'e, ta xavalic ti yan sba xive' xcuch' vo'e, ti lec xquil jbacutic xchi'uc ti jsa'muliletique xchi'uc ti jc'an-patan-taq'uinetic sventa Romae. Ta sventa sbijil ti Diose, ta xvinaj ti c'u s'elan ta xc'ot ta pasele.” 20Va'i un, ti Jesuse laj sjajanta ti jteclumetic ti bu xjelav to laj yac' iluc ti c'usi ch'ayal ta xc'ot o'ntonal yu'une. Yu'un ti jnaclejetic taje, mu sutic talel ta stojol ti Diose. Xi laj yalilan ti Jesuse: 21—Mu cha'beluc un, jteclum Corazín. Mu cha'beluc un, jteclum Betsaida. Ati lajuc yilic ti jnaclejetic ta Tiro xchi'uc ta Sidón jteclum jech chac c'u cha'al ta xavilic avi li'e, vo'ne xa laj sutes sbaic ta stojolal Dios, laj slapic c'u'il sventa at o'ntonal, laj svijbe sbaic tan ti jechuque. 22Ta xcalboxuc ava'iic un, c'alal ta sta yorail ti chapanele, toj tsots ta xavich'ic ti tsitsele, ja' mu sta ta xich'ic ti buch'u nacajtic to ox ta Tiroe xchi'uc ta Sidón jteclume. 23Ti vo'ote, jteclum Capernaum, ¿mi anopoj ta xavich' toyesbel ac'oplal c'alal to vinajel? ¡Bu xata! ten jip xa'ute yalel ti bu xa c'alal spajeb snatil ti xabe. Ati lajuc yilic ti jnaclejetic ta Sodoma jteclum ti c'usi ch'ayal ta xc'ot o'ntonal yu'un jech c'u cha'al ta xavilic tana li'e, staoj to yav va'al ti jteclum jechuque. 24Ta xcalboxuc ava'iic ta melel, c'alal ta sta sc'ac'alil ti chapanele, x'ech' to ta xavich'ic tsitsel, ja' mu sta ta xich'ic tsitsel ti buch'utic nacajtic to ox ta Sodoma jteclume.” 25Ti jech yorail taje, xi laj yal ti Jesuse: —Tot, Cajvalot, ta jlequil-c'oponot, Yajval vinajel banomil, mu'yuc laj avac'be sna' scoltael ti buch'utic bij ta xa'ibe xchiquinal ti yalojique. Ja' no'ox laj avac'be sna' scoltael ti buch'utic laj spas sbaic ta olole. 26Jechuc, Tot, yu'un jech c'ot ta nopel avu'un. 27“Ti jTote laj xa yac'bun ta coc ta jc'ob scotol ti c'usitic oye. J'ech'el mu'yuc buch'u xojtiquinic ti Nich'onile, ja' no'ox x'ojtiquine yu'un ti Totile. J'ech'el mu'yuc buch'u xojtiquin ti Totile, ja' no'ox x'ojtiquine yu'un ti Nich'onile. Ta xojtiquinic ti Jtote, ti buch'u ta jc'an ta xcac'be yojtiquine. 28La' cuxo avo'ntonic ta jtojol ti vo'oxuc toj lubemoxuc yu'un ti avabtelique, yu'un ti avicatsique. 29Ac'o abaic ta ventainel ta jtojol. Chanbeicun co'nton. Mu jna' jtoy jba, manxuun. Mi jech ta xapasique, ta xataic ti xcuxobil avo'ntonique. 30Ti laj calboxuc ti ta xavac' abaic ta ventainel ta jtojole, mu tsotsuc ta ch'unel. Ti c'usi ta jc'an ta xapasique, mu vocoluc ta pasel.”


Copyright
Learn More

will be added

X\