Hechos 11

1Ti yan jcholc'opetique xchi'uc ti jch'unolajeletic oyic ta Judea banomile, laj ya'ibeic sc'oplal ti jyanlumetic ti tac'al c'ot ta yo'nton ta xch'unel ti sc'op Diose. 2Ja'uc ti c'alal sut batel ta Jerusalén ti Pedroe, vule yu'un ti jch'unolajeletic ti buch'u tsots sc'oplal ta xa'i ti circuncisione, 3ti xi laj sjac'beique: —¿C'u cha'al ay atsob abaic xchi'uc ti jyanlumetique, ti jmoj lave' laj avuch'ic vo' xchi'uque? 4Ti Pedroe xi xcholet laj xchapbe ya'i scotol ti c'usi laj yil ic'ot ta pasele: 5—Ti vu'une oyun ta jteclum Jope. Ti c'alal yacal ta xic'opoj xiti'ine, xi s'elan li'ac'bat quile: Laj quil co'ol s'elan jlic muc' ta manta ti xlich'et yal talel ta vinajele. Chucbil xchanjotal ti sba sni'e, vul ti bu oyune. 6Laj jq'uel lec ti c'usi tiq'uil ta yute. Laj quil ti tiq'uil talel chonetic ti oy chanib yacane, xchi'uc jtos o ta chonetic, xchi'uc yan chonetic, xchi'uc mutetic. 7Laj ca'i ti oy Buch'u ta xc'opoj ti xi laj yalbune: ‘Pedro, lican, milo, ti'an.’ 8Ti vu'une xi laj jtac'bee: ‘Mu jc'an, Cajval, mu bac'niuc jna' jti' ti c'usi mu'yuc slequile, ti albil sc'oplal ti mu stac' lajesele.’ 9Va'i un, ti Buch'u ta xc'opoj talel ta vinajele xi laj yalbune: ‘Ti c'usi lecubtasbil pocbil yu'un ti Diose, mu xavalbe sc'oplal ti mu'yuc slequile.’ 10Ti jech taje, oxcoj c'ot ta pasel. Ts'acal to un, ti co'ol s'elan mantae cha'sut muyel ta vinajel. 11Ti jech taj une, ja' o c'otic oxib viniquetic ta na ti bu oyune, ti liquemic talel ta Cesarea ta sa'elune. 12Ti Ch'ul Espiritue laj yalbun ca'i ti mu xina'etuc ta xchi'inel batel ti j'ic'vanejetique. Ay xchi'inicun ec ti vaquib (6) jch'unolajeletic li' oyique. Jcotolcutic li'ochcutic batel ta sna ti vinic taje. 13Laj yalbuncutic ti laj yil ti va'al c'ot jun ánjel ta sna ti xi i'albate: ‘Taco batel avinictac ta jteclum Jope yo' ta xiq'uic talel ti Simone, Pedro ti yan sbi xtoque. 14Ja' ta xayalbot ava'i c'u s'elan ta xata ti coltaele xchi'uc ti c'u yepal oy ta anae.’ 15C'alal laj calbe ya'iic sc'oplal ti coltaele, ja' o tal ti Ch'ul Espíritu ta stojolic ti co'ol s'elan jech c'u cha'al ba'yel tal ta jtojoltique. 16Va'i un, ja' o vul ta co'nton jech c'u cha'al ti xi laj yal ti Cajvaltic Jesuse: ‘Melel, ti Juane laj yac' ich' vo'. Ja'uc ti vo'oxuque ta xavich'ic ti Ch'ul Espiritue.’ 17Mi jech laj spas ti Dios ti laj yac'be yich' Ch'ul Espíritu ti jyanlumetic jech c'u cha'al laj quich'tic c'alal c'ot ta co'ntontic ta xch'unel ti Cajvaltic Jesucristoe, ¿buch'uun ya'yel un cha'e ti ta jmacbe yabtel ti Diose? 18Ti jch'unolajeletic ta Jerusalén c'alal laj ya'iic ti va'i s'elan taje, laj yicta sbaic ta vulvanej. C'ajomal lequil c'opojic ta stojol Dios ti xi laj yalique: —Ati chcaltic un cha'e, stic'oj sba Dios ta stojol ti jyanlumetique yo' ta sutic talel ta stojol, ta stael ti xcuxlejalic sbatel osile. 19Ti israelal jch'unolajeletic ti laj tanijicuc batel c'alal laj yich' milel ti Estebane, oy jlom batic ta Fenicia banomil, ta Chipre banomil, ta Antioquía jteclum. Ti bu taje, lic yalic ti lequil ach' c'op ta stojol ti xchi'il sbaic ta israele. Ti jyanlumetique mu'yuc laj yalbeic. 20Manchuc mi jech un, oy jlom jch'unolajeletic liquemic talel ta Chipre, ta Cirene, ti c'otic ta jteclum Antioquiae. Lic yalbeic lequil ach' c'op yu'un ti Cajvaltic Jesús ti jyanlumetique. 21Ti jch'unolajeletic taje, oy ta stojolic smuc'ul stsatsal ti Diose. C'ot ta pasel un, yepal no'ox jyanlumetic laj yictaic comel ti c'u s'elan liquem to ox yu'unic ta xch'unele. Ja' c'ot ta yo'ntonic ta xch'unel ti Cajvaltique. 22C'alal laj ya'iic ti jch'unolajeletic ti oyic ta Jerusalene, laj staquic batel ti Bernabe c'alal to Antioquiae. 23C'alal c'ot ti Bernabee, laj yil ti sva'anoj sba ti Dios ta stojol ti jyanlumetique, ti xmuyubaj xa ta j'ech'ele. Laj sbijubtasan scotol ti junuc yo'ntonic sts'acliicuc batel ti Cajvaltique. 24Yu'un ti Bernabee ja' jun lequil vinic. Ventainbil yo'nton yu'un ti Ch'ul Espiritue, xchi'uc c'otem ta yo'nton ta xch'unel ti Cajvaltique. Yepal no'ox jnaclejetic ti junaj sjol yo'nton xchi'uc ti Diose. 25Laj taj une, ti Bernabee bat ta jteclum Tarso ta sa'el ti Sauloe. C'alal laj sta ta sa'ele, laj yic' batel c'alal to Antioquía. 26Ti bu taje, jun jabil laj stsob sbaic xchi'uc ti jch'unolajeletique, ti yepal no'ox jnaclejetic laj xchanubtasic. Ti ta Antioquía taje, ja' ti bu lic talel ti laj sbiinic “cristiano” ti jch'unolajeletique. 27Ti jech yorail taje, oy jun chib j'alc'op viniquetic ti loq'uic ta Jerusalene, batic ta jteclum Antioquía. 28Oy jun yu'unic ta scotolic ti sbiinoj Agaboe, ta sventa ti ventainbil yo'nton yu'un ti Ch'ul Espiritue, lic sva'an sba ta yalel ta stojol ti jch'unolajeletique, ti ta xtal muc' ta vi'nal ta sjunul ti banomile. Jech ono'ox c'ot ta pasel c'alal tiq'uil ta ajvalil ti Claudioe. 29Va'i un, ti jch'unolajeletic ti oyic ta jteclum Antioquiae, loc' ayan ta yo'ntonic c'u yepal xu' yu'unic ta jujun tal ta scoltaic ti jch'unolajeletic ti oyic ta Judeae. 30Ja' jech laj spasic ti laj stacbeic batel ti matanal yo' ta xich'ic ti Bernabe xchi'uc ti Sauloe, yo' ta xac'beic ti ancianoetic ti oyic ta Judea ti matanale.


Copyright
Learn More

will be added

X\