San Lucas 24

1Sob xa ta sliquebal c'ac'al yu'un ti xemunae, ti antsetique cha'sutic batel ta muquinal, yich'ojic batel ti muil poxil ti xchapanojic xa ono'oxe. 2C'alal c'otique, laj yilic ti mu xa jechuc laj staic ti muc' ta ton smac sti' ti muquinale. 3Ochic batel, ja'uc le' une, mu'yuc xa laj stabeic sbec'tal ti Cajvaltic Jesús ti bu taje. 4Mu stac' a'yeluc ta xa'iic c'usi xu' ta spasic yu'un taje. Ta jech yepal un, laj yilic oy buch'u cha'vo' va'al ta sts'elic ti xlablun no'ox xojobal ti sc'u'ique. 5Xi'ic ta j'ech'el. Laj snijan sbaic ta banomil. Xi albatic yu'un ti buch'ue: —¿C'u cha'al ta xasa'ic li' ta smuquinal animaetic ti Buch'u cuxul xae? 6Mu'yuc xa li' oye yu'un cha'cuxi xa. Ja' vuleso ta avo'ntonic ti jech ono'ox laj yalboxuc c'alal oy to ox ta Galilea banomile: 7‘Ti vu'un co'ol j'elantique ba'yel ta xi'aq'ue batel ta yoc ta sc'ob ti jsa'muliletique, ta xisjipanic ta curus, ta yoxibal c'ac'al un, ta xicha'cuxi.’ 8Ti antsetique, ja' o vul ta yo'ntonic ti jech ono'ox albatic yu'un ti Jesuse. 9C'alal laj yictaic comel ti muquinale, c'ot xchapbeic ya'i ti buluchvo' (11) jcholc'opetique xchi'uc ti yan ti c'u s'elan albatique. 10Ti buch'u yich'ojic batel ti lo'il a'yeje, ja'ic ti María Magdalenae, ti Juanae, ti María sme' ti Jacoboe, xchi'uc ti yan antsetique. 11Ja'uc ti jcholc'opetique, chuvaj c'op no'ox laj ya'iic. Mu'yuc laj yich'ic ta muc' ti c'u s'elan albat yu'un ti antsetique. 12Manchuc mi jech un, ti Pedroe bat ta anil c'alal to muquinal. Ti c'alal laj sq'uel ochele, c'ajomal no'ox laj yil ti saquil poq'ue. Elom no'ox ta xa'i ti c'alal sut batel ta nae. 13Ti jech c'ac'al taje, oy cha'vo' jchanc'opetic ta xanavic batel ta sbelal jteclum Emaús, ti oy nan oxib (3) reva xil sbaic xchi'uc ti Jerusalene. 14Ta slo'iltaic batel scotol ti c'usi c'ot ta pasele. 15C'alal yacal ta xlo'ilajic batele, ja' o nopaj talel ti Jesuse, ti jmoj laj xchi'in sbaic batel ta xanobale. 16Mi ja'uc laj yojtiquinic buch'u, yu'un co'ol s'elan macbil ti satique. 17Xi jac'batic yu'un ti Jesuse: —¿C'usi ti alo'ilic ta xavalic talel ta bee? ¿C'u cha'al ta xavat avo'ntonic? 18Xi laj yal ti jun ti sbiinoj Cleofase: —Ti uni j'ech'el-beote, ¿mi atuc xa no'ox mu'yuc ava'binoj ti c'usi c'ot ta pasel ta Jerusalén ti volje chabjee, ti c'alal sna'ic lec scotolique? 19Xi laj sjac' ti Jesuse: —¿C'usi c'ot ta pasel un? Ti stuquique xi laj yalique: —Ja' ti Jesús ti liquem talel ta Nazarete, ti ja' jun j'alc'op ti tsots xu' yu'une, ti toj lec chanubtasvan ta sba ta sat ti Diose, xchi'uc ta sba ta sat ti jnaclejetic ta banomile. 20Ti banquilal pale cu'uncutic une, xchi'uc ti jchapanvanejetique, laj yaq'uic ta sc'ob ti ajvalile yo' ta xich' milel ta curus. 21Jpatoj xa ox co'ntoncutic ta stojol ti ta xispojuncutic ti vu'uncutic israeluncutique. Le' une, oy xa ta yoxibal c'ac'al ti jech c'ot ta pasele. 22Ac'o mi oy jun chib antsetic, ti ja' jchi'ilcutique, laj sibtascutic, yu'un laj yalic ti ay sq'uelic ta muquinal ta sob ic'luman. 23Ti jech mu'yuc bu laj stabeic sbec'tal stacopal ti Jesuse, sut batel ta sna'ic. Laj yalic xtoc ti albatic yu'un anjeletic ti cuxul xae. 24Ts'acal to, jun chib jchi'ilcutic bat sq'uelic ti ta muquinale. Jech s'elan laj staic jech c'u cha'al laj yalic ti antsetique. Ja'uc le' une, mu'yuc laj yilic ti Jesuse —xi laj yalique. 25Xi laj yal ti Jesuse: —Mu xava'ibeic smelol, yu'un toj vocol ta xach'unic scotol ti c'usi laj yalic comel ti j'alc'opetique. 26¿Mi mu tsots sc'oplal ti ba'yel ta xich' svocol ti Cristo c'alal mu'yuc to ta xich' ti slequilale? 27Ta jech yepal lic yalbe sba sc'oplal stuc ti ts'ibabil ta ch'ul c'op ti oy ta jujupoc svuntac ti Moisese, ti xcholet laj yal batel ti c'ot c'alal to ta jujupoc svuntac ti c'usi laj sts'iba comel ti yan j'alc'opetique. 