San Mateo 10

1Ti Jesuse laj yic' talel lajcha'vo' yajchanc'optac. Laj yac'be yich' tsots yabtelic ta staquel loq'uel pucujetic xchi'uc ta scolesel chameletic ti c'usiuc no'ox ip c'ux ta xa'i ti jnaclejetique. 2Xi s'elan sbiic ti lajcha'vo' yajchanc'optaque: Ti Simone, Pedro ti yan sbie. Ti Andrese, xchi'il sbaic ta voq'uel xchi'uc ti Pedroe. Ti Jacoboe, ti Juane, xchi'il sbaic ta voq'uel ti ja' xnich'nabtac ti Zebedeoe. 3Ti Felipee Ti Bartolomee Ti Tomase Ti Mateoe, ti jc'an-patan-taq'uin to ox sventa Romae. Ti Jacoboe, xnich'on ti Alfeoe. Ti Lebeoe, Tadeo ti yan sbi xtoque. 4Ti Simone, ti ja' jun cananeoe. Ti Judas Iscariotee, ti buch'u laj yac' ta c'abal ti Jesuse. 5Ti Jesuse xi laj yalbe ti lajcha'vo' yajchanc'optac ti c'alal laj stac batele: —Mu xabatic ta stojol ti jyanlumetique. Mi ja'uc xa'ochic batel ta jteclumetic ti oy ta Samaria banomile. 6Ja' lec, batanic ta stojol ti israeletic ti co'ol s'elan jch'ayel chijetique. 7Ba albo ya'iic ti sta xa yorail ta xventainvan ti Diose. 8Colesic ti jchameletique. Cha'cuxesic ti animaetique. Colesic ti jc'a'emal-chameletique. Taquic loq'uel ti pucujetique. Moton laj cac'boxuc ti jech xu' avu'unique. Mu xac'anbeic stojol. 9“Mu xavich' batel ataq'uinic. 10Mu xavich' batel anuti'ic. Jlic no'ox acoton xavich' batel. Mu xavich' batel anabte'ic. Mu xavich' batel cha'chop axonobic. Yu'un ti j'abteletique ta sta sve'el ti bu ta x'abtejique. 11“C'alal ta xac'otic ta muc' ta lume, mi ta biq'uit lume, sa'ic batel ti buch'utic ta sjunul yo'nton ta xic'ot ochel ta snae. Comanic ti bu taje ja' to mi lic anopic ta xaloq'uic batele. 12C'alal ta xa'ochic batel ta snae, ‘tal cac'boxuc spatobil avo'ntonic’, chianic. 13Mi ta xac' ta venta ti jech ta xavalique, ac'beic comel ti spatobil yo'ntonique. Mi mu lecuc ta xa'iique, mu xavac'beic comel. 14Mi mu xayich'ic ta muq'ue, mi mu xich'ic ta muc' ti spatobil yo'ntonique, loc'anic batel ti ta snae, ti ta steclumalique. Lilinic comel ti spucuquil axonobique. 15Melel ta xcalboxuc ava'iic, c'alal ta sta yorail ti chapanele, ech'em tsots tsitsel ta xich'ic, ja' mu sta ti buch'utic nacajtic to ox ta Sodomae xchi'uc ti ta Gomorra jteclume., 16“A'yio ava'iic, co'ol a'elanic jech c'u cha'al chij ta jtacoxuc batel ta stojol ti jti'vanej-oq'uiletique. Bijanic ec un, jechuc abijilic jech c'u cha'al ti jti'vanej-chone. Ti atalelic une, jechuc jech c'u cha'al ti palomae. 17Bijanic, yu'un ti jnaclejetique chba yac'oxuc ta yoc ta sc'ob ti jchapanvanejetique. Ta xavich'ic majel ta jujun ch'ul na. 18Ta jventa, ta xa'iq'ueic batel ta stojol ti ajvaliletique xchi'uc ti banquilal ajvaliletique. C'alal oyoxuc ta stojole xchi'uc ta stojol ti buch'u yan yajvalique, ja' to xu' ta xavalic ti jc'oplale. 19C'alal ta xavich'ic aq'uel bal ta stojol ti jchapanvanejetique, mu xavul avo'ntonic c'u s'elan ta xavalic. C'alal ta sta yorail ta xac'opojique, Dios ta xac'boxuc ana'ic c'u s'elan ta xavalic. 20Yu'un ja' coltabiloxuc yu'un Xch'ul Espíritu ti Jtotique, ma'uc vo'oxuc ta xac'opojic. 