Hebreos 11

1Ti oy c'usi c'otem ta co'ntontic ta xch'unele, jna'ojtic lec ti ta xquich'tic ti c'usi jmalaojtique, ac'o mi mu xquiltic, yu'un tey ono'ox oy. 2Ti jech c'otem ta yo'ntonic ta xch'unel ti jmolmuc'totic ta vo'nee, laj staic ti lec ileic yu'un ti Diose. 3Ti jech c'ot ta co'ntontic ta xch'unele, jna'tic lec ti ta sc'op stuc Dios imeltsaj talel scotol ti c'usitic oy x'ayane. Yu'un ti c'usi ta xquiltic avi li'e, imeltsaj talel ta sventa ti c'usi mu xvinaj ta q'uelele. 4Ti jech c'otem ta yo'nton ta xch'unel ti Abele, x'ech' to yutsil laj yac'be smoton ti Diose, ja' mu sta ti Caine. Jech o xal ti Abele laj sta ti lec x'ile yu'un ti Diose, xchi'uc tsacbat ich'bat ti matanal ti laj yaq'ue. Manchuc mi chamem xa ti Abele, staoj to yav ta xvinajesbat sc'oplal ti jech c'otem ta yo'nton ta xch'unele. 5Ti jech c'otem ta yo'nton ta xch'unel ti Enoque, cuxul iq'ue batel ta vinajel yo' mu xil ti chamel lajele. Mu'yuc xa bu laj staic ta sa'el, yu'un iq'ue batel yu'un ti Diose. Ta xal ti ch'ul c'ope ti c'alal mu'yuc to ta x'iq'ue batel ti Enoque, staoj xa ono'ox ti lec x'ile yu'un ti Diose. 6Mu'yuc buch'u xu' lec ta x'ile yu'un Dios mi mu'yuc c'otem ta o'ntonal ta xch'unele. Yo' jech ta xijnopaj ta stojol ti Diose, sc'an ch'unel ti cuxul ti Diose, xchi'uc ti oy c'usi lec ta x'ac'batic ti buch'u ta sa'ic ti Diose. 7Ti jech c'otem ta yo'nton ta xch'unel ti Noee, caj'albat yu'un Dios ti oy c'usi ta xc'ot ta pasel ti mu'yuc to yiloje. C'alal jech albate, tac'al c'ot ta yo'nton, lic smeltsan ti barcoe yo' jech ta spoj sbaic xchi'uc ti yalab xnich'nabe. Ti jech c'otem ta yo'nton ta xch'unel ti Noee, laj svinajesbe ti oy smul ti xchi'iltaque, xchi'uc laj sta ti lec x'ile ta sventa ti jech c'otem ta yo'nton ta xch'unele. 8Ti jech c'otem ta yo'nton ta xch'unel ti Abrahame, ti c'alal tae ta iq'uel yu'un ti Diose, laj xch'un, loc' batel yo' ta xbat ta banomil ti bu ta x'ac'bat ti xrexto yu'un ti Diose. Laj yicta comel ti yosil sbanomile c'alal mi ja'uc sna' ti bu ta xbate. 9Ti jech c'otem ta yo'nton ta xch'unele, co'ol s'elan j'ech'el-be naqui ta osil ti bu albil yu'un ti Dios ta x'ac'bate. Yu'un ta axibal na naqui jech c'u cha'al naqui ti Isaaque, ti Jacobe, ti c'alal albilic ono'ox sc'oplal ta x'ac'batic ti osil banomile. 10Yu'un ti Abrahame ja' smalaoj ti muc'ul jteclum ti bu lec yicob meltsanbile, ja' ti jteclum ti snopoj spasoj stuc ti Diose. 11Ti jech c'otem ta yo'nton ta xch'unel ti Sarae, manchuc mi yayil xa, mi ech'em xa yorail ta x'alaj, ac'bat to yip yo' ta xc'ot ta me'il. Ayan to yol c'alal ma'uc xa yoraile ta sventa ti c'ot ta yo'nton ta xch'unel ti mu stselbuj sc'op ti Dios ti c'usi yaloje. 12Manchuc mi ta xa xc'ot sc'ac'alil ta xpalch'uj batel ti Abrahame, jun to yepal ayan ti snitilultac jech c'u cha'al ti c'analetique, mi jech c'u cha'al ti yi'al nab ti mu stac' chapel ti c'u yepale. 