2 San Pedro 3

1Li'e, Jchi'iltac, ja' xcha'lical jvun ta jts'ibaboxuc talel. Yu'un ti jba'yel vune xchi'uc ti xchibale, ta jc'an, ac'o anopic lec ta sventa ti c'u s'elan laj jbijubtasoxuque. 2Vuleso ta avo'ntonic c'u s'elan laj yalic comel ti ch'ul j'alc'opetic ta vo'nee, xchi'uc vuleso ta avo'ntonic smantal ti Cajvaltic Jcoltavanej ti laj yalboxuc ava'iic comel ti jcholc'opetique. 3Ma'uc no'ox taje, xi s'elan ma' ti oyuc ta avo'ntonique: c'alal slajebtic xa batel ti c'ac'ale, oy buch'utic ta xvul ta loq'uel ti yac'ojbeic yipal ta spasel ti c'usi xal ti yo'ntonique, xchi'uc xtoyet xa yeic ta na'levanej ti xi ta sjaq'uique: 4“¿C'usi laj spas ti Cristo ti yaloj ta xcha'sut talele? Yu'un chamic xa ti jmolmuc'totique, mu'yuc c'usi xc'ot ta pasel yilel. Yu'un ti osil banomile, staoj yav jech c'u cha'al lic meltsajuc talele.” 5Yu'un ti buch'utic taje, yalel mu sc'an svules ta sjolic ti vo'ne smeltsajel talel ti vinajele, xchi'uc ta sventa sc'opojel Dios loc' talel ti banomil ta vo'e, ti cacal ta vo' com ti banomile. 6Ti lum banomil ta vo'nee, tub sc'oplal ta sventa ti tal ti nojel ta vo'e. 7Ja'uc ti vinajel banomil avi tana li'e, ta sventa smantal Dios, q'uejbil chapal sc'oplal ta xlaj ta c'oc'. Ti c'oc' taje ta xchiq'ueic yu'un ti c'alal ta sta yorail ti chapanele, ti ja' o xa ta stsuts o sc'oplal ti buch'utic toj chopolique. 8Ja' jech xtoc, Jchi'iltac ti c'uxoxuc ta co'ntone, mu xach'ay ta avo'ntonic, ti jun c'ac'al ta x'ech'e, co'ol s'elan jmil jabil ta xa'i ti Cajvaltique. Ti jmil jabil xtoque, co'ol s'elan jun c'ac'al ta xa'i. 9Mu yu'unuc ta sjalijes ti Cajvaltic ti yaloj ta xcha'sut talel jech c'u cha'al ta snopic ti jlome. Yu'un oy sts'iquemal xcuchemal yu'un, ti smalaoj ti ac'o sjelta yo'ntonic ta stojole yo' jech mi junuc ta xbat ta ch'ayel. 10Ja'uc ti sc'ac'alil ta xtal ti Cajvaltique, mu na'baj, ja' to xava'ie, li' xa ono'ox oy jech c'u cha'al junuc j'elec' ti ta xtal ta ac'ubaltique. Va'i un, ti vinajele, xvo'o'et no'ox ta xac' xi'el ta sac ch'ay batel. Ta xlaj ta c'oc' scotol ti c'usitic oy ta stojole. Jech ec ti banomile xchi'uc scotol ti c'usitic oy ta stojole, j'ech'el ta xlaj stsuts sc'oplal ta c'oc'. 11Ti jech ta xc'ot ta lilijel scotol taje, ja' no'ox q'uelo aba ta stuc'ulanel ti c'u s'elan ta xacuxie yo' jech jtunelot yu'un ti Diose. 12Junuc avo'ntonic malaic ti sc'ac'alil ta xtal ti Diose. Lecuc ti c'usi ta xapasique yo' jech ta xtal no'ox. Ti jech c'ac'al taje, ti vinajele, ta xlaj ta c'oc'. Ti c'usitic oy ta stojole, ta x'unij ta leb c'oc'. 13Ja'uc ti vo'otique jmalaojtic ta xvul ta loq'uel ti ach' vinajele, ti ach' banomile, ti yaloj ono'ox Dios ta xaq'ue. Ti bu taje, naca lec scotol. 14Ti jech yacaloxuc ta smalael taje, jech o xal, Jchi'iltac, ti c'uxoxuc ta co'ntone, lecuc scotol ti c'usitic ta xapasique yo' lamajem avo'ntonic ta xvul staoxuc ti Diose, yo' mu'yuc c'usi quechel mac avu'unic, mi ja'uc acuchoj amulic. 15Ti jech oy to sts'iquemal xcuchemal yu'un ti Cajvaltic ta jtojoltique, oyuc ta ajolic ti ja' sventa jcoleltique. Ti jech sc'oplal taje, jech ono'ox laj sts'iba comel ti jchi'iltic Pabloe, ja' ti c'u s'elan ac'bat sbijil yu'un ti Diose. 16Ta jujulic ti svune, jech ono'ox laj yalboxuc ava'iic taje, ac'o mi oy bu jlom ti vocol ta a'yibel ti smelole. Ti buch'utic mu'yuc sbijilique, ti buch'u mu'yuc c'usi c'otem ta yo'nton ta xch'unele, ta syanijesbeic smelol jech c'u cha'al ti oy bu ta syanijesbeic smelol ti jlom ch'ul c'ope, sventa yo' ta sta svocol stuquic. 17Ti jech laj xa avich'ic albel scotol taje, Jchi'iltac, ti c'uxoxuc ta co'ntone, jech o xal un, bijanic yo' mu xalajic ta lo'lael ta stamel batel ti bu stamojic batel ti jchopol joletique. 18Ja'uc le'e, ojtiquinic lec c'u s'elan yutsilal ti Cajvaltic Jcoltavanej Jesucristo cu'untique yo' jech ta xach'iic batel ta sventa ti syail xc'uxul yo'ntone. Ich'biluc ta muc' ti Cajvaltic Jesucristo avi tana li'e, ti jechuc o sbatel osile. Jechuc.


Copyright
Learn More

will be added

X\