San Lucas 2

1C'alal ja' o tiq'uil ta banquilal ajvalil ti Augusto Cesare, laj yal mantal ti ac'o yich' bejanbel ta vun sbiic scotol ti jnaclejetic oy ta banomile. 2Sba to lic ti tsacob-biil taje, ja' o c'ot ta pasel c'alal tiq'uil ta its'inal ajvalil Quirinio ti liquem talel ta Siria banomile. 3Scotolic tsots sc'oplal chba yac' ta tsaquel sbiic ti bu oy ti steclumalique. 4Ti jech taje, ti Josee loc' batel ta jteclum Nazaret ti oy ta Galilea, bat ta jteclum Belén bu voc' ti ajvalil David ti oy ta Judeae, yu'un ti Josee ja' snitilul ti Davide. 5Ti jech chapal sc'oplal ta xic' sbaique, bat yac' ta tsaquel sbiic xchi'uc ti María ti xchi'inoj xa yole. 6C'ot ta pasel c'alal oyic ta jteclum Belene, ja' o sta sc'ac'alil ta xvoc' yol ti Mariae. 7Ti bu taje, voc' ti sba yole. Laj svol ta uni poc', laj xpuch'an ta yav sve'eb vacax, ja' ti mu'yuc xocol laj staic ta ch'amunel ti nae. 8Nopol ta Belén oy jun chib jq'uel-chijetic ti ta x'ech' yu'unic ac'ubal ta xchabiel xchijic ta osiltique. 9Ta jech yepal un, laj yac' sba iluc ta stojolic jun yaj'ánjel ti Cajvaltique, ti joyobtabil c'otic ta yutsilal xojobal ti Cajvaltique. Ep xi'ic ta j'ech'el. 10Ja'uc le'e, xi albatic yu'un ti anjele: —Mu xaxi'ic, yu'un oy c'usi ach' tal calboxuc ava'iic ti xi s'elan ta sta smuyubajel yo'nton scotolique: 11Avi tana li'e, voc' xa jun Jcoltavanej avu'unic ta steclumal David, ja' ti Ajvalil Cristoe. 12Ti senyail ta xataic ti nene' olole, volbil ta poc', puch'ul ta sve'eb vacax. 13Ta jech yepal vul ta loq'uel yan anjeletic ta vinajel ta stojol ti jun anjele ta yalbel slequilal Dios ti xi ta xalique: 14“Mu albajuc yutsilal slequilal ti Dios oy ta vinajele. Yu'un ti jnaclejetic ti oyic ta banomile, laj xa staic ti lec x'ileic yu'une, ja' ti buch'utic jun yo'nton oyic ta stojole.” 15C'alal sut batel ta vinajel ti anjeletique, jech ti jchabiej-chijetique xi lic yalbe sbaic ta jujun tale: —Batic ta Belén un cha'e, ba jq'ueltic ti c'usi c'ot ta pasele jech c'u cha'al laj yalbotic ti Cajvaltique. 16Batic ta anil, c'otic bu oy ti Mariae, ti Josee xchi'uc ti nene' olol puch'ul ta yavil sve'eb vacaxe. 17C'alal laj yilique, lic xchapeic ya'i c'u s'elan albatic yu'un ánjel sc'oplal ti nene' olole. 18Scotol ti buch'u laj ya'iic c'u s'elan ta xalic ti jq'uel-chijetique, ch'ayal c'ot yo'ntonic. 19Ja'uc ti Mariae, mu xch'ay ta yo'nton, ta snopilan c'usi smelol ti va'i s'elan taje. 20Jech ti jq'uel-chijetique, xmuyubajic xa, sutic batel, ta xalbeic xa yutsilal slequilal Dios ti jech laj yilic scotol jech c'u cha'al laj ya'iique, xchi'uc ti c'u s'elan albatique. 21C'alal yich'oj xa svaxaquibal (8) c'ac'al ti olole, laj yac'beic yich' circuncisión. Jesús laj yac'beic sbi jech c'u cha'al albat ti María yu'un ti ánjel c'alal mu'yuc to ox xchi'uque. 22C'alal c'ot sc'ac'alil ta stus ta spoc sbaic jech c'u cha'al ta xal smantal ti Moisese, laj yiq'uic batel c'alal to jteclum Jerusalén ti olole yo' ta xac'beic sventain ti Cajvaltic Diose. 23Jech laj spasic taje, yu'un ti oy c'usi tsots sc'oplal albil yu'un ti Dios ti xi ts'ibabile: “Scotol ti ba olol querem ta xvoq'ue, ventainbil ta xc'ot yu'un ti Diose.” 24Batic un, bat yaq'uic milbil matanal jech c'u cha'al yaloj ti oy c'usi tsots sc'oplal albil yu'un Dios ti xi ts'ibabile: “Ac'o yich'icuc batel cha'cot toltora, mi mo'oje, cha'cot paloma.” 25Ti jech sc'ac'alil taje, oy jun vinic ventainbil yu'un ti Ch'ul Espíritu ti nacal ta Jerusalén, ti sbiinoj Simeone, ti oy slequil yutsil ti yich'oj ta muc' ti Diose, xchi'uc ti smalaoj spojel scoltael ti israeletique. 26Ac'bil sna' ti mu'yuc to ta xcham mi mu ta xilbe sat ti Cristo ti ta xtaque talel yu'un ti Diose. 