Hechos 8

1Ti Sauloe xmuyubaj xa ti jech laj ta milel ti Estebane. Ti jech yorail taje, ja' o lic muc'ul ilbajinel ta stojol ti jch'unolajeletic ta Jerusalene. Scotolic ti jch'unolajeletique loq'uic ech'el ta Jerusalén, tan puc batic ta Judea banomil, ta Samaria banomil. Ja' xa no'ox comic ta Jerusalén ti lajcha'vo' (12) jcholc'opetique. 2Oy jun chib viniquetic oy yutsil slequil yo'ntonic laj smuquic ti Estebane. Ep laj yoq'uitaic. 3Ja'uc ti Sauloe sujoj sba ta yilbajinel ti jch'unolajeletique. Ta x'och batel ta jujun naetic ta xjochan loq'uel manchuc mi viniquetic, mi antsetic yo' ta stac batel ta chuquel. 4Ti buch'utic loq'uic ech'el ta Jerusalene, ti buyuc no'ox ta xanavique, ta xalic ti lequil ach' c'op sc'oplal ti colebale. 5Oy jun ta scotol ti jch'unolajeletic ti Felipe sbie, bat ta jun muc' ta lum ti oy ta Samaria banomile, ta yalbel sc'oplal ti Cristoe. 6Ti jnaclejetique ta stsob sbaic ta ya'yiel, ta sts'etanel xchiquinic ti c'usi ta xal ti Felipe. Yu'un laj yilic ti oy c'usitic ch'ayal ta xc'ot o'ntonal yu'un ti laj yac' iluque. 7Yu'un yepal no'ox laj colicuc ti buch'utic ta x'ilbajinatic yu'un ti pucuj ti mu stac' q'uelel ta j'ech'el ti c'usi ta spase. X'avanic no'ox ta xloq'uic batel ti pucujetique, ti yepal no'ox colic ti jt'elt'el chameletique, xchi'uc ti coxovetique. 8Ta sventa taj une, xmuyubaj no'ox scotol ma' ti jteclume. 9Ti bu taje, oy jun vinic Simón sbi, yabtelinoj to ox ti j'ac'-chamele, yu'un slo'laoj ti jnaclejetic oyic ta Samaría banomile, yu'un ta xalbe sba ti tsots xu' yu'une. 10Yu'un ta biq'uit ta muc' ts'etel xa xchiquinic ta ya'yiel ti xi ta xalbeic ti sc'oplale: “Le'e, ja' ti buch'u yich'ojbe smuc'ul stsatsal ti Diose.” 11Ta scoj ti mu sna'ique, yich'ojic ta muc', yu'un jal xa lo'labilic yu'un ti yac' chamelale. 12Ja'uc ti c'alal c'ot ta yo'ntonic ta xch'unel ti lequil ach' c'op ta xal ti Felipee, sc'oplal ti Jesucristoe, sc'oplal ti ventainel yu'un ti Diose, laj yich'ic vo' ti viniquetique, ti antsetique. 13C'ot ta yo'nton ta xch'unel ec ti Simone. Laj yich' vo'. Lic xchi'in ta xanobal ti Felipee. Elom no'ox laj yil c'u s'elan ch'ayal ta xc'ot yu'un o'ntonal ti c'u s'elan ta xac' iluc ti Felipee. 14C'alal laj ya'iic ti jcholc'opetic ti oyic ta Jerusalene, ti laj xa xch'unic sc'op Dios ti samariaetique, laj staquic batel ti Pedroe xchi'uc ti Juane. 15C'alal c'otique, c'opoj ti'inic ta sventa ti jch'unolajeletic ti oyic ta Samariae, ti yich'icuc ti Ch'ul Espiritue. 16Yu'un mu'yuc to yalem talel ti Ch'ul Espíritu ta yich'el junuque. Yu'un c'ajomal no'ox yich'ojic vo' sventa ti Cajvaltic Jesuse. 17Va'i un, ti Pedroe, ti Juane laj scajan sc'obic ta sba ti jch'unolajeletique. Laj yich'ic ti Ch'ul Espíritu une. 18C'alal laj yil ti Simón ta xich'ic Ch'ul Espíritu ti jch'unolajeletic ti c'alal ta scajan sc'obic ti jcholc'opetique, ta xac' ox taq'uin. Xi laj yal eque: 19—Ac'bun quich' ec un ti muc'ul tsatsalil le'e. C'alal ta jcajan jc'ob ta stojol ti buch'uuc no'oxe, ta xich'ic ti Ch'ul Espíritu cu'une. 20Xi albat yu'un ti Pedroe: —Batan ta ch'ayel xchi'uc ti ataq'uine, yu'un laj anop ti stac' manel ta taq'uin ti c'usi ta xac' ti Diose. 21Mi jutebuc c'otem ta aventa ta yich'el. Mu'yuc stuq'uil yutsil avo'nton ta sba ta sat ti Diose. 