13Scotolic taje, cham ilajic, mu'yuc yich'ojic ti c'usi albilic yu'un Dios ti ta x'ac'batique. Ta sventa ti c'otem ta yo'ntonic ta xch'unele, ta nom laj yilic batel ti xmuyubajic xa yu'une, xchi'uc laj ya'i sbaic ti naca j'ech'el-beetic ech'ic li' ta banomile. 14Ti buch'utic jech loc' ta alel yu'unic taje, ta xac' ta na'el ti yacalic to ta sa'el batel ti sbats'i lumalique. 15Ati yu'unuc ja'uc mu jipbaj mu tenbaj ta yo'ntonic ti sbanomilic bu loq'uic talele, mu ta vocoluc sutic batel ti jechuque. 16Ja'uc ti stuquique ta sc'an ta sta ya'iic ti slequil-lumalique, ja' sc'oplal ti vinajele. Jech o xal ti Diose mu q'uexlaluc ta xa'i ti jech bisbil ta Dios yu'unique, ja' ti meltsanbat xa ti steclumalique. 17Ti jech c'otem ta yo'nton ta xch'unel ti Abrahame, mu xna'etuc ta ox xac' ta matanal ti xnich'on c'alal q'uelbat yo'nton yu'un ti Diose. Sjunul yo'nton ta xac' ta matanal ta stojol Dios ti c'ajomal yo jun ti xnich'on ti c'alal xi albat sc'oplale: 18“Ta sventa Isaac ta x'ayan yepal anitilultac.” 19Yu'un ti Abrahame c'otem ta yo'nton ti oy stsatsal ti Dios ta xcha'cuxesel ti animaetique. Jech o xal xco'olaj xchi'uc cha'cuxiem xa laj xcha'ic' batel ti xnich'one. 20Ti jech c'otem ta yo'nton ta xch'unel ti Isaaque, laj yalbe ya'i ti Esaue, ti Jacobe ti ta sta sc'ac'alil ti ta xich'ic slequilal ti Diose. 21Ti jech c'otem ta yo'nton ta xch'unel ti Jacobe, c'alal po'ot xa ta xchame, laj yalbe ya'i ta jujun xnich'nab ti Josee ti ta xich'ic slequilal ti Diose, ti ts'uyul xa ta svaxton ti Jacobe, xmuyubaj no'ox c'opoj ta stojol ti Diose. 22Ti jech c'otem ta yo'nton ta xch'unel ti Josee, c'alal po'ot xa ta xchame, laj yalbe ya'i ti xchi'iltaque ti ta xc'ot sc'ac'alil ta xloq'uic batel ta Egipto banomile, xchi'uc laj yal mantal sventa sc'oplal ti sbaquiltaque. 23Ti jech c'otem ta yo'ntonic ta xch'unel stot sme' ti Moisese, mu'yuc laj xi'taic smantal ti ajvalil ti oy sc'oplal ta xich' milel ti ololetique. C'alal laj yilic c'upil sba voc' ti quereme, laj snaq'uic oxib u. 24Ti jech c'otem ta yo'nton ta xch'unel ti Moisese, c'alal vinic xae, mu sc'an ta sbise ta squerem ol yu'un yantsil nich'on ti ajvalil ta Egiptoe. 25Ja' xloc' venta laj ya'i ti co'oluc yich'icuc ilbajinel xchi'uc ti xchi'iltac ti buch'utic t'ujbilic yu'un ti Diose, ti ja' mu tsotsuc sc'oplal laj ya'i ti c'u sjalil xmuyubaj xa ta xac'be sba ti c'usi xal ti yo'nton ti naca mulile. 26Yu'un ja' tsots sc'oplal laj ya'i ti bajbil tenbil ta xc'ot ta sventa ti Cristoe, ti ja' mu sta tsots sc'oplal laj ya'i scotol sc'ulejal ti Egipto banomile, ja' ti spatoj ono'ox yo'nton ti oy c'usi lec ta x'ac'bat yu'un ti Diose. 