San Lucas 3

1Ta yo'lajunebal (15) xa ox sjabilal yochel ta banquilal ajvalilal ti Tiberio ta jteclum Romae, ja' o ochem ta its'inal ajvalil ta Judea ti Poncio Pilatoe. Ja' o ochem ta its'inal ajvalil ta Galilea ti Herodese. Ja' o ochem ta its'inal ajvalil ta Iturea xchi'uc ta Traconite ti Felipee, ti ja' yits'in ti Herodese. Ja' o ochem ta its'inal ajvalil ta Abilene ti Lisaniase. 2Ti ta jteclum Jerusalene, ja' o ochem ta banquilal paleetic ti Anase xchi'uc ti Caifase. Ti jech yorail taj une, ja' o c'oponat yu'un Dios ta xocol banomil ti Juan xnich'on ti pale Zacariase. 3Ti Juane ech' ta sjunul ti' uc'um Jordán bu oy ti jnaclejetique, ta yalbel ya'iic ti suticuc talel ta stojol ti Diose, xchi'uc ti yich'icuc vo' yo' ta xch'aybat smulic yu'un ti Diose. 4Taje, ja' c'ot ta pasel jech c'u cha'al xi laj sts'iba comel ti j'alc'op Isaiase: “Oy buch'u tsots ta xc'opoj ta xocol banomil ti xi ta xale: ‘Jambeic tuq'uil be ti Cajvaltique. Meltsanbeic lec sbe. 5Scotol ti jemeltique ta xich' nojesel. Scotol ti bu slomol spulul ti vitsetique ta xich' pasel ta parejo. Scotol ti beetic ti bu xotajtique ta xich' tuq'uibtasel. Scotol ti be ti bu lomajtique ta xich' pasel ta parejo. 6Scotol banomil ta xilic ti colel pojel ta xac' talel ti Diose.’ ” 7C'alal ta xloq'uic batel yo' ta xich'ic vo' yu'un ti Juane, xi ta x'albatique: —Xnich'nab jti'oval chon, ¿buch'u laj yalboxuc ava'iic yo' ta xapoj abaic yu'un ti tsots tsitsel nopol xa xtal ta atojolique? 8Vinajuc ta j'ech'el ti oyuc slequil yutsil ti c'usi ta xapasique, ti sutemoxuc xa talel ta stojol ti Diose, ti ma'uc no'ox ti xi ta xavalique: ‘Ti vu'uncutique snitiluluncutic Abraham.’ Ta xcalboxuc ava'iic, ti tonetic li'e xu' ta xjoybij ta snitilul Abraham yu'un ti Diose. 9Yu'un chapal xa ma' ti yeq'uelal yo' ta xich' bojel xchi'uc yibel ti te'etique. Scotol te'etic ti bu mu lecuc ta xac' ti sate, ta xich' bojel, jip xi ochel ta c'oc'. 10Va'i un, ti jnaclejetic ta banomile xi laj sjac'beique: —¿C'usi sc'an ta jpascutic un cha'e? 11—Ti buch'u oy cha'lic ti sc'u'e, ac'o yac'be jlicuc ti buch'u ch'abal yu'une. Ti buch'u oy sve'ele, ac'o yac'be ti buch'u ch'abal yu'une —xi tac'batic yu'un ti Juane. 12Nopajic talel ec jun chib jc'an-patan-taq'uinetic sventa Roma, ti sc'an ta xich'ic ya'iic vo'e, xi laj sjac'beic ti Juane: —Jchanubtasvanej, ¿c'usi sc'an ta jpascutic ec? 13Xi tac'batic yu'un ti Juane: —Ja' no'ox stsobic ti patan c'u yepal ta xal ti mantale. 14Xi jac'bat yu'un jun chib soldado ti Juane: —Ti vu'uncutique, ¿c'usi sc'an ta jpascutic? Xi tac'batic yu'un ti Juane: —Mu xasibtasvanic, mu xajutbeic smul ti buch'u mu'yuc c'usi spasoje. Mu xapojbeic ti c'usi oy yu'unique. Paso ta jun avo'ntonic ti c'u yepal ta xavich'ic atojolique. 15Scotol ti jnaclejetique lec ta xa'iic. Ta snopic, ti Juan le'e ja' van ti Cristoe. 16Ja'uc ti Juane xi laj yalbe ya'i scotolique: —Ta melel, vo' no'ox ta xcac' avich'ic ti vu'une. Ja'uc ti Buch'u ta to xtale, ta xac'boxuc avich'ic ti Ch'ul Espíritu ti co'ol s'elan c'oq'ue. X'ech' to xu' yu'un, ja' mu sta ti vu'une, yu'un mu xic'ot o ta sjitunbel ti yaq'uil xonobe, yu'un mu'yuc jlequilal cutsilal ta stojol. 17Yu'un stsacoj xa ti yic'aobil strigoe yo' ta st'ujbe loq'uel ti sc'a'epale. Ta sq'uej ta yavil ti trigoe. Ti sc'a'epale ta xchic' ta c'oc' ti bu mu xtube. 