Hebreos 7

1Ti Melquisedec taje, ja' to ox ajvalil yu'un ti jteclum Saleme, ja' banquilal pale xtoc yu'un Dios ti oy ta toyole. C'alal sut talel ti Abraham ta pas leto c'alal laj stsal comel ti jayib ajvaliletique, jech ti Melquisedeque loc' batel ta snupel ta be ti Abrahame, xchi'uc laj yac'be yich' ti lequile. 2Jech ti Abrahame laj yac'be ti jujun ta lajlajuneb ti c'u yepal laj sta ti c'alal tsalvan ta letoe. Ti biil Melquisedeque ja' smelol ta xal ti “ajvalil yu'un ti lequilale”. Ti jech ajvalil yu'un ti jteclum Saleme, ja' smelol ta xal xtoc “ajvalil yu'un ti lamajesej c'ope”. 3Ti Melquisedec taje, mu na'baj buch'u ti stote ti sme'e, buch'utic ti smuc'tot syayae. Mi ja'uc x'ale sc'oplal ti bu voc' talele, ti bu chame. Co'ol s'elan ja' Xnich'on Dios, yu'un c'otem ta pale sbatel osil. 4A'yio ava'iic un cha'e, cajal sc'oplal ta j'ech'el ti Melquisedeque. Yu'un ti jmolmuc'totic Abrahame laj yac'be ti jujun ta lajlajuneb ti c'u yepal laj stsob talel c'alal laj stsal ta leto ti ajvaliletique. 5Ja' yu'un un, ta sventa ti oy c'usi tsots sc'oplal albil comel yu'un ti Moisese, ti pale Levitaetique, tsots sc'oplal ta sc'anbeic scotol ti jteclum ti yaq'uicuc ti jujun ta lajlajunebe manchuc mi ja' snitilultac, yuts' yalaltac ti Abraham jech c'u cha'al ti stuquique. 6Manchuc mi ma'uc liquem talel ta stojol snitilul Levi ti Melquisedeque, laj sc'anbe ti jujun ta lajlajuneb ti Abrahame manchuc mi albil sc'oplal yu'un Dios ti oy c'usi ta x'ac'bate. Ti Abrahame ac'bat yich' lequilal yu'un ti Melquisedeque. 7Ja' yu'un un, ti buch'u ta xac' ti lequilale ja' x'ech' to cajal, ja' mu sta ti buch'u ta xich'e. 8Ti buch'utic oy ta sventaic ta sc'anel ti jujun ta lajlajunebe, naca viniquetic ti sna' xchamic ti li' oyic ta banomile. Ja'uc ti Melquisedeque ta x'albat sc'oplal ti ts'ibabil ta ch'ul c'ope ti ja' jun ti staoj yav cuxule. 9Ti pale Levie xchi'uc ti snitilultac ta paleal ti laj sc'anic ti jujun ta lajlajunebe, ja' jech ec laj yaq'uic c'ot ti jujun ta lajlajuneb ta stojol ti Melquisedec ti c'alal ja' laj yac' ti Abrahame, 10yu'un tey xa ono'ox ta sbec'tal xch'ich'el snitilultac ti Abraham ti c'alal ay nupatuc ta be yu'un ti Melquisedeque ac'o mi mu'yuc to ox voq'uemic. 11Ti israeletique laj yich'ic ti oy c'usi tsots albil sc'oplal ta sventa ti paleetic ti ja' snitilultac ti Levie, ti ayan talel ta stojol ti Aarone. Lec un cha'e, ti yu'unuc ta sventauc ti paleetic taje ti lajuc staic ti slequilal yutsilalique, ja' yu'un unbi, mu xa tsotsuc sc'oplal ital yan pale ti co'ol s'elan ti Melquisedeque, ti ja' mu xco'olaj xchi'uc ti Aarone. 12C'alal jel ti paleetique, ja' jech xtoc tsots sc'oplal ta xjel ti mantale. 13Yu'un ti ts'ibabil ta ch'ul c'ope, ta x'albat sc'oplal ti Cajvaltique, jvoc' o nitiluletic yu'un Israel ti bu lic talele, ti mu junuc ochem ta paleal yu'unique. 