21“Oy bu ta xac' sbaic ta milel yits'in sbanquil sbaic no'ox. Ti totil me'ile ta xaq'uic ta milel ti yalab xnich'nabique. Ti alab nich'nabiletique ta scontrainic ti stot sme'ique. 22Ta jventa, scotolic contra ta xayiloxuc. Ti buch'u mu'yuc xchibaje, ti staoj o yav yo'nton xcham xlaje, ta xcol. 23C'alal ta xavich'ic ilbajinel ta jun lume, jatavanic batel ta yan lum. Melel ta xcalboxuc ava'iic, mu to xlaj avu'unic ta xaniel ti jujun jteclumetic li' ta Israel c'alal ta xicha'sut talel ti vu'un co'ol j'elantique. 24Ti jun jchanc'ope, mu xanopic ti x'ech' to ich'bil ta muq'ue, ti ja' mu sta ti yajchanubtasvaneje. Mu xanopic ti x'ech' to ich'bil ta muc' ti jun mosovile, ti ja' mu sta ti yajvale. 25Ti jchanc'ope, spatuc yo'nton ti jech sc'oplal jech c'u cha'al ti jchanubtasvanej yu'une. Ti mosovile, spatuc yo'nton ti jech sc'oplal jech c'u cha'al ti yajvale. Mi ta x'albat Beelzebu banquilal pucuj ti yajval nae, ¿mi mu jechuc ta x'albat ti xnich'nabe? 26“Jech o xal un, mu xaxi'ic yu'un ti buch'uuc no'oxe. Mu'yuc c'usi jtosucal mucul ta xcom, ta xvinaj ono'ox. 27Scotol ti c'usi ta xcalboxuc mu xvinaj lec ti smelol avie, alic ti c'alal ta xlic ava'iic ti smelole. Ti c'usi laj ava'iique, avananic ta sjol anaic yo' ta xa'iic ti buch'uuc no'oxe. 28Mu xaxi'ic yu'un ti buch'u ta xasmiloxuque, yu'un ti ach'ulelique mu xu' ta sta ta milel. Ja' xi'taic ti Diose ti xu' ta smilote, ti xu' ta stac batel ta lajebal ti ach'ulelique. 29“¿Mi mu ta jsepuc no'ox uni taq'uin ta xich' chonel cha'cot uni mut? Mi mu ta xloc' ta ye ti Jtotic Diose, mi jcot ta xbaj ta lum. 30Ti jujubej stsatsal ajolic ti vo'oxuque, sventainoj, atbil yu'un ti Diose. 31Jech o xal mu xaxi'ic, ep atojolic ti vo'oxuque, ti ja' mu sta ti mutetique. 32“Buch'uuc no'ox ti jamal ta xalic ti ja' yu'unun ti Cristo ti xiic ta stojol ti jnaclejetique, ja' jechun ec jamal ta xcal, ja' cu'un le'e, xichi ta stojol ti Jtot ti oy ta vinajele. 33Yan ti buch'utic ta xalic ti ma'uc yu'unun ti Cristo ti xiic ta stojol ti jnaclejetique, ja' jechun ec, ma'uc cu'un le'e, xichi ta stojol ti Jtot ti oy ta vinajele. 34“Mu xanopic tal jco'oltasbe yo'nton ti jnaclejetic li' ta banomile. Ta jventa ta xlic scontrain sbaic. 35Ta sventa ti litale, mu jmojuc yo'ntonic ti totiletique, ti alab nich'nabiletique, ti me'iletique, ti me'alibaletique, ti alibaletique, contra ta xil sbaic. 36Yu'un yuts' yalal no'ox sbaic ta xlic scontrain sbaic. 37“Buch'uuc no'ox ti mu tsotsuc jc'oplal ta xiya'ie, ti ja' tsots sc'oplal ta xa'i ti stote, ti sme'e, laj to c'op ti ja' cu'une. Ja' jech xtoc ti buch'u ja' tsots sc'oplal ta xa'i ti xnich'nabe, laj to c'op ti ja' cu'une. 38Buch'uuc no'ox ti mu sc'an xich' svocol ta sts'aclielune, laj to c'op ti ja' cu'une. 39Ti buch'u ta spoj ya'i ti xcuxlejale, ta xch'ay ti xcuxlejale. Ja'uc ti buch'u ta xch'ay ti xcuxlejal ta jventae, ta sta ti xcuxlejale. 40“Buch'uuc no'ox ti ta xayich'ic ta muq'ue, ta xiyich'un ta muc' ec. Ti buch'utic ta xiyich'ic ta muq'ue, ta xich'ic ta muc' ti Buch'u laj stacun talele. 41Buch'uuc no'ox ti ta xich' ta muc' jun j'alc'op ti tacbil talel yu'un ti Diose, ta xich' smoton jech c'u cha'al ta xich' smoton ti jun j'alc'ope. Buch'uuc no'ox ti ta xich' ta muc' jun lequil vinique, ta xich' smoton jech c'u cha'al ta xich' smoton ti lequil vinique. 42Ta sventa ti sts'acliojun ti ma'uc cajal sc'oplale, buch'uuc no'ox ti ta xac'be jun vasu siquil vo' taje, melel unbi ta xich' ti smotone.”


Copyright
Learn More

will be added

X\