18Ja' Jech c'opetic laj yal. Oy yan ti c'u s'elan sbijubtasvane ti laj sliques ta yalel ach' ti Juan ta stojol ti jnaclejetique. 19Ja' jech xtoc, tsots laj svul ti ajvalil Herodes ta scoj yic'oj jun ants Herodías sbie, yajnil ti Felipe, ti ja' yits'ine, xchi'uc yan ti c'usi chopol laj xa spase. 20Ti me'inem xa xa'i ti Herodes ta spasel ti chopole, xi to s'elan yan laj spase: laj stic' ta chuquel ti Juane. 21C'alal ti Juan ta xac'be yich' vo' ti jnaclejetique, oy bu c'ot ta pasel ti laj yich' vo' ec ti Jesuse. C'alal yacal ta xc'opoj xti'ine, jam ti vinajele. 22Yal talel ta vinajel ti Ch'ul Espíritu ta stojol ti Jesuse jech c'u cha'al junuc paloma xvinaj, xchi'uc oy Buch'u vinaj sc'opojel ta vinajel ti xi ta xale: —Vo'ot ti jc'uxubinbil Nich'one, ximuyubaj xa ta atojol. 23- 38Yich'oj nan lajuneb xcha'vinic (30) jabil c'alal lic stsac yabtel ti Jesuse, xnich'on José ti yalojique. Ti Josee, Eli sbi ti stote. Ti Elie, Matat sbi ti stote. Ti Matate, Leví sbi ti stote. Ti Levie, Melqui sbi ti stote. Ti Melquie, Janaie sbi ti stote. Ti Janaie, José sbi ti stote. Ti Josee, Matatías sbi ti stote. Ti Matatiase, Amós sbi ti stote. Ti Amose, Nahúm sbi ti stote. Ti Nahume, Esli sbi ti stote. Ti Eslie, Nagai sbi ti stote. Ti Nagaie, Máhat sbi ti stote. Ti Mahate, Matatías sbi ti stote. Ti Matatiase, Semei sbi ti stote. Ti Semeie, Josec sbi ti stote. Ti Joseque, Joiadá sbi ti stote. Ti Joiadae, Johanán sbi ti stote. Ti Johanae, Resá sbi ti stote. Ti Resae, Zorobabel sbi ti stote. Ti Zorobabele, Salatiel sbi ti stote. Ti Salatiele, Nerí sbi ti stote. Ti Nerie, Melquí sbi ti stote. Ti Melquie, Adí sbi ti stote. Ti Adie, Cosam sbi ti stote. Ti Cosame, Elmadam sbi ti stote. Ti Elmadame, Er sbi ti stote. Ti Ere, Josue sbi ti stote. Ti Josuee, Eliezer sbi ti stote. Ti Eliezere, Jorim sbi ti stote. Ti Jorime, Matat sbi ti stote. Ti Matate, Leví sbi ti stote. Ti Levie, Simeón sbi ti stote. Ti Simeone, Judá sbi ti stote. Ti Judae, José sbi ti stote. Ti Josee, Jonam sbi ti stote. Ti Joname, Eliaquim sbi ti stote. Ti Eliaquime, Meleá sbi ti stote. Ti Meleae, Mená sbi ti stote. Ti Menae, Matatá sbi ti stote. Ti Matatae, Natán sbi ti stote. Ti Natane, David sbi ti stote. Ti Davide, Isaí sbi ti stote. Ti Isaie, Obed sbi ti stote. Ti Obede, Booz sbi ti stote. Ti Booze, Sélah sbi ti stote. Ti Sélahe, Nahasón sbi ti stote. Ti Nahasone, Aminadab sbi ti stote. Ti Aminadabe, Admín sbi ti stote. Ti Admine, Arní sbi ti stote. Ti Arnie, Hesrón sbi ti stote. Ti Hesrone, Fares sbi ti stote. Ti Farese, Judá sbi ti stote. Ti Judae, Jacob sbi ti stote. Ti Jacobe, Isaac sbi ti stote. Ti Isaaque, Abraham sbi ti stote. Ti Abrahame, Térah sbi ti stote. Ti Terahe, Nahor sbi ti stote. Ti Nahore, Serug sbi ti stote. Ti Seruge, Ragau sbi ti stote. Ti Ragaue, Péleg sbi ti stote. Ti Pélege, Éber sbi ti stote. Ti Ébere, Sélah sbi ti stote. Ti Selahe, Cainán sbi ti stote. Ti Cainane, Arfaxad sbi ti stote. Ti Arfaxade, Sem sbi ti stote. Ti Seme, Noé sbi ti stote. Ti Noee, Lámec sbi ti stote. Ti Lameque, Matusalén sbi ti stote. Ti Matusalene, Enoc sbi ti stote. Ti Enoque, Jéred sbi ti stote. Ti Jérede, Mahalaleel sbi ti stote. Ti Mahalaleele, Cainán sbi ti stote. Ti Cainane, Enós sbi ti stote. Ti Enose, Set sbi ti stote. Ti Sete, Adán sbi ti stote. Ti Adane, ja' xnich'on ti Diose.


Copyright
Learn More

will be added

X\