2 Timoteo 3

1Ja' jech xtoc sc'an xana' c'alal slajebtic xa batel ti c'ac'ale, xi'bal sba, yu'un naca vocol ta xvul ta loq'uel. 2Ti jujun jnaclej ta banomile stuc no'ox ta xc'uxubin sbaic, c'upijem yo'ntonic yu'un ti taq'uine, stoyoj sbaic. Stuc xa no'ox lec oy ta xa'i sbaic. Ta xchopol-c'optaic ti Diose. Mu xch'unbeic smantal ti stot sme'ique. Mu sna' xalic colaval. Mi ja'uc ta xich'ic ta muc' ti oy c'usi ch'unbile. 3Mu'yuc slequilal yutsilal yo'ntonic. Mu'yuc syail xc'uxul yo'ntonic. Naca jlo'iltavanejetic ta j'ech'el. Mu cha'bel x'och ta be yu'unic ti c'usi ta sc'an ti yo'ntonique. Mu'yuc xch'ulel xa'i sbaic ta j'ech'el. Contra xil scotol ti c'usi leque. 4J'ac'vanej ta milel. Mu'yuc snopbenal yu'unic jutebuc ti c'usi ta spasique. Me'inem ta yo'ntonic ti stuc no'ox lec ta xa'i sbaique. Mu sc'an sa'ic ti Diose. Ja' no'ox ta sa'ic ti c'usi lec ta xa'i ti stuquique. 5Sbis xa sbaic ta jch'unolajel yilel ti c'alal mi ja'uc xaq'uic ta venta smuc'ul stsatsal ti sc'op Diose. Mu me xalaj ta lo'lael yu'un ti buch'utic jechic taje. 6Taje, ja'ic ti buch'utic stic' no'ox sbaic ochel ta naetic ta slo'lael ti bol antsetic ti buch'u ic'bil yo'ntonic yu'un ti mulile, ti mu cha'bel x'och ta be yu'unic ti c'usi ta sc'an ti sbec'tal stacopale. 7Ti antsetic taje yac'ojbeic yipal ti ts'etel xa sni' xchiquinic ta ya'yiel ta xchanel ti c'ope, ti c'alal mi ja'uc sc'an xac' ta yo'ntonic ti bu ja' melele. 8Jech c'u cha'al laj spasic ti j'iloletic Janese xchi'uc ti Jambrese ti laj scontrainic ti Moisese, ja' jech ti viniquetic taje ta scontrainic ti bu ja' melele, soquem ti sjolique. Mi ja'uc juteb xc'ot ta yo'ntonic ta xch'unel ti Cajvaltique. 9Ja'uc le'e, mu jechuc ta xcom o ta jlo'lavanej, yu'un ta xlic yil scotolic ti bolinebic ta j'ech'el jech c'u cha'al ti cha'vo' viniquetic ti laj scontrainic ti Moisese. 10Ja'uc ti vo'ote, ja' atamoj batel ta spasel ti c'u s'elan lichanubtasvane, ti c'u s'elan ti jcuxlejale, ti c'u s'elan jnopoje, ti c'u s'elan c'otem ta co'nton ta xch'unele, ti c'u s'elan oy smuc'ul co'ntone, ti c'u s'elan oy syail xc'uxul co'ntone, ti c'u s'elan oy yipal cu'un ta sts'iquel ti vocole, 11ti c'u s'elan cuchem cu'un scotol ti ilbajinele, ti vocole. Ana'oj lec ti c'u s'elan laj jta jvocol ta jteclum AntioquĂ­ae, ta Iconioe, ta Listrae, ti col no'ox yal ti Cajvaltic laj stic' sba ta spojelune. 12Yu'un ti buch'utic ta xc'uxul yo'ntonic ta xac' sbaic ta tunel ta stojol ti Cristo Jesuse, ta ono'ox xich' svocolic yu'un ti ilbajinele. 13Ja'uc ti buch'u toj chopol xa'i sbaique, xchi'uc ti jlo'lavanejetique, yacalic ta soquel batel, yacalic ta xlo'lavan ti yalojique ti c'alal xi ta xich'ic lo'lael eque. 14Ti vo'ote mi jutebuc xatselbun ti c'u s'elan laj avich' chanubtasele, yu'un c'otem lec ta avo'nton. Yu'un xana' lec xtoc ti buch'u laj xchanubtasote. 15Vuleso ta ajol ti ta abic'tal ono'ox lic ava'i talel ti xch'ul c'ope, ti ja' laj sbijubtasot yo' jech ta xacol ta sventa ti c'ot ta avo'nton ta xch'unel ti Cristo Jesuse. 16Yu'un scotol ti ch'ul c'op ts'ibabile, ja' yac'oj ta na'el stuc ti Diose. Ja' ta xtun cu'untic, yu'un ta xischanubtasotic, ta xac' jna'tic mi oy jmultic, ta xistuq'uibtasotic, ta xistojobtasotic ta spasel ti c'usi leque, 17yo' jech ti buch'utic c'otem ta yu'untac ti Diose, bijubtasbilic, chapalic lec ta spasel scotol ti c'usitic oy stuq'uil smelole.


Copyright
Learn More

will be added

X\