27Ac'bat sna' yu'un Ch'ul Espíritu ti Simeone, ti batuc ta ch'ulnae. C'alal ja' o ic'bil batel ta ch'ulna yu'un stot sme' ti Jesús yo' ta spasic jech c'u cha'al ta xal ti oy c'usi tsots albil sc'oplale, 28ti Simeone pet xut ti olole, ti xlequil-c'opoj xa ta stojol Dios ti xi laj yale: 29“Cajval, junuc xa avo'nton, ic'un un, xu' xa xicham, yu'un c'ot xa ta pasel avu'un ti oy c'usi laj avalbe ti avajtunele. 30Yu'un laj xa quil ta jba ta jsat ti pojel coltael avu'une 31ti c'ot ta pasel ta stojol scotol ti jnaclejetic ta banomile. 32Ja' saquilal osil banomil yu'unic ti muc'tiquil lum ma'uc Israele, xchi'uc ja' yich'el ta muc' ti israeletic ti ja' anich'nabe.” 33Ti Josee xchi'uc sme' ti Jesuse toj elom no'ox laj ya'iic ti va'i s'elan laj yal ti Simeón ta stojol ti olole. 34Va'i un, ti lequilal oy yu'un ti Simeone laj yac'be yich' ti olole, ti xi laj yalbe ya'i ti María, sme' ti Jesuse: —A'yio ava'i, ti olol li'e yich'oj talel ti yepal no'ox ta xbajic yu'un ti israeletique mi ta stamel sbaic liquel ta stael ti coltael yu'une. Ta xvinaj ti yepal mu xich'ic ta muq'ue, 35yo' yepal no'ox ta svinajesbat c'u s'elan ta snop ta yo'nton ti ta jujun tale. Jech xtoc, co'ol to s'elan jun cuchilu ta xti'van yipal ta avo'nton ta xava'i ti vo'ot une. 36Ti bu taje, oy jun ants, Ana sbi, ti yayil xae, ti oy ta stojol ta yalel ti c'usi ta x'ac'bat sna' yu'un ti Diose, ti ja' yantsil nich'on ti Penuele, snitilul ti Aser sbie. Tseb to ox ti malije, ja' no'ox vucub (7) jabil laj yic' sbaic xchi'uc ti smalale. 37Oy xa ta chanib yo'vinic (84) jabil ti comem ta me'onal antse. J'ech'el mu xicta comel ti ch'ulnae, yu'un ta xicta yot, xchi'uc c'ac'al ac'ubal ta xc'opoj xti'in ta yich'el ta muc' ti Diose. 38Ja' o c'ot ti Anae, laj yalbe coliyal ti Diose, xchi'uc ta xalbe sc'oplal ti nene' Jesús ta stojol scotol ti buch'utic ta smalaic spojel scolelic ti oy ta Jerusalene. 39C'alal laj spasic scotol c'usi ta xal ti oy c'usi tsots sc'oplal albil yu'un ti Diose, ts'acal to un, sutic batel ta steclumalic Nazaret ti oy ta Galilea banomile. 40Lec tsots, bij ta xch'i talel ti olole yu'un sva'anoj sba stuc ti Dios ta stojolale. 41Stot sme' ti Jesuse stalelic ono'ox ta xbatic ta q'uin Colel jujun jabil ta Jerusalén. 42C'alal yich'oj xa lajcheb (12) jabil ti Jesuse, jmoj batic ta Jerusalén xchi'uc ti stot sme'e yu'un stalelic jech ta xbatic ta q'uin. 43C'alal laj ti q'uine, sutic batel ta snaic. Ja'uc ti ch'in querem Jesuse, com ta Jerusalén, mu sna'ic ti stot sme'e. 44Laj snopic ti capal ech'el xchi'uc ti jxanviletique. Jun xa c'ac'al xanvilic un, lic sa'ic ta stojol ti yuts' yalalique xchi'uc ti buch'utic xojtiquinique. 45Ja'uc le' une, mu'yuc laj staic. Sutic ech'el ta Jerusalén ta sa'el. 46Ta yoxibal (3) to c'ac'al, oy ta ch'ulna laj staic ta sa'el, chotol xchi'uc ti jchanubtasvanejetic yu'un ti oy c'usi tsots albil sc'oplale, ta ya'yibel ti c'usi ta xale, xchi'uc oy c'usi ta sjac'olanbeic smelol xtoc. 47Scotol ti buch'u ta xa'i ti oy sbijil ti c'u s'elan ta stac' sutel ti c'ope, ch'ayal ta xc'ot yo'nton yu'un. 48Ch'ayal c'ot yo'nton stot sme' c'alal laj yilique, ti xi albat yu'un ti sme'e: —Cuni ol, ¿c'u cha'al jech laj apasbuncutic? Ti vu'un xchi'uc ti atote, mu xa juteb oyuncutic ta banomil ta sa'elot. 49Ti Jesuse xi laj staq'ue: —¿C'u cha'al ta xasa'icun? ¿Mi mu xana'ic ti ja' tsots sc'oplal ta xca'i ta jpasbe yabtel ti Jtote? 50Ti stot sme'e mu'yuc laj ya'ibeic smelol ti va'i s'elan laj yale. 51Va'i un, jmoj sutic batel ta Nazaret, ti lec ta xch'unbe smantal ti stot sme'e. Ja'uc ti sme'e, mu xch'ay ta yo'nton ti c'u s'elan albate. 52Yacal ta ch'iel ech'el ti Jesuse, oy sbijil. Sva'anoj sba ti Dios ta stojole. Lec x'ile yu'un ti jnaclejetic ta banomile.


Copyright
Learn More

will be added

X\