Hebreos 3

1Ja' yu'un un, Jchi'iltac, ti ic'biloxuc yu'un Dios yo' jech ta xac'otic ta yu'untaque, oyuc ta avo'ntonic sc'oplal ti Cristo Jesús ti ja' jun jcholc'ope, ti ja' c'otem ta jun Banquilal Palee. Col no'ox yal ti ja' sventa ti oy c'usi jch'unojtique. 2Ti Jesuse, jun yo'nton ta stojol Dios ti Buch'u laj yac'be ti yabtele jech c'u cha'al ti Moisese, jun yo'nton laj sventain scotol ti c'usitic x'ayan ta sna ti Diose. 3Ja'uc ti Jesuse x'ech' to ich'bil c'ot ta muc', ti ja' mu sta sc'oplal ti Moisese, jech c'u cha'al ti jun jmeltsanej nae x'ech' to ich'bil ta muc' ta xc'ot, ti ja' mu sta sc'oplal ti jbej nae. 4Yu'un ti jujubej nae, sc'an oy buch'u ta smeltsan. Yu'un scotol ti c'usitic oye, ja' smeltsanojan ti Diose. 5Ja' jech ti Moisese, ti ja' jun lequil jtunele, laj sventainbe scotol ti c'usitic oy ta sna ti Diose. Yu'un ti jech itune, laj sva'an sba ta scaj'albel sc'oplal ti c'usitic ts'acal to ta xvul ta loq'uel yu'un ti Diose. 6Ti jech ja' jun lequil Nich'onil ti Cristoe, ta slequil yutsil yo'nton ta sventainbe sna ti Diose, ti ja' jc'oplaltic ti vo'otique, mi j'ech'el jun co'ntontic xijmuyubajotic ta smalael ti oy c'usi ta jtatique. 7Jech o xal un, sc'an ta xats'etan ani' achiquinic ta ya'yiel ti xi ta xal ti Ch'ul Espíritu ti ts'ibabil ta ch'ul c'ope: “Mi vo'oxuc ta xava'iic c'usi ta xal ti Dios avi tana li'e, 8mu xayijubtas avo'ntonic jech c'u cha'al laj spasic ti amolmuc'totique, ti ja' no'ox lic sc'ac'al yo'ntonic ti laj slajeltsabeic yo'nton ti Dios ta xocol banomile. 9Ti bu taje, laj slajeltsaicun, laj sq'uelbeicun co'nton ti amolmuc'totic ta vo'nee, ac'o mi laj yilic cha'vinic (40) jabil ti c'usitic laj jpas ta stojolique. 10Jech o xal un, li'ilin yu'un ti jvoc' jch'iel jc'opojeletic taje, ti xi laj cale: ‘J'ech'el ch'acal yo'ntonic ta jtojol, yu'un mu sc'an stamic ti jbe bu jtamoj batele.’ 11Jech o xal un, li'ilin yu'unic, j'ech'el laj cac' que jti' ti mu x'ochic batel bu ta jcux co'ntone.” 12Q'uelo me abaic un, Jchi'iltac, ti mu'yucuc buch'u junucal avu'unic toj chopol ti yo'ntone, ti ta xch'ac sbaic ta stojol ti cuxul Dios ta scoj ti mu xc'ot ta yo'nton ta xch'unele. 13Ja' ta sc'an ta xatsatsubtasbe aba avo'ntonic ta jujun tal ti jujun c'ac'al ti c'alal li' to oy ti “yorail avi li'e”, yo' jech mu'yuc buch'u junucal avu'unic ta xlaj ta lo'lael yu'un ti mulile, ti ta xlic stoy sbae. 14Yan mi staoj yav jpatoj co'ntontic xijcham xijlaj jech c'u cha'al ta sliquebe, oy c'usi ta xij'ac'bat unbi jech c'u cha'al laj yich' ti Cristoe. 15Yu'un xi ta xale: “Mi vo'oxuc ta xava'iic c'usi ta xal ti Dios avi tana li'e, mu xayijubtas avo'ntonic jech c'u cha'al laj spasic ti amolmuc'totic ti ja' no'ox laj stoy sbaic ta jtojole.” 16¿Buch'utic xcaltic taje ti laj ya'iic sc'opojel Dios ti ts'acal to lic stoy sbaic ta stojole? Ja'ic ti buch'utic loq'uesatic talel yu'un Moisés ta Egipto banomile. 17¿Buch'utic xcaltic ya'yel taje ti ilinem ti Dios ta stojolic ti cha'vinic (40) jabil sjalile? Ja'ic ti buch'utic laj sa'ic ti smulique, ti ta jech to yepal cham lajic ta xocol banomile. 18¿Buch'u sc'oplalic albatic yu'un Dios ti j'ech'el mu x'ochic batel ti bu ta xcux yo'ntone? Ja'ic ti buch'utic laj stoy sbaic ta stojole. 19Jech ono'ox un, yu'un ta xvinaj lec ti mu'yuc x'ochic batele, yu'un mu'yuc xc'ot ta yo'ntonic ta xch'unel ti Diose.


Copyright
Learn More

will be added

X\