Colosenses 4

1Ti vo'oxuque, ajvaliletic, oyuc slequilal avo'ntonic, oyuc arazonic ta stojol ti amosovique. Vuleso ta avo'ntonic xtoc ti oy jun Avajvalic avu'unic ti oy ta vinajele. 2Mu xavicta abaic ta c'opojel ti'inel. Viq'uiluc lec asatic. xchi'uc colaval, utic ti Diose. 3C'oponic Dios ta jtojolcutic yo' jech ti Cajvaltique ta sjam batel jbe ta yalel ti lequil ach' c'op yu'une, sc'oplal ti Jesucristo ti mucul to oxe. Yu'un ja' ta sventa ti li' tiq'uilun ta chuquele. 4C'opojanic ti'inanic yo' jech jamal ta xcal sc'oplal ti Cristo jech c'u cha'al yacalun ta spasele. 5Bijanic yu'un ti ma'uc jch'unolajeletique, ti ma'ucuc no'ox jeche' ta x'ech' avu'unic ti jujun c'ac'ale. 6Ti c'usi ta xavalique, lecuc ta a'yiel, oyuc yutsil. Sc'an xana'ic c'u s'elan ta xatac'avic ta jujun tal. 7Ti jchi'iltic ta abtel Tíquico ti lec xquiltique, ti ja' cajcoltaobba ti jmoj ta xituncutic yu'un ti Cajvaltique, ja' ta xalboxuc ava'iic c'u s'elan ta xbat ti jc'oplale. 8Ti jech taj une, ta jtac talel ta atojolic yo' jech ta xal ava'iic c'u j'elancutic, yo' ta stsatsubtas avo'ntonic. 9Ta xchi'in talel xtoc ti jchi'iltic ta abtel Onésimo ti lec xquil jbatic xchi'uque, ti jun yo'ntone, ti ja' jun avinquilelique. Ja' ta xayalboxuc ava'iic ti c'usi yacal ta xc'ot ta pasel li'e. 10Ti jchi'il ta chuquel Aristarcoe, chabanuc xayalboxuc. Chabanuc xayalboxuc ti Marcos xtoque, ti ja' xnich'on sjuntot ti Bernabee. Mi xc'ot ta atojolic ti Marcose, calojboxuc xa ono'ox ava'iic c'usi xu' ta xapasic, ich'ic ta muc'. 11Chabanuc xayalboxuc ti Jesuse, Justo ti yan sbi xtoque. Ta scotol ti jch'unolajel israele, ja' no'ox jech yepal ta scoltaicun ta yabtelanel ti ventainel yu'un ti Diose, yu'un ja' jpatoj co'nton yu'unic. 12Chabanuc xayalboxuc ti Epafrase, ti ja' jun achi'ilic ta xtun yu'un ti Cristoe. Ti stuque ta ono'ox sc'opon Dios ta atojolic yo' jech jun avo'ntonic, yo' jech avac'ojbeic yipal ta spasel ti c'usi ta sc'an yo'nton ti Diose. 13Vu'un rexticoun, quiloj lec ti ta ono'ox svul yo'nton ta atojolic ti Epafrase, xchi'uc ti buch'u oyic ta jteclum Laodiceae, ti oyic ta Hierápolise. 14Chabanuc xayalboxuc ti jpoxtavanej Lucase, ti mu jipbaj tenbaj ta o'ntonal ta xca'itique, xchi'uc xtoc ti Demase. 15Chabanuc xavalbe ya'i ti jchi'iltic oyic ta Laodiceae. Ja' jech xtoc chabanuc xavalbe ti Nínfase xchi'uc ti jch'unolajeletic ta stsob sbaic ta snae. 16C'alal mi laj aq'uelic ti jvun li'e, ts'acal to un, taquic batel ta Laodicea yo' jech ta sq'uelic ti jch'unolajeletic teye. Ja' jech xtoc, q'uelic ec ti jvun ta xlic talel ta Laodiceae. 17Xi xavalbeic ya'i ti Arquipoe: “Tuc'ulano la me lec ti avabtel la'ac'bat yu'un ti Cajvaltique.” 18Vu'un Pablo, ta jc'ob jtuc laj jts'ibaboxuc talel ti chabanucoxuque. Mu xach'ay ta avo'ntonic ti tiq'uilun ta chuquele. Ac'o sva'an sba ti Dios ta atojolique. Jechuc.


Copyright
Learn More

will be added

X\