Hechos 5

1Ja'uc le'e, jech laj spas jun vinic ti sbiinoj Ananiase, Safira sbi ti yajnile, laj xchonic jsep yosilic. 2Ti vinic taje, co'ol laj scomonopic xchi'uc ti yajnil ti laj xch'ac comel j'olol ti taq'uine. Yich'oj batel ti o'lol ta stojol ti jcholc'opetique, co'ol s'elan ts'acal yilel ti taq'uine. 3Xi laj yal ti Pedroe: —Ananías, ¿c'u cha'al laj avac' abtejuc ti pucuj ta avo'nton ta sjutel c'op ta stojol ti Ch'ul Espíritu ti laj ach'ac comel o'lol ti taq'uin ti c'u yepal latojbat yu'un ti avosile? 4Ti osil ti laj achone, ¿mi yu'un ma'uc avu'un? ¿Mi yu'un ma'uc avu'un ti taq'uine? ¿C'u cha'al jech laj anop? Ma'uc laj alo'la ti buch'uuc no'oxe, yu'un ja' laj alo'la ti Diose. 5C'alal jech laj ya'i ti Ananiase, ta jech yepal toj yalel ta lum, toj chamel c'ot. Xi'ic ta j'ech'el ti buch'utic laj ya'iique. 6Va'i un, talic jun chib jva'lej viniquetic. Laj xpixic ta poc' sbec'tal stacopal ti animae. Bat smuquic. 7Ech' xa ox nan oxibuc (3) ora sjalil, ja' o och batel yajnil ti Ananiase. Mu sna' jutebuc c'usi c'ot ta pasel. 8Xi laj sjac' ti Pedro ta stojol ti antse: —Albun ca'i, ¿mi jech ono'ox yepal stojol ti avosilic jech c'u cha'al laj avalique? —Jech ma' ti stojole —xi laj stac' ti antse. 9Xi albat yu'un ti Pedroe: —¿C'u cha'al jmoj avo'ntonic ta slajeltsael ti Ch'ul Espíritu yu'un ti Cajvaltique? Ti buch'utic ay smuquic ti amalale, le' xtalique. Avi tana ta xayiq'uic batel ec. 10Ta jech yepal yal ta lum ta yoc ti Pedroe, toj chamel c'ot. C'alal ochic batel ti jmucvanejetique, chamem xa laj staic ti ants xtoque. Laj spoyic loq'uel. Bat smuquic ta xocon bu mucul ti smalale. 11Scotol ti jch'unolajeletique xchi'uc ti yan jnaclejetic ta banomile, c'alal laj ya'iic ti va'i s'elan c'ot ta pasele, xi'ic ta j'ech'el. 12Ta sba ta sat ti jnaclejetic ta banomile, oy c'usitic elom ta q'uelel ti ch'ayal ta xc'ot o'ntonal yu'unic ta spasic ti jcholc'opetique. Scotolic ta stsob sbaic ta scot-cotil coriol ti sbiinoj Salomone. 13Ac'o mi lec x'ileic, mi ja'uc ta svol sbaic xchi'uc jch'unolajel ti yane. 14Epaj ta j'ech'el ti buch'utic c'ot ta yo'ntonic ta xch'unel ti Cajvaltique c'alal ta viniquetic, ta antsetic. 15Ti jnaclejetique ta spoyic loq'uel ta calle ti jchameletic yu'unique, ti puch'ajtic no'ox yu'un xchi'uc steme, mi ja' ti svayebe. Ac'o naca no'ox squeoval ti Pedroe ta xc'ot ta stojol ti c'alal ta x'ech'e. 16Ja' jech ec ti jnaclejetic ta jujun jteclum ti jmoj joyol tsobolic xchi'uc ti Jerusalene, ta xiq'uic talel ti yajchamelique xchi'uc ti buch'utic ta x'ilbajinatic yu'un ti pucuj ti mu stac' q'uelel ti c'usi ta spase. Ta xcol scotolic. 17Ti banquilal palee xchi'uc ti saduceoetic ti jmoj sjolic xchi'uquique, lic yit'ixal yo'ntonic. 18Laj stsaquic. Laj stiq'uic ta muc' ta chuquinab ti jcholc'opetique. 19Ja'uc le'e, ta ac'ubaltic tal sjam ti' chuquinab jun yaj'ánjel ti Diose, tal sloq'ues batel ti jcholc'opetic ti xi laj yalbee: 20—Loc'an batel, batanic ta muc' ta ch'ulna. Ba albeic ya'i ti jnaclejetic ta banomil sc'oplal ti ach' cuxlejale. 21C'alal jech laj ya'iique, sob xa ta yoc'lomal batic ta ch'ulna, lic chanubtasvanicuc un. Va'i un, ti banquilal palee xchi'uc ti saduceoetique laj staic ta iq'uel scotol ti banquilal jchapanvanejetique, ja'ic ti moletic yu'un ti israele. Laj yalic mantal ti yich'uc loq'uesel talel ta chuquinab ti jcholc'opetique. 22C'alal c'otic ta chuquinab ti mayoletique, mu'yuc xa tey tiq'uil laj staic, sutic batel 23ti xi c'ot yalique: —Lec bajal laj jtacutic ti ti' chuquinabe. Ti soldadoetique va'al xchabiojic ti ti' chuquinabe. Ja'uc le'e, c'alal laj jamcutique, mu'yuc xa buch'u junuc laj jtacutic. 