Hechos 10

1Ti ta jteclum Cesareae oy jun vinic, Cornelio sbi, banquilal yu'un ti jvoc' soldado sbiinoj Italianoe. 2Jun vinic ti oy yutsil slequil yo'ntone, ti yich'ojic ta muc' Dios xchi'uc ti c'u yepal oy ta snae. Ja' jech xtoc ta xc'uxubin ti israeletic ti buch'u abol sbaique, ti mu xicta sba ta c'opojel ti'inele. 3Oy jun c'ac'al ti nopol xa batel oxib ora mal c'ac'ale, xi s'elan oy c'usi ac'bat yil: ti ja' jun yaj'ánjel Dios laj yil ti och batel ti bu oye, ti xi albate: —Cornelio. 4Ti Cornelioe sq'uel xcha' batel ti ánjele, ti xi'el xa xi laj sjac'bee: —¿C'usi ta xaval, Yojtot? Xi laj yal ti ánjele: —Ich'bil ta venta yu'un Dios ti ac'opojel ati'inele, xchi'uc ti ta xacolta ti buch'u abol sbaique. 5Taco batel avinictac ta jteclum Jope yo' chba yic' talel ti Simone, ti Pedro ti yan sbi xtoque, 6ti xch'amunojbe sna jun jc'a'esej-nucul ti Simón sbi ti nopol oy ta ti' nab ti snae. Ja' ta xalbot ava'i ti Pedro ti c'usi xu' ta xapase. 7C'alal bat ti ánjel ti c'opone yu'une, ti Cornelioe laj sta ta iq'uel cha'vo' svinic xchi'uc jun yajsoldado ti sna' xich' ta muc ti Diose xchi'uc lec xil sbaic. 8C'alal laj xa yalbe scotol ti c'u s'elan laj yile, laj stac batel c'alal to ta jteclum Jope. 9Ta yoc'lomal un, c'alal nopol xa sc'an xc'otic ta jteclum Jopee, ti Pedroe ja' o imuy batel ta xcha'cojal na yo' ta xc'opoj xti'in, yu'un nopol xa sc'an o'lol c'ac'al. 10Ta xa xvi'naj, sc'an xa ve'uc ya'i. C'alal yacal to ta xich' meltsanel ti ve'lile, ja' o oy c'usi laj yil ti xi s'elane: 11Laj yil ti jam ti vinajele. Jun to muc' ta manta s'elan xlich'et yalel talel ta banomil, ti chucajtic xchanjotal ti sba sni'taque. 12Ti ta mantae, tic'ajtic ep ta tos chonetic ti oy chanib yacane, yan chonetic, xchi'uc mutetic. 13Ja' o laj ya'i ti oy Buch'u ta xc'opoj ti xi ta xale: —Pedro, lican, va'lan, milo, ti'an. 14Xi laj stac' ti Pedroe: —Mu jc'an, Cajval, yu'un mu'yuc bu jti' o ti c'usi mu'yuc slequile xchi'uc ti c'usi albil sc'oplal ti mu stac' ti'ele. 15Xi c'opoj xtoc ti Buch'u ta xc'opoje: —Ti c'usi lecubtasbil pocbil yu'un ti Diose, mu xavalbe sc'oplal ti mu'yuc slequile. 16Ti jech taje, oxcoj c'ot ta pasel. Ts'acal to un, ti co'ol s'elan mantae cha'muy batel ta vinajel. 17C'alal ch'ayal yo'nton ti Pedro ta snopilanel c'usi xal o ti c'usi laj yile, ja' o c'otic ta ti'na svinictac ti Cornelioe, ti laj sjac'olanic talel sna ti Simone. 18C'alal c'otique, xi jamal yeic c'ot sjaq'uique: —¿Mi li' oy ta xch'amun ana jun vinic ti ja' Simón sbie, ti yan sbi ja' Pedroe? 19C'alal jech ch'ayal yo'nton ti Pedro ta snopilanel ti c'usi laj yile, xi albat yu'un ti Ch'ul Espiritue: “Q'uelo avil, tal sa'ot oxib viniquetic. 