Galatas 1

1Vu'un Pabloun, jcholc'opun. Ma'uc t'ujbilun tacbilun yu'un ti jnaclejetique, yu'un ja' laj st'ujun stuc ti Jesucristoe, xchi'uc ti Jtotic Dios ti Buch'u laj xcha'cuxes ti Jesucristoe. 2Ti vu'une xchi'uc scotol ti jch'unolajeletic ti li' jchi'uque, ta jts'ibacutic talel jvuncutic ta atojolic ti vo'oxuc jch'unolajeloxuc ti buyuc no'ox oyoxuc ta jujun tsobobbail ta Galacia banomile. 3Ich'beic slequilal yutsilal ti Jtotic Diose xchi'uc ti Cajvaltic Jesucristoe, ac'o yac'boxuc jun avo'ntonic. 4Ti Cajvaltic Jesucristoe laj yac' sba ta milel ta scoj ti jmultique, yo' jech tal spojotic loq'uel ta scoj ti toj chopol ti sba banomil avi tana li'e, ti jech ono'ox oy ta yo'nton ti Jtotic Diose. 5Sbateluc osil junuc yutsil slequil ti Diose. Jechuc. 6Toj ch'ayal no'ox ta xc'ot co'nton avu'unic ta xca'i, ti ta ora no'ox, ta xavalopatinic comel ti Diose c'alal ja' laj yic'oxuc ta stojol ta sventa syail xc'uxul yo'nton ti Cristoe. Avi tana une, ats'acliic xa batel yan c'op ti ma'uc colebale. 7Melel, ma'uc yu'un oy to yan colebal lequil ach' c'op. Ti c'usi ta xc'ot ta pasele, yu'un oy jlom ta atojolic ti ja' no'ox ta xayilbajinoxuque, ti ja' no'ox ta syanijesbe smelol ti lequil ach' c'op yu'un ti Cristoe. 8Ja'uc le'e, mi oy buch'u ta xayalboxuc yan c'op ti mu xco'olaj xchi'uc jech c'u cha'al ta xcalcutique, lamluc c'otuc ta stojol ti bac vocol ti ta x'ac'bat talel yu'un ti Diose. Mu'yuc ta alel buch'uuc no'ox, mi vu'un, mi ja' jun ánjel ti liquem talel ta vinajele. 9Xi ono'ox laj calboxuc ava'iic ta ba'yele, ti ta jcha'alboxuc ava'iic xtoque: Mi oy buch'u ta xal yan lequil ach' c'op ti mu xco'olaj xchi'uc jech c'u cha'al laj xa ava'iique, lamluc c'otuc ta stojol ti bac vocol ti ta x'ac'bat talel yu'un ti Diose. 10Mu yu'unuc ja'uc ta jc'an ti lec jc'oplal yu'un ti jnaclejetique, yu'un ta jc'an ti lec jc'oplal yu'un ti Diose. Bu xata ti ja' ta jc'an ti lec jc'oplal yu'un ti jnaclejetique. Ti jechuc oy ta co'nton ta jc'ane, ma'uc xa lequil yaj'abtelun ti Cristoe. 11Ti co'ol jchi'il jbatique, ta xcac' ana'ic, ti lequil ach' c'op ti ta xcale, ma'uc snopben jun vinic. 12Ma'uc jun vinic laj xchanubtasun, laj yac'bun ca'i. Ja' laj yac'bun jna' stuc ti Jesucristoe. 13Ti vo'oxuque ava'binojic lec c'u s'elan laj jpas c'alal jch'unoj to ox c'u s'elan xch'unojic ti judioetique. Yepal no'ox laj quilbajin ti jch'unolajeletic yu'un ti Diose yo' ta jch'aybe sc'oplalic. 14Ti c'u s'elan jch'unojcutic ti vu'uncutic judiouncutique, vu'unun ti x'ech' to jelavemune, ti ja' mu sta ti jchi'iltac ti co'ol jch'ielcutic xchi'uque. Yu'un ti vu'une mu jc'an jyanijes mi jutebuc c'u s'elan liquem yu'unic ti jmolmuc'totaque. 15C'alal mu'yuc to ox voq'uemune, t'ujbilun xa ono'ox yu'un ti Diose. Ta sventa ti yepal no'ox ti syail xc'uxul yo'ntone, laj yic'un ta stojol c'alal c'ot ta nopel yu'une. 16Laj yac'bun cojtiquin ti Xnich'one yo' jech ta xcal batel ti lequil ach' c'op yu'un ta stojol ti jyanlumetique. Mu junuc oy buch'u laj jac'be razon ti c'usi ta jpase, 17mi ja'uc ay jac'be ti ba'yel jcholc'opetic ti oyic ta Jerusalene. C'ajomal no'ox libat ta ora ta xocol banomil ti oy ta Arabiae. Ts'acal to lisut talel ta jteclum Damasco. 18C'alal ech' xa ox oxib jabil ti laj staun ta iq'uel ti Cajvaltique, libat ta Jerusalén, ja' to laj cojtiquin ti Pedroe, vo'lajuneb c'ac'al licom xchi'uc. 19Ja'uc ti yan jcholc'opetique, mu'yuc bu laj quilic. Ja' no'ox laj quil ti Santiagoe, yits'in ti Cajvaltique. 20Ti va'i s'elan ta jts'ibaboxuc talel ti jvun li'e, melel xcal ta sba ta sat ti Diose. 21Ts'acal to un, libat ta Siria xchi'uc ta Cilicia banomil. 22Ja'uc ti jch'unolajeletic yu'un Cristo ti oyic ta Judea banomile, j'ech'el mu xiyojtiquinic. 23Ja' no'ox ta xa'iic ti jc'oplal ti xi ta xalique: “Ti buch'u laj yilbajinotic ta vo'nee, avi tana une, ta xac' ta ch'unel ti lequil ach' c'op c'alal ta ox xch'aybe ya'i ti sc'oplale.” 24Jech o xal un, xalbeic xa slequilal yutsilal Dios ta jventa.


Copyright
Learn More

will be added

X\