Efesios 3

1Ti jech taje, xiquejelet, ta xic'opoj xiti'in ta stojol Dios ti vu'un Pablo tiq'uilun ta chuquel ta sventa yabtel ti Cristo Jesuse, ta sventa alequil avutsilalic ti vo'oxuc jyanlumoxuque. 2Ava'binojic xa nan, ti ta slequil yutsil yo'nton ti Diose, laj yac'bun cabtel ti ja' sventa alequilal ti vo'oxuque. 3Ti Diose laj yac'bun quil ti c'usi mu xvinaj to ox ta q'uelel yu'une jech c'u cha'al laj jts'ibaboxuc ta yalel ava'iic ti jbel cha'bel ta jlic jvune. 4C'alal ta xaq'uelic ti jlic jvune, ta xlic avilic ti xcojtiquin ti mucul to ox sc'oplal ti Cristoe. 5Ti le' talel ta vo'nee, mi junuc oy buch'u laj sna' ti c'usi mucul to ox ti sc'oplale. Avi tana un, ti Diose ta sventa ti Xch'ul Espíritue, laj xa yac'be sna' ti lequil jcholc'opetique, xchi'uc ti j'alc'opetic yu'une. 6Xi s'elan ma' ti c'usi mu xvinaj to oxe: ta sventa ti lequil ach' c'ope, ti jyanlumetique co'ol ta xich'ic ti xrextoic jech c'u cha'al ta xich'ic ti israeletique, yu'un junic xa ta stojol ti Cristoe, jmoj ta xa'ac'batic ti c'usi yaloj Dios ta xac' ta sventa ti Cristo Jesuse. 7Ti li'och ta yalel ti lequil ach' c'ope, ja' sventa smuc'ul stsatsal ti Diose, ac'o mi ma'uc jc'otebal o. 8Ta scotol ti buch'u c'otemic ta yu'untac ti Diose, ja' slajeb xa peq'uel ti jc'oplale. Ja'uc ti Diose laj yac'bun cabtel ta yalel ti lequil ach' c'op ta stojol ti jyanlumetique yo' jech ta xcalbe ya'iic sc'oplal ti Cristo ti mu no'ox albajuc yutsilal ti sc'ulejale. 9Ti Buch'u laj smeltsan scotol ti c'usitic oye, laj yac'bun cabtel ta svinajesel ta stojol scotol ti jnaclejetic ta banomil ti c'usi mu to ox xvinaj yu'un ti Dios ta vo'nee. 10Ti jech ic'ot ta pasele, yo' ti Diose ta xac'be yil ti jpas-mantaletic ti oyic ta vinajele, ti yepal oy ta tos sbijil ti Diose, yo' ta xilic ti c'u s'elan ta staic scolelic yu'un Dios ti jch'unolajeletique. 11Taje, co'ol xchi'uc jech c'u cha'al oy ono'ox ta yo'nton ti Dios ti ta xc'ot ta pasel yu'un ta sventa ti Cajvaltic Jesucristoe. 12Ta sventa ti oyotic ta stojol ti Cristoe, ti c'otem ta co'ntontic ta xch'unele, jpatoj co'ntontic ti xu' xijnopaj ta stojol ti Diose. 13Jech o xal un, ta jc'anboxuc vocol ta atojolic ti mu xchibaj avo'ntonic ti jech ta xquich' jvocol ta aventaique, yu'un ja' ac'uxubinelic alequilalic. 14Ti jech taj une, ta jquejan jba ta stojol ti Jch'ul totique, Stot ti Cajvaltic Jesucristoe, 15yu'un ja' Totil yu'unic scotol ti oyic ta vinajele, xchi'uc ti oyic ta banomile. 16Ta sventa ti mu no'ox albajuc xch'ul c'ulejal ti Jtotic Diose, ta jc'anbe ti ac'o yac'boxuc yip avo'ntonic ta sventa ti Ch'ul Espíritu yu'une, 17yo' jech ti Cristoe ta xnaqui ta avo'ntonic, ti jech c'otem ta ch'unel avu'unique. Ta jc'anbe ti Diose ti ja'uc yipal avu'unic ti oyuc ti syail xc'uxul avo'ntonique, yo' jech mu'yuc c'usi xana'ic ti jech li' cuxuloxuque, 18yo' jech ti vo'oxuque xchi'uc ti yan jch'unolajeletique, xu' ta xava'ibeic smelol ti mu no'ox albajuc yutsil syail xc'uxul yo'nton ti Cristoe. 19Ta jc'anbe ti Diose ti ac'o yac'boxuc ava'iic ta avo'ntonic ti syail xc'uxul yo'nton ti Cristoe, ti mu bisbiluque, ti mu xa no'ox c'usi xtaun ti yutsil slequile, yo' jech oy ta atojolic stalel ti Diose. 20Ti jech oy smuc'ul stsatsal ti Diose, x'ech' to xu' ta xac'botic ti c'usi ta jc'antique, ti c'usi ta jnoptique. Avi tana une, ich'biluc ta muc' ti Dios ti ta x'abtej ti smuc'ul stsatsal ta jtojoltique. 21Ich'biluc ta muc' sbatel osil ti Diose, ta sventa ti jch'unolajeletique, xchi'uc ta sventa ti Jesucristoe.


Copyrighted Material
Learn More

will be added

X\