20Va'lan, yalan batel, mi ja'uc xana'et ta xachi'in batel, yu'un jtacoj talel.” 21Yal batel ti Pedroe, ti xi laj yalbe ti viniquetic ti tacbilic batel yu'un ti Cornelio: —Vu'unun ti buch'u ta xasa'ique. ¿Mi yu'un oy c'usi ta xavalic? 22Xi laj staq'uic ti viniquetique: —Tacbiluncutic talel yu'un ti banquilal soldado Cornelioe, jun lequil vinic ti xi'taoj ti Diose, ti lec sc'oplal yu'un ti israeletique. Albat yu'un jun yaj'ánjel Dios ti ac'o avich' iq'uel batele yo' ta xabat ta sna yo' ta xa'i ya'iic ti c'usi ta xavalbee. 23Va'i un, ti Pedroe laj yic'an ochel ta na ti viniquetique, jmoj ech' yu'unic ti ac'ubale. Ta yoc'lomal un, batic xchi'uc ti j'ic'vanejetic ti Pedroe, xchi'uc jun chib jch'unolajeletic ti nacajtic ta jteclum Jopee. 24Ta yan c'ac'al un, c'otic ta Cesarea ti bu ta xmalaatic yu'un ti Cornelioe, ti jmoj xa tsobolic xchi'uc ti yuts' yalaltaque, xchi'uc ti buch'u lec xil sbaic xchi'uc ti ic'bilic yu'une. 25C'alal c'ot ta na ti Pedroe, ti Cornelioe loc' batel, ba snup talel ta be, quej xi ta stojolal ta yich'el ta muc'. 26Xi laj yal ti Pedroe: —Mu xaquejan aba ta jtojol, va'lan. Vinicun no'ox jech c'u cha'al ti vo'ote. 27Yacal ta xlo'ilajic batel, ochic batel ta na, ti yepal xa oy buch'utic tsobolic xa laj stae. 28Xi lic c'opojuc ti Pedroe: —Ti vo'oxuque xana'ic lec c'u s'elan liquem yu'unic ti israeletique, ti mu xu' ta jtsob jbacutic xchi'uc ti jyanlumetique. Mi ja'uc xu' ta xi'ochcutic ta yut snaic. Ja'uc le'e, laj xa yac'bun quil ti Diose ti mu junuc buch'u xu' ta xcalbe ti mu'yuc slequile, ti mu'yuc yutsile. 29Ta jech yepal c'alal laj ataicun ta iq'uele, lital ta anil no'ox. Mu'yuc laj jpajes jba. Jech o xal un, albun ca'i, ¿c'u cha'al laj ataicun ta iq'uel? 30Xi laj stac' ti Cornelioe: —Oy xa ta xchanibal c'ac'al, jech ora jech c'u cha'al li'e, ja' o li' oyun ta jna ta yictael cot ta c'opojel ti'inel sventa mal c'ac'al. Ta jech yepal laj yac' sba iluc jun vinic ta jtojol ti xojobin no'ox xojobal ti sc'u' slapoje. 31Xi laj yalbune: ‘Cornelio, ti Diose laj xa ya'i ti ac'opojel ati'inele xchi'uc laj svules ta yo'nton ti ta xacolta ti buch'u abol sbaique. 32Jech o xal un, Cornelio, taco batel avinictac c'alal to jteclum Jope yo' jech ta xba yiq'uic talel ti Simone, ti ja' Pedro ti yan sbie. Xch'amunojbe sna jun jc'a'esej-nucul vinic ti Simón sbie, ti nopol ta ti' nab nacale. Ta xachi'in abaic ta lo'il c'alal mi talele.’ 33Jech o xal un, ta ora no'ox laj jtac batel jvinictac ta sa'elot, ti loc' ayan ta avo'nton latale. Li' tana une, tsobolotic ta stojol ti Diose, ti ts'etel jchiquincutic ta ya'yiel scotol ti c'u s'elan la'ac'bat ana' yu'un ti Diose. 