Galatas 2

1C'alal chanlajuneb xa jabil yech'ele, libat yan velta ta Jerusalén xchi'uc ti Bernabee, laj quic' batel jchi'in ti Titoe. 2Ti jech libat teye, yu'un ja' laj yac'bun jna' ti Dios ti tsots sc'oplal ta xibate. C'alal ja' o stsoboj sbaic ta Jerusalén ti buch'utic yich'ojic ta sventa ti jch'unolajeletique, laj calbe ya'iic smelol ti lequil ach' c'op ti c'u s'elan ta jchol ta stojol ti jyanlumetique. Ti jech laj jpase, yu'un mu jc'an mi mu'yuc stu ta xc'ot ti c'usi ta xcale. 3Manchuc mi jyanlum ti Tito ti jchi'inoj batele, mi ja'uc suje ta yich'el ti circuncisione. 4C'alal jech tsoboluncutique, melel, oy buch'u laj stic' sbaic ochel ta mucul, ti jch'unolajel spas sbaic yilele, yo' ta xpa'ivanic ta ya'yiel sc'oplal ti colel ta xcalcutic ta sventa ti oyotic ta stojol ti Cristo Jesuse, yu'un oy ta yo'ntonic ta stsatsal sujvanic ta xch'unel ti oy c'usi tsots sc'oplal albile. 5Ac'o mi jech laj snopic taje, mi ja'uc laj jchiquintabecutic ti sc'opique, yu'un ja' ta jc'ancutic ti mu xyanij smelol ti lequil ach' c'op ti ja' melel laj calcutic ava'iique. 6Ti banquilal jcholc'opetic teye, ti ich'bilic ta muc' yu'un ti jch'unolajeletique, mu'yuc laj yalbun ca'icutic ti sc'an to smelol ti lequil ach' c'op ta xcalcutique. Ma'uc ta xixi' yu'un ti jech cajal yabtel yich'ojique, yu'un ti Diose mu yalel toyoluc ta xil. 7Ti banquilal jcholc'opetique, ja' no'ox laj yilic ti ja' stuc Dios laj yac'bun ti cabtel ta yalel ti lequil ach' c'op ta stojol ti jyanlumetique, jech c'u cha'al ti Pedroe ac'bil yabtel yu'un Dios ta yalel ti lequil ach' c'op ta stojol ti israeletique. 8Ti Buch'u laj stac batel ti Pedro ta yalel ti lequil ach' c'op ta stojol ti israeletique, ja' ono'ox ti Dios taje ti laj stacun batel ta yalel ti lequil ach' c'op ta stojol ti jyanlumetique. 9Jech o xal un, ti Santiagoe, ti Pedroe, ti Juane, ja' ti ich'bilic ta muc' teye, laj ya'iic ti ja' laj yac'bun Dios ti cabtele. Jech o xal ti stuquique laj stsacbun jc'ob xchi'uc ti Bernabee, ja' svinajeb ti jununcutique, ti co'ol ti cabtelcutique. Lec laj ya'iic ta xba abtejcun ta stojol ti jyanlumetique. Lec laj ya'iic ec ta xcom abtejicuc ta stojol ti israeletique. 10Ja' no'ox laj svulesbun ta jolcutic ti mu xch'ay ta co'ntoncutic ta xc'uxubinel ti me'onetique. Lec laj ca'i ti jech laj yalique, yu'un jech ono'ox ta jpascutic. 11Ja'uc c'alal ay ti Pedro ta jteclum Antioquíae, laj calbe ya'i ta sat ti mu'yuc stuq'uil ti c'usi ta spase. 12Yu'un ti ta ba'yele, jun yo'nton ta xve'ic xchi'uc ti jyanlum jch'unolajeletique. C'alal c'ot yan viniquetic ti tacbilic batel yu'un ti Santiagoe, ti tsots sc'oplal ta xa'iic ti circuncisione, jech ti Pedroe laj yicta sba ta ve'el xchi'uc ti jyanlumetique, yu'un xi' ti Pedro mi ta xvinaj ti sc'oplale. 13Ti jech ta spac'ta sba ti Pedroe, jech laj spac'ta sbaic xtoc ti yan israelal jch'unolajeletique. Jech laj spas xtoc ti Bernabee. 14Ja'uc le'e, ti c'alal laj quil ti mu xa co'oluc ta spas sba xchi'uc ti c'u s'elan ta xac' ta na'el ti lequil ach' c'ope, ta sba ta sat ti jch'unolajeletique, xi laj calbe ya'i ti Pedroe: —Ti vo'ote, Pedro, israelot ono'ox, laj xa aco'oltas aba un jech c'u cha'al ti jyanlumetique. Ma'uc xa jech ta xapas aba jech c'u cha'al ti israeletique. ¿C'u cha'al ya'yel un cha'e ti ta xasuj ta xch'unel ti jyanlumetic jech c'u cha'al xch'unojic ti israeletique? 15“Ti vo'otique, bats'i Israel ti jts'unobaltique. Mu jechuc j'elantic jech c'u cha'al ti jsa'mulil jyanlumetique. 16Manchuc mi ja' jech oyotic, ja'uc le'e, jna'tic lec ti mu'yuc laj jtatic ti lec xij'ile yu'un Dios ti jech laj jch'untic ta spasel ti oy c'usi tsots sc'oplal albil yu'un ti Moisese. Ja' no'ox ta jtatic ti lec xij'ile yu'un Dios ti jech c'ot ta co'ntoncutic ta xch'unel ti Jesucristoe. Jech o xal ti vo'otique, c'ot ta co'ntontic ta xch'unel ti Jesucristoe yo' laj jtatic ti lec xij'ile yu'un ti Diose, ma'uc ta sventa laj jch'untic ti c'u s'elan ta xal ti oy c'usi tsots sc'oplal albile. Yu'un mu'yuc buch'u junucal ta sta ti lec x'ile yu'un ti Dios ta sventa ta spas ti c'u s'elan ta xal ti oy c'usi tsots sc'oplal albile. 17“Avi tana un, ti ta jc'an ta jtatic ca'itic ti lec xij'ile yu'un Dios ta sventa ti Cristoe, mi jcuchoj to jmultic ta xca'itique, ¿mi ja' yabtel ti Cristo ti jech ta spas taje? ¡Bu xata ti jeche! 18Mi ta xcac' jbatic xtoc ta yoc ta sc'ob ti oy c'usi tsots sc'oplal albil yo' lec oyotic calojtique, melel unbi, oy jmultic. 19Ta sventa ti oy c'usi tsots sc'oplal albile, ti vu'une laj xa sc'oplal ta jtojol, yu'un c'ajomal no'ox laj jta jvocol yu'un, yo' jech xu' ta xicuxi ta stojol ti Diose. Ti vu'une jmoj jipil ta curus licham xchi'uc ti Cristoe 20yo' mu cu'unuc xa jba jtuc ti jech cuxulune, yu'un ja' xa cuxul ti Cristo ta jtojole. Ti jech cuxulun xchi'uc ti jbec'tale, cuxulun xa no'ox ta sventa ti c'ot ta co'nton ta xch'unel ti Xnich'on Diose, ti laj xc'uxubinune, ti laj yac' sba ta milel cu'une. 21Ti vu'une mu jc'an ta jip ta jten ti yutsil slequil yo'nton ti Diose. Ti tauc jtatic ti lec xij'ile yu'un Dios ta sventa ti oy c'usi tsots sc'oplal albile, melel unbi, mu'yuc c'usi tun o ti jech cham ti Cristoe”, xcut.


Copyright
Learn More

will be added

X\