Efesios 1

1Vu'un Pablo, loc' ayan ta yo'nton stuc Dios ti jech lic'ot ta jcholc'op yu'une, ti tacbilun yu'un ti Jesucristoe. Ti vo'oxuc nacaloxuc ta jteclum Efesoe, ta jts'ibaboxuc talel jlic jvun ta atojolic ti vo'oxuc yu'unoxuc xa ti Diose, ti c'otem ta avo'ntonic ta xch'unel ti Cristo Jesuse. 2Ich'ic slequilal yutsilal ti Jtotic Diose xchi'uc ti Cajvaltic Jesucristoe. Ac'o yac'boxuc ta atojolic ti slamajemal yo'ntone. 3Lequil-c'optabiluc cu'untic ti Jtotic Diose, Stot ti Cajvaltic Jesucristoe, yu'un laj xa yac'botic ep ta tos ch'ul lequilal ti oy ta vinajel ta sventa ti Cristoe. 4C'alal mu'yuc to ox meltsajem ti banomile, t'ujbilotic xa ono'ox yu'un ti Dios ta sventa ti Cristoe yo' jech mu'yuc jmultic ta xijc'ot ta stojol. 5Ta sventa syail xc'uxul yo'nton ti Diose, vo'ne xa ono'ox quich'ojtic talel ti oy sc'oplal ta xijc'ot ta xnich'nab ta sventa ti Jesucristoe jech c'u cha'al snopoj ono'ox ta yo'nton ti stuque. 6Ti jech taj une, lequil-c'optabiluc cu'untic ti Diose, ti mu no'ox albajuc ti yutsilal slequilal yo'ntone, ti laj yac'botic ti xch'ul lequilal ti jech oyotic ta stojol ti xc'uxubinbil Nich'one. 7Ti jech mu albajuc syail xc'uxul yo'nton ti Diose, laj spoj laj scoltaotic ta sventa ti laj smal xch'ich'el ti Xnich'one, yo' jech ta jtatic ti ch'aybil ti jmultic ta xc'ote. 8Yu'un ti Diose laj xa yac' quiltic ti mu no'ox albajuc yutsil ti syail xc'uxul yo'ntone. 9Ta sventa ti mu no'ox albajuc sbijil ti Diose, stuc laj yac' jbijiltic ta sna'el ti c'usi mucul to ox yu'une. Ja' stuc laj sva'an sba ta spasel ti c'usi snopoj ono'ox ta spase. 10Ati va'i s'elan taje, yu'un oy bu jun c'ac'al snopoj ono'ox ti Diose ti ta xc'ot ta jun ti ja' ta sventain scotol Cristo ti c'usitic oy ta vinajele, xchi'uc ti c'usitic oy ta banomile. 11Ti jech lijc'ot ta jun xchi'uc ti Cristoe, yu'un vo'ne xa ono'ox t'ujbilotic yu'un ti Diose yo' ta xquich'tic ti rextoil ti albil sc'oplal ta xaq'ue, ti co'ol xchi'uc jech c'u cha'al oy ono'ox ta yo'nton ti Dios ta spas ti c'u s'elan lec ta xil ti stuque. 12Ti jech laj spas ti Dios ta jtojoltique, yo' jech lequil-c'optabil ti smuc'ul stsatsal cu'uncutique, yu'un ba'yel laj jpat co'ntoncutic ta smalael Cristo ti vu'uncutic israeluncutique. 13Jech ti vo'oxuc jyanlumoxuque, teq'uel c'ot ta avo'ntonic ta xch'unel c'alal laj avich'ic albel sc'oplal ti pojel colel yu'un ti Cristoe. Ti lac'otic ta jun xchi'uc ti Cristoe, laj yac'boxuc aseyoalic, ja' sc'oplal ti Ch'ul Espíritu ti albil ono'ox sc'oplal ta xaq'ue yo' ta xvinaj ti ja' yu'unoxuc ti Diose. 14Ti Ch'ul Espíritu laj quich'tique, ja' svinajeb ti jbel sc'oplal ta xquich'tic ti jrextotic ti yaloj ono'ox ti Dios ta xaq'ue, ti ja' to ta xquich'tic c'alal mi laj xa staic spojel scolelic ta j'ech'el scotol ti buch'utic ja' yu'untaque, yo' jech ta xalbeic yutsilal slequilal smuc'ul stsatsal ti Diose. 15C'alal laj ca'i ti c'otem ta avo'ntonic ta xch'unel ti Cajvaltic Jesuse, ti c'ux ta xava'iic scotol ti buch'utic yu'untac ti Diose, 16mu xquicta jba ta yalbel vocol ti Dios ta atojolique, yu'un oyoxuc no'ox ta co'nton c'alal ta jc'opon ti Diose. 17Ta aventaic chcalbe vocol Dios yu'un ti Cajvaltic Jesucristoe, ti Jch'ul Totic ti mu albajuc ti yutsilal slequilal ta j'ech'ele. Ta jc'anbe ti ac'o xayac'boxuc abijilic ta yojtiquinel yo' ta xava'iic lec ta avo'ntonic stalel ti Diose. 18Ta jc'anbe ti Diose ti ac'o sjamboxuc ti snopbenal avu'unique yo' jech ta xana'ic c'u s'elan ti spatobil yo'ntonic ta x'ac'batic ti buch'utic ic'bilique, xchi'uc ti oy jun c'ulejal rextoil ti mu albajuc yutsil ta xac' ti Dios ta stojol ti ch'ul jteclumetic yu'une. 19Jech ta xc'ot ta avo'ntonic ti mu no'ox bisbiluc smuc'ul stsatsal ti Dios ta x'abtej ta jtojoltic ti vo'otic c'otem ta co'ntontic ta xch'unele. 20Yu'un ti smuc'ul stsatsal ti Dios taje, ja' ono'ox ti smuc'ul stsatsal laj yac' iluc c'alal laj xcha'cuxes ti Jesucristoe yo' jech c'ot ta pasel yu'un ti laj yac' chotluc ta sts'el sbats'i c'ob ti oy ta vinajele. 21Ti Cristoe ac'bat sbain scotol ti ánjeletic oy ta vinajele, ti yich'oj yabtelique, ti tsots xu' yu'unique, ti jpas-mantaletique. Ac'bat sbain xtoc scotol ti buch'utic xu' yu'un li' ta sba banomile, xchi'uc ti ta xvul ta loq'uele. 22Scotol ti c'usitic oye, ac'bat ta yoc ta sc'ob ti Cristoe, c'ot ta banquilal Ajvalil ta sbainel ti jch'unolajeletique. 23Yu'un ti jch'unolajeletique yich'ojbeic sbec'tal stacopal ti Cristoe, yu'un ta staic ta maquiel stalel ti Cristoe, yu'un scotol ti c'usitic oye, ja' sventa ti Cristoe.


Copyright
Learn More

will be added

X\