Galatas 5

1Ti Cristoe tal scoltaotic yo' j'ech'el lijc'ot ta pojel colel yu'un. Ja' yu'un un, staojuc yav ch'unic o ti pojel colel taje, ti mu ja'uc xa xavac' abaic ta mosovinel xtoque. 2A'yibeicun ava'iic li'e. Ti vu'un Pabloune xi ta xcalboxuc ava'iique: Mi ta xavich'ic ti circuncisione, mu'yuc ta xtun avu'unic ti Cristoe. 3Ta jcha'alboxuc ava'iic xtoc, buch'uuc no'ox ti ta xac' yo'nton ta yich'el ya'i ti circuncisione, tsots sc'oplal, ac'o xch'un ta spasel scotol ti c'u s'elan ta xal ti oy c'usi tsots sc'oplal albil yu'un ti Moisese. 4Ti vo'oxuc ti jech ach'unojic ta xata ava'iic ti lec xa'ileic yu'un Dios ta sventa ti ta xapas ava'iic avalojic ti oy c'usi tsots sc'oplal albile, laj xa ach'ac abaic loq'uel ta stojol ti Cristoe, laj aten ajipic ti yutsil slequil yo'nton ti Dios ti oy ta atojolique. 5Ja'uc ti vo'otique, yu'un ta sventa ti Ch'ul Espíritue, ta sventa ti c'otem ta o'ntonal ta xch'unele, j'ech'el jpatoj co'ntontic ta stael ti jlequilaltic ta stojol ti Diose. 6Yu'un ta stojol ti Cristo Jesuse, ma'uc tsots sc'oplal mi ich'bil circuncisión, mi mu'yuc. Ti tsots sc'oplale, c'otuc ta o'ntonal ta xch'unel ti Cajvaltique, ti vinajuc oyuc ti syail xc'uxul o'ntonal ta sventa ti yacal ta x'abtej ti oy c'usi c'otem ta o'ntonal ta xch'unele. 7Ti vo'oxuque, lec to ox ti bu atamojic batele. ¿Buch'u laj smacoxuc ta be ta yich'el ta muc' ti bu ja' melele? 8Ti va'i s'elan ti bu ta xayic'oxuc batele, ma'uc liquem talel ta stojol ti Diose. 9Mu xach'ay ta avo'ntonic ti oy bu xi x'ale ti c'ope: “Ta xpajub scotol ti vots'bil jarina mi ta xich' capel ochel ti juteb spajubtasobile.” 10Ja'uc ti vu'une jpatoj co'nton ta stojol Dios ti mu yanuc o ti c'usi ta xanopique. Ja'uc ti buch'u ta soquesvan teye, ta stsitse yu'un Dios, mu'yuc ta alel buch'uuc no'ox. 11Ti tauc to xcal vu'un ti tsots sc'oplal ta yich'el ti circuncisione, Jchi'iltac, mu jechuc ta xiyilbajinicun ti jchi'iltac ta israelal ti jechuque, mi ja'uc ta soc sjolic ti ta xcalbe sc'oplal ti cham ta curus ti Cristoe. 12Ti oc ta alele, ta lec no'ox, ac'o sboj sba stuquic ti buch'utic ta xilbajinoxuc ta yich'el ti circuncisione. 13Yu'un ti vo'oxuque, Jchi'iltac, tabiloxuc ta iq'uel yo' jech colem ta xac'otic, ma'uc ti ta xayanijes abaic ta spasel c'usi xal avo'ntonic ti jech colemoxuque. Ja' lec, ta syail xc'uxuluc avo'ntonic, ac'o abaic ta tunel ta jujun tal. 14Ta jbel mantal ta xc'ot ta pasel scotol ti oy c'usi tsots sc'oplal albil mi ta xapasic ti xi ta xale: “C'uxubino achi'il jech c'u cha'al ta xac'uxubin abae.” 15Yan mi xacapetic no'oxe, mi xavut-vut abaic ta jujun tale, melel unbi, bijanic, yu'un xu' ta xasoques abaic. 16Ja' yu'un un, xi ta xcalboxuc ava'iique: Cuxianic ti c'u s'elan ta sc'an ti Ch'ul Espíritue, ma'ucuc xavac'beic yipal ta spasel ti c'usi xal ti o'ntonale. 17Yu'un ti talelale, contra xil sbaic xchi'uc ti Ch'ul Espíritue. Ti Ch'ul Espíritue, contra xil sbaic xchi'uc ti talelale. Contra xil sbaic ta jujun tal. Jech o xal mu xc'ot ta pasel avu'unic ti c'usi ta xac'anique. 18Mi tojobtasbiloxuc yu'un ti Ch'ul Espíritue, va'i unbi, mu xa pasbiloxuc ta mantal yu'un ti oy c'usi tsots sc'oplal albile. 19Xi s'elan xvinaj lec ta q'uelel ti buch'utic yac'ojbeic yipal ta spasel ti c'usi xal ti o'ntonale: ta xmulivajic, me'inem no'ox ta yo'ntonic ta spasel ti c'usi chopole, 20xrioxinojic ti c'usitic meltsanbil ta c'abale, j'ac'-chamel, juteb ta yo'nton ti ac'o sta svocol ti xchi'ile, jsoquesej c'op, mu'yuc xlaet yo'nton ta xa'i, ta anil sna' x'ilin, jsa'letoetic, ta sa' sviniquic yo' ta xch'ac sbaic, 21j'it'ix-o'ntonetic, toj ech'em xve'ic, jmilvanejetic, jyacubeletic, oy to yan ti co'ol s'elan ta spasique. Ti buch'u jech ta spasic ti va'i s'elan taje, laj xa ono'ox calboxuc ava'iic, mu staic ti ventainel yu'un ti Diose. 22Ja'uc yabtel ti Ch'ul Espíritue, ta xac' syail xc'uxul o'ntonal, muyubajel, smuc'ul o'ntonal, slamajemal o'ntonal, slequil yutsil o'ntonal, jun jol o'ntonal, 23ma'uc toyobba, yotesel ta be sba stuc. Ti buch'u jech taje, mu'yuc ta xtabat smul yu'un ti oy c'usi tsots sc'oplal albile. 24Ti buch'utic c'otemic ta yu'untac ti Cristo Jesuse, laj xa yaq'uic ta jipanel ta curus ti stalelique, xchi'uc ti svocol yu'un ti sc'upijel yo'ntonique. 25Ti jech cuxulotic ta sventa ti Ch'ul Espíritue, ac'o cac' jbatic ta beiltasel batel yu'un ti Ch'ul Espíritue. 26J'ech'el lajuc sc'oplal ta jtojoltic ti toyobbaile, ti soquesvanej ta sa' letoe, ti iti'ix xca'i jbatic ta jujun tale.


Copyright
Learn More

will be added

X\