Hechos 14

1C'alal oyic ta Iconio ti Pabloe, ti Bernabee, ochic batel ta ch'ul na yu'un ti israeletique. Yepal no'ox israeletic xchi'uc jyanlumetic c'ot ta yo'ntonic ta xch'unel ta sventa ti oy stsatsal ti sc'opique. 2Ja'uc ti israeletic ti mu xc'ot ta yo'ntonic ta xch'unele, laj stijbeic sjol ti jyanlumetic ti socuc sjolic ta stojol ti Pabloe, ti Bernabee. 3Manchuc mi jech un, ti jcholc'opetique jal comic ti bu taje. Mu ta xi'eluc ta xc'opojic ta sventa ti spatoj yo'ntonic ta stojol ti Diose, xchi'uc ja' stuc Dios ta svinajes ti c'alal ta xalic ti oy syail xc'uxul yo'ntone, xchi'uc ac'bat yip stsatsalic yo' ta xaq'uic ta ilel ti oy c'usi ch'ayal ta xc'ot o'ntonal yu'unique. 4Ja'uc ti jnaclejetic ta muc' ta lume, cha'voc' spasoj sbaic. Ti jlome oyic ta stojol ti israeletique. Ti jlome oyic ta stojol ti jcholc'opetique. 5Va'i un, ti israeletique, ti jyanlumetique laj scomonop sc'opic xchi'uc ti j'opisialetic yo' ta xilbajinic xchi'uc ta spujbel ton ti jcholc'opetique. 6Ja'uc ti c'alal ya'i ti Pabloe, ti Bernabee, jatavic batel ta jteclum Listra xchi'uc ta jteclum Derbe, jteclumetic ti oy ta Licaonia banomile, xchi'uc ta sjoylejal ti bu taje. 7Tey xanavic ta yalolanel ti lequil ach' c'ope. 8Ti ta Listrae, oy jun vinic mu stac' xanav. Mu'yuc xanav o, yu'un coxov voc'. 9Ts'etel xchiquin ta xa'i c'usi ta xal ti Pabloe. Ti Pabloe laj stuc'ulan lec. Laj yil ti juteb ta yo'nton sc'an ta xcol ya'ie. 10Va'i un, xi tsots laj yalbee: —Lican, tuc' xava'an aba. Ti coxov vinique bituj xi, va'al c'ot, lic xanavuc. 11C'alal laj yilic ti jnaclejetic jech laj spas ti Pabloe, xi lic avanicuc ta sc'op stuquic ti licaoniaetique: —Co'ol s'elan vinic yal talel ti diosetic ta jtojoltique. 12Ti Bernabee laj sbiin yu'un dios Júpiter. Ti Pabloe laj sbiin yu'unic dios Mercurioe, yu'un ja' oy ta ye ta sti' ti c'opojele. 13Ti pale ti sventainojbe xch'ul na ti dios Júpiter ti oy ta ochebal yu'un ti jteclume, laj yich' talel vacaxetic xchi'uc nichimetic, yu'un ti stuque xchi'uc ti jnaclejetique ta ox xac'beic milbil matanal. 14Ja'uc ti c'alal laj yilic ti Pabloe, ti Bernabee, laj xch'i' ta jatel ti sc'u'ique, ti xi x'avetic xa laj stic' sbaic ochel ta stojol ti jnaclejetique: 15—Jchi'lactic, ¿c'u cha'al jech ta xapasic le'e? Vinicuncutic no'ox jech c'u cha'al ti vo'oxuque. Ti jech litalcutic li'e, ja' tal calcutic ava'iic ti lequil ach' c'ope yo' ta xavictaic ta spasel ti vi s'elan le'e, ti ma'uc toj tsots sc'oplale. Sutanic xa talel ta stojol ti cuxul Dios ti Buch'u laj spas ti vinajele, ti banomile, ti muc' ta nabe, xchi'uc scotol ti c'usitic oye. 16Ta vo'ne talele, ti Diose laj yac'be comel ta sba ti jnaclejetic ta spasel ti c'usi sc'an ti yo'ntonique. 17Yu'un mu'yuc laj yicta sba ta yaq'uel sba iluc, ta spasel ti c'usi leque. Yu'un ta ono'ox xac' sba iluc ti Buch'ue, yu'un ja' ta xac'boxuc talel ti vo'e, ti lec ta xch'i ti ats'unobique, xchi'uc ta yac'beloxuc ti yepal no'ox ave'el avuch'omique yo' xamuyubajic. 18Manchuc mi jech laj yalic ti jcholc'opetique, toj vocol pajtsaj yu'unic ti jnaclejetic ti oy ta yo'ntonic ta smilic ti vacaxetic ta sventa matanale. 19Ti jech xyaquet taje, ja' o c'otic jun chib israeletic liquemic talel ta Antioquiae, ta Iconio jteclume, ti laj syanijesbeic yo'ntonic ti jnaclejetic taje. Va'i un, laj spujbeic ton ti Pabloe. Yac'toicuc ti cham xa yu'unique. Laj xjochic loq'uel ta sti'il jteclum. 20Ja'uc ti c'alal laj stsob sbaic ta joyob ti jch'unolajeletic ti bu bitsil ti Pabloe, va'i liquel. Och batel xtoc ta jteclum. Ta yoc'lomal un, loc' batel xchi'uc ti Bernabee. Batic ta Derbe jteclum. 21Yepal no'ox c'ot ta yo'ntonic ta xch'unel lequil ach' c'op ti jnaclejetic ta Derbe jteclum c'alal laj yich'ic albele. Ts'acal to un, ti jcholc'opetique sutic batel xtoc ta Listra, ta Iconio, ta Antioquía jteclum. 22Ti bu taje, ech' stsatsubtasbe yo'ntonic ti jch'unolajeletique, ti mu stsiq'ues yo'ntonic ta xch'unel ti Cajvaltique, xchi'uc laj yalbe ya'iic ti buch'u ta x'ochic batel ta ventainel yu'un ti Diose, ta xc'ot ta stojolic ti vocole. 23Ja' jech xtoc laj sva'anic ancianoetic ta jujun tsobobbail. C'alal laj yo'ntonic ta c'opojel ti'inel ta scomtsanel ti yotique, laj yac'beic comel ta yoc ta sc'ob Dios ti Buch'u c'ot ta yo'ntonic ta xch'unele. 24Ech'ic ta yosilal Pisidia banomil, c'otic ta Panfilia jteclum. 25Laj yalic ti lequil ach' c'op ta Perge jteclume. Batic c'alal to Atalia jteclum. 26Ti bu taje, ochic ech'el ta jun barco yo' ta sutic batel ta Antioquía jteclum, ta jteclum ti bu c'ubanatic yu'un Dios ta yabtelanel yalel ti syail xc'uxul yo'ntone, ti c'ot ta tsutsel yu'unique. 27C'alal c'otic ta jteclum Antioquiae, laj stsobic talel ti jch'unolajeletic ta yalbeic ya'i ti c'usi laj spas ti Dios ta stojolique, xchi'uc ti c'u s'elan abtej ta sjamel be ta stojol ti jyanlumetique yo' ta xc'ot ta yo'ntonic ta xch'unic ec. 28Ti bu taje, ti Pabloe, ti Bernabee jal comic ta stojol ti jch'unolajeletique.


Copyright
Learn More

will be added

X\