28C'alal c'otic ta jteclum ti bu ta xbatic ono'oxe, ti Jesuse jelavel xa ox ta xjelav ta spas sba yilel. 29Ja'uc ti stuquique laj stsatsal pajtsanic ti xi laj yalbeique: —Ja' lec coman li'e, yu'un bat xa ti c'ac'ale, ta jliquel ta x'ic'ub ti osile. Och batel ti Jesuse, com xchi'uc ti cha'vo'e. 30C'alal chotolic xa ta sts'el sti'il ti mexae, laj stsac ti pane. C'alal laj yalbe vocol ti Diose, laj xet' ti pane, laj yac'be jelavel. 31C'alal jech laj spase, ta jech yepal jam ti satique, ja' o laj yojtiquinic ja' ti Jesuse. Ja'uc ti Jesuse, sac ch'ay batel. 32Xi laj yalbe sbaique: —C'alal yacal ta xiyalbotic talel ta be smelol ti c'usi ts'ibabil ta ch'ul c'ope, ¿mi mu lajuc ca'itic ta co'ntonic ta melel ti jun yutsile? 33Mu xa malabaj laj ya'iic. Laj stam loq'uel sbeic. Sutic batel c'alal Jerusalén ti bu tsobol laj staic ti buluchvo' jcholc'opetique xchi'uc ti yan xchi'ilique. 34Xi laj yalic ti xchi'iltac tey tsobolique: —Ta melel, cha'cuxi ti Cajvaltique, yu'un laj yil ti Simone. 35Ja' jech ec ti cha'vo'ique, laj yalic slo'ilic ti c'u s'elan albatic ta bee, xchi'uc ti laj yojtiquinic ti Jesuse ti c'alal ja' o laj xet' ti pane. 36C'alal jech yacal ta xlo'ilajique, ja' o c'ot sva'an sba ti Jesús ta o'lol ti bu oyic ti xi albatique: —Junuc avo'ntonic. 37Toj xi'el c'otic, yu'un laj snopic ti xac'toicuc ja' jun ch'ulelal laj yilique. 38Xi laj yal ti Jesuse: —¿C'u cha'al ta xaxi'ic? ¿C'u cha'al xtal xbat ti avo'ntonique? 39Ja'uc ti jun ch'ulelale, mu'yuc sbec'tal sbaquil. Q'uel avilic ti jc'obe xchi'uc ti cacane, jech ono'ox ti c'u s'elane. Pico ava'i, q'uelic lec. Jtaoj cav ti c'u j'elan jech c'u cha'al ta xavilique. 40C'alal jech laj yale, laj yac' iluc ti sc'obe, ti yacane. 41Ti jech batem yo'ntonic yu'un ti muyubajele, xchi'uc ti elom ta xa'iique, mu to ta xc'ot lec ta yo'ntonic ta xch'unel. Ja' yu'un un, xi jac'batic yu'un ti Jesuse: —¿Mi oy c'usi jutebuc jlajestic? 42Laj yac'beic juteb uni vobil choy xchi'uc juteb ajapom. 43Laj stsac ti Jesuse, ta sba ta satic laj slajes. 44Ts'acal to un, xi laj yale: —Ti c'usi c'ot ta pasel ta jtojole, ja' jech c'u cha'al ti xi laj calboxuc ava'iic c'alal jchi'inojoxuc to oxe, ti tsots sc'oplal ta xc'ot ta jtojol jech c'u cha'al ts'ibabil ti oy c'usi tsots sc'oplal albil yu'un ti Moisese, xchi'uc ti ts'ibabil ta jujupoc vunetic yu'un ti yan j'alc'opetique, xchi'uc ti ts'ibabil ta Salmoe. 45Va'i un, laj sjambe smelol yo' ta xa'iic ti c'u s'elan ts'ibabil ta ch'ul c'ope. 46Xi laj yal ti Jesuse: —Yu'un ts'ibabil sc'oplal ta xcham ti Cristoe, xchi'uc ti ta xcha'cuxi ta yoxibal c'ac'ale. 47Ts'ibabil no'ox xtoc, ti ja' ta jventa licuc ba'yel li' ta Jerusalene, ti xcholetuc yich'uc alanbel ya'i scotol ti muc'tiquil lumetic ti oy ta sbejel banomile, ti ac'o suticuc talel ta stojol ti Diose, yo' jech ta staic ti ch'aybil ta xc'ot ti smul scolo'ique. 48Rexticooxuc ti jech c'ot xa ta pasele. 49Ja'uc le' une, malaic li' ta jteclume, yu'un ta jtacboxuc talel ta atojolic ti oy c'usi yaloj ti Jtot ta xaq'ue. Ja' to xaloq'uic batel li' ta jteclum Jerusalén mi laj xa avich'ic ti amuc'ul atsatsalic ti ta xlic talel ta vinajele. 50Laj taj une, laj yic' loq'uel ti yajchanc'optac ta jteclum Jerusalene, bat xchi'uc ta Betania. C'alal oyic xa ti bu taje, laj stoy sc'ob ta sc'anbel ti slequil yutsilalique. 51C'alal jech laj sc'anbe ti yich'icuc ti slequil yutsilalique, ja' o laj xch'ac sba loq'uel ta stojolic, iq'ue muyel ta vinajel. 52Va'i un, c'alal laj yo'ntonic ta yich'el ta muq'ue, xmuyubajic xa sutic batel ta Jerusalén. 53Scotol c'ac'al ta xc'otic ta ch'ulna ta slequil-c'optael ti Diose. Jechuc.


Copyrighted Material
Learn More

will be added

X\