San Lucas 16

1Ti Jesuse xi laj yalbe ya'i yan babac'op ti yajchanc'optaque: —Oy jun jc'ulej vinic. Oy jun yajbainej abtel ti bat yalbe ya'i ti ajvalile ti ta x'ixtolanbat ti c'usitic oy yu'une. 2Ti ajvalile tavan ta iq'uel ti xi laj yalbee: ‘¿C'u cha'al jech ta xca'i ac'oplal taje? Chapanbun talel scotol ti c'usitic avich'oj ta aventae, yu'un mu xa xcac' abain ti c'usi x'ayan cu'une.’ 3Xi laj snop ti j'abtele: ‘¿C'usi xu' ta jpas? yu'un laj xa sjipun loq'uel ta yabtel ti ajvalile. Mu'yuc xa yipal cu'un ta yabtelanel ti banomile. Q'uexlal sba mi ta jc'an limoxnae. 4Laj xa jna' c'usi xu' ta jpas yo' oy xu' buch'u ta xiyiq'uic ochel ta yut snaic c'alal ch'abal xa ti cabtele.’ 5Va'i un, ti jbainej abtele ta jujun tal laj sta ta iq'uel ti buch'u oy yilic ta stojol ti ajvalile, ti xi laj sjac'be: ‘¿C'u yepal avil yu'un ti cajvale?’ 6Xi laj staq'ue: ‘Oy vo'vinic (100) ta bej barril aceite quil yu'un ti ajvalile.’ Xi laj yal ti jbainej abtele: ‘Li' oy svunal ti avile. Chotlan ta ora. Tsaco comel lajuneb yoxvinic (50) ta bej barril no'ox.’ 7Xi laj yalbe ti jun xtoque: ‘Ti vo'ote, ¿c'u yepal avil yu'un ti cajvale?’ Xi laj staq'ue: ‘Oy vo'vinic (100) ta bis trigo quil yu'un.’ Xi laj yal ti jbainej abtele: ‘Li' oy svunal avil. Ja' no'ox tsaco chanvinic (80) ta bis.’ 8Ti ajvalile laj yil ti ech'em sbijil ta sventa no'ox banomil ti chopol jbainej abtel ti sna' c'usi xut sba ti c'usi ta xtun yu'une. Yu'un ti li' ta banomile, oy sbijilic, sna'ic lec c'u s'elan ta scolta sbaic ta jujun tal yo' lec oyic. Ja' mu sta sbijilic ti buch'utic ti oyic ta saquilal osile. 9“Ta xcalboxuc ava'iic, tunesic ti c'usi oy avu'unic li' ta banomil ti sna' xlaje yo' jech ta xnopaj tal avu'unic ti yane. Yu'un c'alal ta xlaj sc'oplal ti c'usitic ta xatunesique, oy buch'u xmuyubaj xa ta xayic'oxuc ochel ta naclej sbatel osil. 10“Ti buch'u ta slequil yo'nton ta stunes ti c'usi juteb oy yu'une, ta slequil yo'nton xtoc ta stunes ti yepal c'usi oy yu'une. Ja'uc ti buch'u ma'uc ta slequil yo'nton ta stunes ti juteb c'usi oy yu'une, ja' jech xtoc unbi, ma'uc ta slequil yo'nton ta stunes ti c'usi yepal oy yu'une. 11Mi mu ta slequiluc avo'ntonic ta xatunesic ti c'usitic x'ayan avu'unic li' ta banomil ti sna' xlaje, ¿buch'u ta xac'boxuc aventainic ta tunesel ti bats'i c'ulejale? 12Mi mu ta slequiluc avo'ntonic ta xatunes ti ma'uc avu'unique, ¿buch'u ta xayac'boxuc avich'ic ti c'usi ja' avu'un atuquique? 13Mu'yuc buch'u stac' ta x'abtej ta stojol cha'vo' ajvalil. Jun lec ta xc'uxubij, jun mu lecuc ta xil. Jun lec ta x'abtej ta stojol, jun ta stoy sba ta stojol. Ja' jech ti vo'oxuque, mu xu' xavac' abaic ta tunel yu'un Dios c'alal mi ja' batem avo'ntonic ti taq'uine.” 14C'alal laj ya'i ti fariseoetic ti va'i s'elan laj yal ti Jesuse, lic slabanic yu'un batem yo'ntonic yu'un ti taq'uine. 15Ti Jesuse xi laj yalbee: —Ti vo'oxuque jun xa yutsil ta xapas abaic ta stojol ti buch'uuc no'oxe. Ti Diose yiloj avo'ntonic c'u s'elan. Na'o abaic un, ti c'usi xatoyet xchi'uc ta stojol ti buch'uuc no'oxe, mu lecuc ta xil ti Diose. 