14Yu'un vinajem lec sc'oplal ti Cajvaltic Jesucristoe ti ayan talel ta stojol jun snitilul ti Judae. Ti Moisese mu'yuc laj yal ti ta xich' t'ujel jun pale ta stojol snitilul ti Judae. 15Yu'un xvinaj lec, ti Ach' pale tale, co'ol s'elan jech c'u cha'al ti Melquisedeque. 16Ti Ach' pale ti va'ie, ma'uc ta sventa ti c'u s'elan ta xal ti mantale. Yu'un ja' no'ox och ta Paleal ta sventa ti oy stsatsal xcuxlejal ti mu sna' xlaje. 17Yu'un xi albat sc'oplal yu'un ti Diose: “Paleot sbatel osil. Ti avabtel ta xavich'e, ja' jech c'u cha'al ti Melquisedeque.” 18Ja' yu'un un, laj sc'oplal ti vo'ne mantal ti c'u s'elan ta xal ti ta xich' va'anel ti paleetique, yu'un yabtelic ti paleetique mu'yuc yip, mu'yuc c'usi xu' yu'un. 19Ti oy c'usi tsots sc'oplal albil yu'un ti Moisese, mu'yuc xlecubtasvan jutebuc. Avi tana li'e, oy xa jun xq'uexol ta jtojoltic ti x'ech' to yutsil ta jpat co'ntontic ta stojole, ti ja' ta sventa xu' xijnopaj ta stojol ti Diose. 20Taje, j'ech'el mi ja'uc stselbuj sc'op ti Dios ti laj sva'an sba ta rexticoe. Ja'uc ti yan paleetique, mu'yuc buch'u c'opoj sva'anel sba ta rextico ta stojolic. 21Ja'uc ta sventa ti Cajvaltique, le'e, oy Buch'u laj sva'an sba ta rextico ta stojol, yu'un ts'ibabil ta ch'ul c'op ti xi ta x'albat ti sc'oplale: “Paleot sbatel osil, yu'un laj xa jva'an jba ta rextico ta atojol. Mu jel ti jc'ope.” 22Ja' yu'un un, ti Jesuse j'ech'el ja' xa sva'anoj sba ta sventainel ti jun trate ti x'ech' to yutsile, ti ja' mu sta ta ba'yele. 23Ja'uc ti yan paleetique, ep ta vo' laj ech'icuc ta scoj ti sna' xchamique. 24Ti jech j'ech'el cuxul ti Jesuse, laj to c'op ti ta to x'ich'bat ta yan ti yabtel ti jech banquilal palee. 25Jech o xal sbatel osil xu' spoj scolta ti buch'utic ta xnopajic batel ta stojol ti Diose, yu'un j'ech'el cuxul sbatel osil yo' ta sc'anbe vocol ti Dios ta stojolique. 26Ti Jesús taje, ja' ti tsots sc'oplal ta xtun cu'untic ta Banquilal Palee, yu'un ja' jun ch'ul vinic. Mu'yuc c'usi chopol laj spas. Mu xco'olaj yo'nton jech c'u cha'al ti jsa'muliletique, yu'un x'ech' to cajal sc'oplal ta vinajel. 27Mu xco'olaj xchi'uc jech c'u cha'al ti yan banquilal paleetic ti jujun c'ac'al ta smilic ta xchiq'uic ti chon bolometic ta stojol Dios ta scoj ti smulique, xchi'uc ta scoj smul ti jteclume. Yu'un ti Jesuse, jcoj no'ox laj yac' stojol ti mulil ta sventa scotol ti c'alal ja' stuc laj yac' sba ta mataninele. 28Ta sventa ti mantal jbel tsots sc'oplal albil yu'un ti Moisese, laj sva'anic ta banquilal pale ti naca viniquetic ti mu jutebuc oy yip stsatsalique. Ts'acal to un, ti Diose laj sva'an sba ta rextico ta yalel ti ja' ta x'och ta Banquilal Pale ti Xnich'on ti oy o slequilal yutsilal sbatel osile.


Copyright
Learn More

will be added

X\