34Va'i un, xi lic yal ti Pedroe: —Avi tana un, jna' lec, ti Diose mu jeltosuc yo'nton ta spas ta stojol ti jnaclejetic ta banomile. 35Yu'un buyuc no'ox muc'tiquil lum, ich'bil ta muc' yu'un ti buch'utic ta xi'taique, xchi'uc ti lec c'usi ta spasique. 36Ti Diose laj yac' ta a'yiel sc'oplal ti ta sventa Jesucristo ta staic ti ch'abal sc'opic xchi'uc Dios snitilul ti Israele, yu'un ti Jesucristoe c'ot ta Ajvalil yu'un scotol. 37C'alal laj yo'nton ti Juan ta yalel ti lequil ach' c'ope, xchi'uc ta yaq'uel ti ich' vo'e, ana'ojic lec c'usi c'ot ta pasel ta sjunul ti Judea banomile, ti lic talel ta Galilea banomile. 38Xana'ic lec xtoc, ti Diose laj yac'be yich' smuc'ul stsatsal xchi'uc Ch'ul Espíritu ti Jesús ti liquem talel ta Nazarete yo' xu' yu'un ta spasel ti c'usi leque, ta scolesanel ti buch'utic ta x'ilbajinatic yu'un ti pucuje. Jech laj spas, yu'un chi'inbil coltabil yu'un ti Diose. 39Rexticouncutic ti jech laj spas ti Jesús ta sjoylej Judea banomil xchi'uc ta jteclum Jerusalén. Ts'acal to un, jipil ta curus cham yu'unic. 40Ja'uc le'e, ta yoxibal c'ac'al cha'cuxesat yu'un ti Diose. Ti Diose c'ot ta pasel yu'un ti laj yac' quilcutic no'ox xtoque. 41Mu ta sjunuluc jteclum laj yac' sba iluc. Ja' no'ox laj yac' sba iluc ta jtojolcutic ta sventa ti jech ono'ox nopbil jc'oplalcutic yu'un Dios ti ta xic'otcutic ta yajrexticoe. Yu'un jmoj live'cutic, laj cuch'cutic vo' xchi'uc ti Jesús c'alal cha'cuxiem xae. 42Laj stacuncutic ta yalbel ya'iic ti jteclumetique, ti Diose laj sva'an xa jun Jchapanvanej ta sventainel ti buch'u cuxule xchi'uc ti buch'u chamemique. 43Scotol ti j'alc'opetique laj xa ono'ox yalic talel sc'oplal ti Jesuse, xchi'uc laj yalic ti buch'u ta xc'ot ta yo'ntonic ta xch'unele, ta staic ti ch'aybil ta xc'ot ti smulic ta sventa ti Jesuse. 44C'alal jech syaquil ta xc'opoj ti Pedroe, ja' o ital ti Ch'ul Espíritu ta stojol ti c'u yepal ta xa'ibeic ti sc'ope. 45Ti jch'unolajel israeletic xchi'inojic talel ti Pedroe, toj elom laj ya'iic ti jech laj yich'ic Ch'ul Espíritu ti jyanlumetique. 46Yu'un laj ya'iic ti c'opojic ta yan c'opetic xchi'uc ta slequil-c'optael ti Diose. 47Va'i un, xi laj yal ti Pedroe: —Ti jech laj xa yich'ic Ch'ul Espiritue jech c'u cha'al ti vo'otique, ¿mi oy buch'u ta xmacbun yo'nton ta yich'el vo' ti jyanlumetic xana'ique? 48Laj yal mantal ti Pedroe, ti ac'o yich'ic vo' ta sventa ti Jesucristoe. Ts'acal to un, ti jyanlumetique laj sc'anbe vocol ti Pedroe ti ac'o comuc to jun chibuc c'ac'al ta stojolique.


Copyright
Learn More

will be added

X\