Santiago 1

1Vu'un Santiago, yaj'abtelun ti Diose xchi'uc ti Cajvaltic Jesucristoe. Chabanucoxuc, vo'oxuc ti lajcha'chop snitiluloxuc Israele, ti tanijemoxuc ta sjunlej banomile. 2Jchi'iltac, tsots sc'oplal laetuc banomil xava'iic c'alal ta xc'ot ta atojolic ti c'usiuc no'ox lajeltsaele. 3Yu'un xana'ic lec c'alal ta xc'ot ta atojolic ti lajeltsael ti jech c'otem ta avo'ntonic ta xch'unele, ta xataic liquel ti ep ta x'ayan ti smuc'ul avo'ntonique. 4Jechuc o ta j'ech'el ti oyuc smuc'ul ti avo'ntonique yo' jech ta x'ayan ti avipique, yo' jech mu'yuc c'usi xana'ic. 5Mi oy jlom avu'unic ch'abal ti sbijil ta xa'ie, c'anbeic ti Diose, yu'un ti Diose mu bisbiluc ta xac', yu'un mi ja'uc sna' xjipvan xtenvan. 6Jutebuc ta yo'nton ac'o sc'an ti jech xch'unoj ta xa'ie, ti mu xna'etuque, yu'un ti buch'u xna'ete, co'ol s'elan jech c'u cha'al nab ti xyuc'uq'uet ta jujujot yu'un ti iq'ue. 7Yu'un ti buch'u jech taje, laj to c'op ta sta ti oy c'usi ta x'ac'bat yu'un ti Cajvaltic Diose. 8Yu'un ti buch'u jech xtal xbat ti yo'ntone, yu'un oy c'usi ta sc'an ti c'ac'al tana li'e, yan xa c'usi ta sc'an ti oc'ome, yu'un ma'uc jun ti c'usi ta sc'ane. 9Ti jch'unolajel ti me'un li' ta banomile, muyubajuc ta stojol Dios ti ac'bat sna' ti oy sbats'i c'ulejale. 10Ti jch'unolajel ti oy sc'ulejal li' ta banomile, muyubajuc ta stojol Dios ti ac'bat sna' ti mu'yuc c'usi bal o ti sc'ulejal ta stojol ti Diose. Yu'un ti jc'uleje co'ol s'elan jech c'u cha'al nich momol ti mu xjalije. 11C'alal ta xloc' talel ti c'ac'ale, ta stsac lec yip ti xq'uixnale, ta xtaquij yu'un ti momole, ta xbaj ta lum ti xniche. Laj to me sc'oplal ma' ti c'upil sba ta q'uelele. Ja' jech sc'oplal ec ti jc'uleje, manchuc mi yacal ta stsobel ti sc'ulejale. 12Yan yutsil ti buch'utic oy smuc'ul yo'nton ta xcuch yu'un ti lajeltsael yu'un ti vocole. C'alal ta xcuch yu'une, ta xich' ti smoton ti co'ol s'elan jun trona ti ja' xcuxlejal ti albil yu'un ti Dios ta xich'ic ti buch'utic c'ux ta x'a'yivanique. 13C'alal mi oy buch'u ta xa'i tijbil sjol ta spasel ti c'usi chopole, mu me snop ti ja' tijbil sjol yu'un ti Diose. Yu'un ti Diose mu'yuc tijbil sjol ta spasel ti c'usi chopole, mi ja'uc no'ox ta stij jolil ta spasel ti c'usi chopole. 14C'alal mi oy buch'u tijbil sjol ta spasel ti c'usi chopole, ja' tijbil sjol yu'un ti chopol sc'upijel yo'ntone. Jech o xal ta xlic spas ti c'usi chopole. 15C'alal tijbil jolil ta spasel ti c'usi chopol yu'un ti sc'upijel o'ntonale, ta xlic ayanuc talel ti mulile. C'alal stsacoj xa lec yip ti mulile, ta sta svocol, ta xac' o sjol sbaquil xchi'uc. 16Ti jech mu jipbaj tenbaj ta xca'ioxuque, Jchi'iltac, mu me xalo'la abaic. 17Scotol ti c'usitic oy slequil yutsile, ti c'usi oy stuq'uil ta xij'ac'bate, ta xlic talel ta vinajel bu oy ti Diose, ti Buch'u laj smeltsan ti c'usitic ta xac' xojobal ti oy ta vinajele. Yu'un ti Diose staoj o yav ti c'u s'elane, mu syanijes sba, yu'un mu'yuc ta stojolal ti c'usi chopole. 18Yu'un laj xa yac' jcuxlejaltic ta sventa sc'op ti bu ja' melele, yo' jech x'ech' to cajal ta xijc'ot ta stojol scotol ti c'usitic laj xa smeltsane. Jech loc' ta nopel yu'un ti Diose. 19Xi s'elan xavules ta ajolique, Jchi'iltac: acotolicuc, tsots chapalucoxuc, a'yibo aba ti ac'opique. Ja'uc le'e, ts'ijano aba, mu xac'opoj ta anil. Mu xa'ilin ta anil. 20Yu'un ti buch'u ilinem no'oxe ma'uc ta spas ti c'usi lec ta xil ti Diose. 21Jech un cha'e, ictaic ta spasel scotol ti c'usitic mu'yuc smelole, xchi'uc ti mulil epajem ta j'ech'ele. Ch'unic o ta slequil yutsil avo'ntonic ti lequil c'op ti ic'ot ta avo'ntonique, yu'un oy yip yo' jech ta xcol ti ach'ulel avanimaique. 22Altic no'ox mi ja' no'ox ta xava'i ti lequil c'ope. Yu'un sc'an abtelanel ti c'u s'elan ta xale yo' mu xalo'la abaic. 23Ti buch'u ja' no'ox ta xa'i ti lequil c'ope, ti mu'yuc ta spas ti c'u s'elan ta xale, co'ol s'elan jech c'u cha'al jun vinic ta sq'uel sat ta nen. 24Laj yil sba ti c'u s'elane. C'alal loc' batele, ch'ay ta yo'nton ta anil ti c'u s'elane. 25Ti buch'u mu xch'ay ta yo'nton ti c'u s'elan laj ya'i ti lequil smantalil ti jbel c'op xal ti colele, ti ta snopilan lec ti c'usi ta xale, ti jbel stsinanoj yo'nton ta spasel ti c'usi xal ti smantalile, xmuyubaj no'ox xchi'uc ti c'usi ta spase. 26Mi oy buch'u ta sbis sba ta lequil jch'unolajele, mi xbet'bun no'ox ti yee, ti mi mu sna' spajtsan sbae, ta slo'la sba stuc. Jech ti c'usi xch'unoje, mu'yuc c'usi xtun o. 27Xi s'elan yutsil ta stojol Jtotic Dios ma' ti oy c'usi ch'unbile, ti mu jutebuc xchopolale: ta stic' sba ta scolta ti me'un ololetique, xchi'uc ta stojol ti me'un antsetic ti oy svocolique, xchi'uc mu soques sba xchi'uc xchopolal ti banomile.


Copyrighted Material
Learn More

will be added

X\