27Ti jech c'otem ta yo'nton ta xch'unel ti Moisese, mi ja'uc juteb laj xi'ta ti jcapemal-jol ajvalil c'alal laj yicta comel ti Egipto banomile, yu'un laj spas ti Moisés ti c'usi snopoje, yu'un co'ol s'elan laj yil cuxul ti Dios ti mu xvinaj ta q'uelele. 28Ti jech c'otem ta yo'nton ta xch'unel ti Moisese, laj sliques ti q'uin Colele. Laj yal mantal ti ac'o yich' bonel ta ch'ich' ti ti' naetique yo' jech mu xmilbat sbanquilal nich'nabic ti israeletic yu'un ti jmilvanej ánjele. 29Ti jech c'otem ta yo'ntonic ta xch'unel ti israeletique, co'ol s'elan taquin banomil jelavic batel ta Tsajal Nab. C'alal jech laj ox spasic ti egipcioetique, jic'avic scotolic ta nab. 30Ti jech c'otem ta o'ntonal ta xch'unele, lom smocal ti jteclum Jerico c'alal ti israeletic laj sjoyobtaic ta xanobal ti vucub c'ac'ale. 31Ti jech c'otem ta yo'nton ta xch'unel ti ants Rahab ti sna' sbolomalin sbae, mu co'oluc cham lajic xchi'uc ti stoyobba xchi'iltaque, yu'un laj xc'uxubinan ti jpa'ivanej israeletique. 32Ep to ti c'usi ta sc'an ta xcalboxuc ava'iique. Ja'uc le'e, mu xloc' o ti c'ac'ale yo' jech ta xcalboxuc ava'iic sc'oplal ti Gedeone, ti Baraque, ti Sansone, ti Jeftee, ti Davide, ti Samuele, xchi'uc sc'oplal ti j'alc'opetique. 33Ti jech c'otem ta o'ntonal ta xch'unele, jech o xal laj stsalic ti jteclumetique, tojobic ta chapanvanej, laj staic ti oy c'usi albilic yu'un ti Diose, altsaj ye yu'unic ti jti'oval leónetique. 34Oy jlom mu'yuc xc'aq'uic ta c'oc' ti bu xlomlun ta xtil ta j'ech'ele. Cuch to yu'un spojel sbaic ti chapal sc'oplal ta xich'ic milel ta espadae. Ac'o mi oy jlom naca xa stamoj sba yilel, tsatsubic to ta stamel sbaic yo' jech laj stsalic ta ac'-leto ti scontraique. 35Oy jlom antsetic laj yilic cha'cuxiic talel ti buch'u chamem xa yu'unique. Oy jlom xtoc chamic o yu'un ti muc'ul ilbajinele, ja' ti mu'yuc laj xch'unic ta xcoltaatique, yu'un ja' oy ta yo'nton ta staic ya'iic ti cha'cuxiel ti x'ech' to yutsile. 36Oy jlom xtoc laj yich'ic labanel, laj yich'ic nucul, laj yich'ic chuquel ta cadena, laj yich'ic tiq'uel ta chuquel. 37Oy jlom xtoc laj yich'ic milel ta ton, laj yich'ic tuch'el ta sierra taq'uin. Oy jlom q'uelbat yo'ntonic. Oy jlom laj yich'ic milel ta espada. Oy jlom yalel muyel yu'un ti svocolique. Oy jlom ja' no'ox smacoj sbaic ta snuculil chij xchi'uc snuculil chivo, abol sbaic, nutsbilic, ilbajinbilic. 38Ti buch'utic c'ot ta stojolic ti yalel muyelic ta xocol banomile, ta vitsetic, ta nail ch'enetic, ta lom ch'enetic, mu'yuc stu ta x'ileic yu'un ti jnaclejetic ta banomile. 39Ac'o mi laj staic ti lec x'ileic ta sventa ti jech c'otem ta yo'ntonic ta xch'unele, mu'yuc to yich'ojic ti c'usi albilic yu'un Dios ti ta x'ac'batique, 40yu'un oy c'usi lec snopoj ti Dios ti ta spase. Yu'un oy ta yo'nton ti ac'o jtatic jmoj ti jlequilaltic xchi'uquique.


Copyright
Learn More

will be added

X\