22Ictao, suteso aba yu'un ti c'usi chopol ta xapase. Vocoletan ta stojol ti Diose, xu' to nan ta xch'aybot Dios ti vi s'elan chopol ta xanope. 23Quiloj ti noj ta avo'nton ti yit'ixale, ti pech'bil chuculot yu'un ti mulile. 24Xi laj stac' ti Simone: —Vocoletanic ta sc'anbel vocol ti Dios ta jtojol un chae yo' mu xc'ot ta pasel ti va'i s'elan laj avalbeicune. 25C'alal laj yo'ntonic ta yalel ti sc'op Diose, ti jcholc'opetique ech' yalic ti lequil ach' c'op ta bic'tal jteclumetic ti oy ta yosilal Samaria c'alal sutic ech'el ta Jerusalene. 26Xi albat yu'un yajánjel Dios ti Felipee: “Lican, va'lan, batan ta be ti oy ta yolon ti yac'ol xocon smaleb c'ac'ale, ti ta xyal talel ta Jerusalén ta xc'ot ta jteclum Gazae.” Ti be taje, ta x'ech' ta xocol banomil. 27Ti Felipee laj stam batel sbe. Ti ta be taje, laj snup sbaic xchi'uc jun vinic ti liquem talel ta Etiopía banomile. Jun capon vinic yich'oj tsots yabtel ti sventainojbe staq'uin ti me' ajvalil ta Etiopiae. Ay ta Jerusalén ta yich'el ta muc' ti Diose. 28Ta xa sut batel ta slumal. Chotol ta scarreta yacal ta sq'uel batel ti jpoc vun ts'ibabil yu'un ti j'alc'op Isaiase. 29Xi albat yu'un Ch'ul Espíritu ti Felipe: “Nopajan batel ta sts'el ti carreta le'e.” 30C'alal nopaj batel ti Felipee, laj ya'i ti xyaquet ta sq'uel ti jpoc vun ts'ibabil yu'un ti Isaiase. Va'i un, xi laj sjac'bee: —¿Mi xava'ibe smelol ti c'usi ta xaq'uele? 31Xi laj stac' ti etiope vinique: —¿C'usi chcut ta xca'ibe smelol c'alal mu'yuc buch'u ta xalbune? Ti vinique laj yalbe ya'i ti Felipee, ti ac'o muyuc ta chotlej xchi'uque. 32Yu'un xi ta xal ti bu ta sq'uel batel ti ch'ul c'ope: “Jech c'u cha'al jcot chij ic'bil batel ta smilobil, jech c'u cha'al jcot ch'iom chij mu'yuc c'usi sna' xal c'alal ta xich' loc'bel ti stsotsile, ja' jech s'elan ti vinique, mu'yuc bu c'opoj jbeluc. 33Laj yich' ilbajinel. Mu'yuc laj xchapanbeic sc'oplal. ¿Buch'u xu' ta xalbe sc'oplal ti snitilultaque c'alal tub ti xcuxlejal li' ta banomile?” 34Ti vinic ti yich'oj tsots yabtele, xi laj sjac'be ti Felipee: —Avocoluc, albun ca'i, ¿buch'u sc'oplal ti va'i s'elan ta xal ti j'alc'ope? ¿Mi ja' sc'oplal stuc, mi sc'oplal yan? 35Va'i un, ti Felipee lic to sjambe smelol ti bu yacal ta sq'uel batel ch'ul c'op ti etiope vinique. Laj yalbe ya'i sc'oplal ti lequil ach' c'op yu'un ti Jesuse. 36C'alal yacalic ta xanobale, c'otic bu oy ti vo'e, xi laj yal ti vinic ti yich'oj tsots yabtele: —Oy li' vo'e, ¿mi xu' ta xquich' vo' xana'? 37Xi laj stac' ti Felipee: —Mi c'otem ta sjunul avo'nton ta xch'unel ti Cajvaltique, xu' unbi. Xi laj stac' ti vinique: —C'otem ta co'nton ta xch'unel ti ja' Xnich'on Dios ti Jesucristoe. 38Va'i un, ti vinique laj yal mantal ti pajesbatuc ta xanobal ti scarretae. Jmoj yalic batel xcha'vo'alic ta vo'. Laj yich' vo' ti vinique. 39C'alal sutic muyel talel ta ich' vo'e, ti Ch'ul Espíritu yu'un ti Diose, laj yic' batel ti Felipee. Ti vinic tsots yabtel yich'oje, mu'yuc xa bu laj yil ti Felipee. Xmuyubaj xa laj stam batel ti sbee. 40Ti Felipee ja' to laj yil ti oy xa ta Azoto jteclume. Ech' ta jujun jteclum ta yalilanel ti lequil ach' c'ope, c'ot c'alal to jteclum Cesarea.


Copyright
Learn More

will be added

X\