Hechos 1

1Teófilo, ti lec xquil jbatique, ti ba'yel jpoc vun ti laj jts'ibabot talele, ja' laj calbot ava'i scotol ti c'u s'elan lic abtejuc, ti c'u s'elan lic chanubtasvanuc ti Jesuse, 2xchi'uc ti c'alal laj sta sc'ac'alil muy batel ta vinajele. C'alal mu'yuc to ta xmuy batel ta vinajele, ta sventa ti Ch'ul Espiritue laj yalbe ya'iic c'u s'elan stac' ta spasic ti yajcholc'optac ti st'ujoj xa ono'oxe. 3Ti jech x'ech' xnel xa svocol ti Jesuse, laj yac' sba iluc ta stojol ti yajcholc'optaque, laj yac' sba iluc ti cuxule. Cha'vinic (40) c'ac'al laj yac' sba iluc ta stojolic xchi'uc laj yalilanbe sc'oplal ti ventainel yu'un ti Diose. 4C'alal xchi'inojan to ox ti yajcholc'optaque, ti Jesuse laj yalbe ya'iic ti mu to xloq'uic batel ta jteclum Jerusalene, ti xi laj yalbee: —Malaic li'e, c'otuc ta pasel ti oy c'usi laj yalboxuc sc'oplal ti Jtot ti ta xac' avich'ique jech c'u cha'al laj calboxuc ava'iique. 5Ta melel, ti Juane, vo' laj yac' ta ich'el, ja'uc ti vo'oxuque jutuc xa sc'an ta xavich'ic ti Ch'ul Espiritue. 6Ti buch'utic jmoj vololic xchi'uc ti Jesuse, xi laj sjaq'uique: —Cajval, ¿mi ja' xa yorail li'e ti ta xavac' jventain jba jtuccutic ti israeluncutique? 7Xi tac'av ti Jesuse: —Le'e, ja' yabtel stuc ti Jtote. Yu'un sna'oj stuc ti c'usi ora ta spase. Ma'uc aventaic ti vo'oxuque. 8Ja'uc ti c'alal ta xavich'ic ti Ch'ul Espiritue, ta xac'boxuc atsatsalic avipic yo' jech ta xaloq'uic batel ta yalel ti jc'oplale. Ta xlic avalic liquel li' ta Jerusalene, ta sjunul slumal ti Judeae, ta sjunul slumal ti Samariae, ta sjoylej ti banomile. 9Ti jech laj yal taj une, c'alal jech va'al sq'uelojic to oxe, ti Jesuse ic'bil bat ta vinajel ti volibil muy ta toc ti ch'ay batel ta satique. 10C'alal jech sq'uelojic ta xmuy batel ta vinajel ti Jesús ti ta xnamaj ech'el ta stojolique, ja' o laj yilic va'al ta sts'elic cha'vo' viniquetic ti sac ti sc'u' slapojique. 11Xi laj yalic ti cha'vo' viniquetique: —Galilea viniquetic, ¿c'u cha'al ch'ayal xa avo'ntonic va'aloxuc ta sq'uelel muyel ti vinajele? Ti Jesús ti li' imuy batel ta atojolique, ja' no'ox jech ta xcha'sut talel jech chac c'u cha'al laj avilic muy batel ta vinajele. 12Loq'uic ech'el ti jcholc'opetic ti bu oy ti vits sbiinoj Olivose yo' ta sutic batel ta Jerusalén. Ti vits Olivose mu nomuc xil sbaic xchi'uc ti Jerusalene. Ja' no'ox jech snatil xanavic ti ja'uc no'ox ich'bil stsail c'u s'elan ta xal ti oy c'usi tsots albil sc'oplal ta sventa ti sc'ac'alil cuxob o'ntonale. 13C'alal c'otic ta Jerusalene, muyic batel ta xcha'cojal na ti bu ono'ox oyique. Ti ta scotolic taje, tey oyic ec ti Pedroe, ti Jacoboe, ti Juane, ti Andrese, ti Felipee, ti Tomase, ti Bartolomee, ti Mateoe, ti Jacoboe, ti xnich'on ti Alfeoe, ti Simón ti buch'u tiq'uil to ox ta partido cananistae, xchi'uc ti Judas xchi'il ta voq'uel ti Jacoboe. 14Scotolic taje, ta svol sbaic yo' mu xicta sbaic ta c'opojel ti'inel jmoj xchi'uc ti María sme' ti Jesuse, ti xchi'iltac ta voq'uel ti Jesuse, xchi'uc ti yan antsetique. 15Ti jech ta stsobilan sbaique, va' xi liquel ti Pedro ta yalel ti c'op ta stojol ti jch'unolajeletic ti nopol van vacvinic (120) ta vo' oyique, ti xi laj yale: 16—Jchi'iltac, ti c'u s'elan laj yal ti David ta sventa ti ventainbil yu'un ti Ch'ul Espiritue, ti laj yalbe sc'oplal ti Judas ti ts'ibabil ta ch'ul c'ope, jech ono'ox c'ot ta pasel ti ja' tun ta j'ic'vanej ti buch'utic laj stsaquic ta chuquel ti Jesuse. 17Ti Judase, ja' jchi'ilcutic, jmoj quich'oj cabtelcutic. 18Laj sman o jsep yosil xchi'uc ti taq'uin ta scoj ti c'usi chopol laj spase. Ta jech yepal pajal sjol baj yalel, toj lilijel c'ot, tanij scotol ti sbel xch'ute. 19C'alal laj ya'iic ti jnaclejetic ta Jerusalene, laj yac'be sbiin Hacéldama ti banomil taje. Ta sc'op ti stuquique, xi ta xal ti smelole: yosilal ch'ich'. 20Yu'un ta jpoc svunal ti Salmoe, xi ta xale: ‘Xocluc comuc ti snae. Mu'yuc buch'u xnaqui ti bu taje.’ Xi ta xal no'ox xtoque: ‘Va'iuc yan yajval ti yabtele.’ 21“Oy li' ta jtojoltic viniquetic ti chi'invanic ono'ox talel ti c'u sjalil li' to ox ta jtojolcutic ti Cajvaltic Jesuse. 22Ti viniquetic taje yilojic c'alal ac'bat yich' vo' ti Jesús yu'un ti Juane xchi'uc ti c'alal to imuy batel ta vinajele. Tsots sc'oplal un cha'e, yich'uc t'ujel junuc ti buch'u yilojic taje yo' jech jmoj ta jchi'incutic ta yalel ti cha'cuxi ti Jesuse.” 23Xi s'elan laj sva'anic cha'vo' viniquetic: Ti Matíase xchi'uc ti José Barsabase, ti Justo ti yan sbi xtoque. 24Xi c'opoj ti'inique: —Cajval, xavojtiquinanbe yo'nton scotol. Ac'bun quilcutic buch'u junucal laj at'uj ti cha'vo'ic li'e 25yo' ta xtun ta jcholc'op ti ta xich'be yabtel ti Judas ti ch'ay yabtel ta scoj ti smule, ti bat ono'ox ti bu loc' ta sa'el yu'une. 26Ta yorail laj sq'uelic. Ti yoraile ja' c'ot ta stojol ti Matíase. Ta jech yepal un, com yabtel xchi'uc ti buluchvo' (11) jcholc'opetique.


Copyright
Learn More

will be added

X\