24C'alal jech laj ya'iic ti banquilal palee xchi'uc ti banquilal jchabiej ch'ulnae, xchi'uc ti paleetique, xi lic sjac'be sbaique: —¿Bu to ono'ox c'alal ta xpaj ti c'op taje? 25C'alal jech ta xalbe sbaique, ja' o tal jun vinic ti xi vul yale: —Ti viniquetic laj atiq'uic ta chuquele, oyic xa ta ch'ulna ta xchanubtas ti jnaclejetique. 26Ti banquilal yu'un ti jchabiej ch'ulnae, jmoj xchi'uc ti mayoletic yu'une, ba stsaquic talel ti jcholc'opetique. Ta lec xa no'ox laj yiq'uic talel, ta scoj xi'el mi ta xich'ic pujel ta ton yu'un ti jnaclejetique. 27C'alal c'otique, laj yiq'uic batel ti bu tsobolic ti banquilal jchapanvanejetique, ti xi albatic yu'un ti banquilal palee: 28—J'ech'el, jbel sc'oplal laj calboxuc ava'iic ti vu'uncutique, mu xa xavalbe sc'oplal ti vinic taje. ¿Bu bat avu'unic ti mantal une? Yu'un xpuquet no'ox avu'unic ta sjunul Jerusalén ti chanubtasele. Ma'uc no'ox taje, yu'un ta xacajan ta jbacutic ti cham ti vinique. 29Ti Pedroe xchi'uc ti yan jcholc'opetique xi tac'avique: —Yu'un tsots sc'oplal sc'an ch'unbel smantal ti Diose, ja' cabtelcutic, manchuc mi mu lecuc ta xa'i ti jnaclejetique. 30Ti Dios yu'un ti jmolmuc'totique laj xcha'cuxes ti Jesús ti Buch'u laj amilic ti laj ajipanic ta curuse. 31Ti Jesuse ich'e xa ta muc' yu'un ti Diose, aq'ue xa chotiuc ta sts'el sbats'i c'ob. C'ot xa ta Banquilal Ajvalil, ta Jcoltavanej yu'unic, yo' jech ti muc' ta lum Israele suticuc talel ta stojol ti Diose, yo' ta staic ti ch'aybil ta xc'ot ti smulique. 32Ti jech taje, rexticouncutic xchi'uc ti Ch'ul Espíritu ti ac'batic yich'ic yu'un Dios ti buch'utic ta xch'unbeic ta spasbel ti c'usi lec ta xile. 33C'alal jech laj ya'iique, cap sjolic ta j'ech'el, yo'ntonuc smilic ya'iic. 34Ta scotolic ti jchapanvanejetique, oy jun fariseo ti sbiinoj Gamaliel ti ich'bil ta muq'ue, ja' jun banquilal jchanubtasvanej yu'un ti oy c'usi jbel tsots albil sc'oplale. Laj yal mantal ti yich'uc loq'uesel jliqueluc ti jcholc'opetique, 35ti xi laj yalbe ya'i ti jchapanvanejetique: —Jchi'iltac, bijanic ti c'usi ta xapasic ta stojol ti viniquetic li'e. 36Vuleso ta avo'ntonic sc'oplal ti Teudas ta vo'nee. Ti Teudase laj snop ti cajal xa'i sbae. Ts'aclie batel yu'un nopol chanib ciento (400) ta vo' viniquetic. Ja'uc le'e laj ta milel. Tan puc bat ti xchi'iltaque. Ts'ij xi sc'op. 37Ta ts'acal to un, c'alal ja' o sc'ac'alil ti tsacob-biile, lic sva'an sba ta contrainvanej ti Judas liquem talel ta Galilea banomile. Ts'aclie batel yu'un epal viniquetic. Laj smilic ec un. Tan puc bat ti svinictaque. 38Ta xcalboxuc ava'iic, ch'an utic ti viniquetic li'e. Mu xatic' abaic ta stojolic. Mi ta sjol no'ox jun vinic ti vi s'elan liquem ti c'op le'e, ta xlaj x'ech' sc'oplal. 39Yan mi liquem talel ta stojol Dios ti vi s'elan le'e, mu xch'ay ti sc'oplale. Mi ja'uc stsal avu'unic. Bijanic, naca me ja'uc ta xacontrainic ti Diose. Ti va'i s'elan laj ya'iique, c'ot ta yo'ntonic. 40Laj yiq'uic ochel ti jcholc'opetic ta stojol ti jchapanvanejetique. Laj yac'beic yich' nucul. Laj yalbeic ti mu xa xalbeic sc'oplal ti Jesuse. Ts'acal to laj scoltaic batel. 41Ti jcholc'opetique xmuyubajic xa loq'uic batel ta stojol ti jchapanvanejetique ti jech c'ot ta nopel yu'un Dios ti laj yac' c'otuc ta stojolic ti vocole, ti ilbajinel ta sventa ti Jesuse. 42Jujun c'ac'al ta xchanubtasvanic. Ta xalbel sc'oplal ti Jesucristoe jech c'u cha'al ta ch'ulna, mi ta naetic.


Copyright
Learn More

will be added

X\