16“C'alal mu'yuc to ox ta xvul ta loq'uel ti Juane, oy xa ono'ox ti oy c'usi tsots albil sc'oplale, xchi'uc ti c'u s'elan chanubtasvan ti j'alc'opetique. Va'i un, ja' o lic talel ta yalel sc'oplal ti lequil c'op sventa ti ventainel yu'un ti Diose, ti scotolicuc yac'beic yipal ochicuc batele. 17“J'ech'el mu stac' ch'aybel sc'oplal ti oy c'usi tsots albile, ja' stac' no'ox tubbel sc'oplal ti vinajel banomile. 18“Mi ta sbaj sbaic xchi'uc yajnil ti jun vinique, mi ta xba yic' yan antse, ta sta smul. Ti buch'u ta xic' ti bajbilal antse, ta sta smul ec. 19“Oy jun jc'ulej vinic, jun yutsiquil ti sc'u' ta slape, ti jun yutsiquil ti sve'el ta slajese, ti jujun c'ac'al ta spas ti q'uine. 20Oy jun vinic xtoc abol sba, Lázaro ti sbie. Oy xchamel ti noj ta yayijemal ti sbec'tale. Xchotet ta sti' sna ti jc'uleje. 21Ti abol sba vinic taje, ta sc'an ta slajes ya'i ti c'usitic ta xbaj yalel ta sti'il xmexa ti jc'uleje. Ja' no'ox ta xtal lec'batuc ta ts'i'etic ti syayijemale. 22Ti buch'u abol sbae, sta sc'ac'alil cham, iq'ue batel yu'un anjeletic yo' chba xchi'in sbaic xchi'uc ti Abraham ti oy ta lequilale. Jech ti jc'uleje cham ec, laj yich' muquel. 23C'alal ta xich' svocol ti jc'ulej ti bu oy ti animaetique, laj stoy muyel sat, laj yil ta nom ti Abrahame xchi'uc ti Lazaroe. 24Xi lic avanuc ti jc'ulej vinique: ‘Totic Abraham, ich'un ta c'ux. Albo ya'i ti Lazaroe ti ac'o sts'aj talel jutebuc sni' sc'ob ta vo', yo' xtal sicubtasbun ti coq'ue, yu'un ta xquich' ep vocol li' ta c'oq'ue.’ 25Xi tac'bat yu'un ti Abrahame: ‘Nich'on, vuleso ta avo'nton ti c'alal oyot to ox ta sba banomile, laj avac'be aba scotol ti c'usi ta sc'an ti avo'ntone. Ja'uc ti Lázaro li'e, toj abol sba ech' ta sba banomil. Avi tana ti stuc li'e, mu'yuc xa c'usi xal yo'nton, laj xa sta ti lequilale. Ja'uc ti vo'ote, ta xavich' avocol. 26Ma'uc no'ox le'e, yu'un oy jun muc' ta liquil ch'en ta o'lol cu'untic. Ti xcaltic une, mi oy buch'u ta sc'an ta xjelav batel ti bu oyote, mu xu'. Mi oy buch'u ta sc'an ta xjelav talel ti bu oyuncutique, mu xu'.’ 27“Xi laj yal ti jc'uleje: ‘Ch'ul abolajan, Totic Abraham, taco batel ti Lázaro ta sna ti jtote, 28yu'un oy vo'ob jchi'il ta voq'uel. Ta jc'an ac'o ba yalbe ya'i yo' mu xtalic li' ti bu tsots ti vocole.’ 29Xi laj yal ti Abrahame: ‘Oy ta sc'obic ti c'usitic ts'ibabil yu'un ti Moisese xchi'uc ti j'alc'opetique, ac'o xich'ic ta muc'.’ 30Xi laj stac' ti jc'uleje: ‘Totic Abraham, mu xich'ic ta muc'. Mi ta xilic ti oy buch'u ta xcha'cuxi batele, ta sutes sbaic.’ 31Xi laj yal ti Abrahame: ‘Mi mu sc'an xich'ic ta muc' ti c'usitic ts'ibabil yu'un ti Moisese xchi'uc ti j'alc'opetique, mu ja' xa la ta xich'ic ta muc' mi oy buch'u ta xcha'cuxi batel.’ ”


Copyright
Learn More

will be added

X\