2 San Pedro 2

1Ti ta jteclum Israel ta vo'nee, ayan loq'uel ta stojolic jlo'lavanej j'alc'opetic. Jech ta x'ayan loq'uel jlo'lavanej jchanubtasvanejetic ta atojolic ec. Yu'un ta mucul ta xchanubtasvanic ti c'u s'elan nopbil yu'unique yo' ta soquesvanic, ti ta svalopatinic comel ti Cajvaltic ti Jpojvanej Jcoltavanej yu'unique. Ti jech taje, q'uelel xa ono'ox talel ti vocol ta stojolic ti jech ta spasique. 2Yepal no'ox ta sts'acliic batel ti jech mu'yuc smelol stuq'uil ti xcuxlejale. Ta scojic taj une, chopol ta xbat sc'oplal ti lequil ach' c'op ti c'alal ja' melele. 3Ti jech tsacbil lo'labil yo'nton yu'un ti taq'uine, ta xilboxuc avocolic ta yilbajineloxuc ta slo'laeloxuc ti c'usi ta xchanubtasvanique. Manchuc mi jech un, jbel sc'oplal ta stojic. Laj to c'op ma' ti ta xcolique, yu'un vo'ne xa chapal sc'oplalic. 4Ti ánjeletic ti laj sta smulique, mu'yuc ono'ox ch'aybat smulic yu'un ti Diose, c'ajomal no'ox jipatic yalel ta c'atimbac ti bu nac'bil chucajtic ta cadena taq'uin ictaatic comel ta ic'al osil yo' ta xich'ic chapanel c'alal ta sta sc'ac'alile. 5Ja' jech xtoc ti jnaclejetic ta vo'nee, mu'yuc ono'ox bu xch'aybat smulic yu'un ti Diose. Laj stacbe talel nojel ta vo' ta stojolic ti chopol jnaclejetic ta banomile. C'ajomal no'ox laj scolta ti Noee, ti buch'u laj yalbe sc'oplal ti lequil tuq'uil xcuxlejale, xchi'uc ti yan vucvo'e. 6Ja' jech xtoc ti Diose jbel sc'oplal laj slilin ta tubel ti jteclum Sodomae xchi'uc ti Gomorrae. Laj xchic' ta c'oc' ja' to c'uxi tan laj yicta comele yo' ta scaj'ac'be sna' ti jech ta staic ec ti chopol jnaclejetic ti ts'acal to ta xvulic ta loq'uele. 7Ja'uc ti Diose laj scolta ti Lote, ti jun lequil tuq'uil vinique, ti oy ta at o'nton c'alal laj yil ti chopol xcuxlejalic ti chopol jnaclejetic ta banomile. 8Ti lequil tuq'uil vinic taje, ti jech capal ta naclej xchi'uc ti chopol jnaclejetique, scotol c'ac'al oy ta at o'nton c'alal ta xa'i ta xil ti c'usi chopol ta spasique. 9Ti Cajvaltique ta spoj ta scolta ti buch'u nabalic ta stojol c'alal oy ti svocolique, xchi'uc caj chapal xa yu'un ta stsits ta xchapanel c'alal ta sta sc'ac'alil ti buch'utic toj chopolique. 10Yu'un ti Diose jbel sc'oplal ta stsits ti buch'utic ta xac'be sbaic ti c'usi chopol ta sc'an ti yo'ntonique, ti ta sbajic ti yich'oj tsots yabtel ti Cajvaltique. Yu'un tsots yo'ntonic, mu tabaj ye sti'ic ti c'usitic ta xalique. Mi ja'uc xi'ic ta xchopol-c'optael ti buch'u tsots yich'oj yabtelic ti oy ta cajal toyole. 11Ja'uc ti ánjeletic ti x'ech' to cajal yabtel yich'ojique, mi ja'uc ta xchopol-c'opojic ta stojolal ti buch'utic tsots yabtel yich'ojic ti oy ta cajal toyol ta stojol ti Cajvaltique. 12Ti viniquetic taje, co'ol s'elan chon bolometic ti xi s'elan ti stalelique: mu xa'ibeic sni' xchiquinal, yavil ti cuxul ta xa'ie. Ja' no'ox ta xvoq'uic talel yo' ta xich'ic tsaquel yo' ta xich'ic milel. Naca chopol ta xc'opojic ta stojol ti c'usi mu xa'ibeic ti smelole. Ja'uc le'e, jech ta xcham xlajic jech c'u cha'al ti chon bolometique. 13Jech ta xich' svocolic ec jech c'u cha'al laj yac'beic yich' svocol ti yane. Xmuyubajic ti ta satil eloval ta yac'bel sbaic ti c'usi ta sc'anique. Cuxul j'ac'vanej ta q'uexlal, j'ac'vanej ta lo'il maxil c'alal achi'inojic ta spasel ti aq'uinic c'alal batem xa yo'ntonic ta elovajel ta sq'uelel ti c'usi lec ta xilique. 14Laj to c'op ma' ti mu'yuc ta yo'ntonic ta sc'upinel ti antsetic ti c'alal ta xilique. Mu x'ech' yo'ntonic ta sa'el ti smulique. Naca svosesbe no'ox yo'nton ti antsetic ti buch'uc naca xa quiquil xa'i sba eque, yu'un sna'ic lec c'u s'elan ta xyacvan xchi'uc ti sc'upijel yo'ntonique. Yu'un ch'ayel sq'uelojic batel. 15Ch'ayemic ta be, yu'un laj xa yictaic comel ti tuq'uil bee. Yu'un ja' xchanojbeic yo'nton ti j'alc'op Balaame, xnich'on ti Beore. Yu'un ti Balaame ta ox spas ya'i canal taq'uin ta spasel ti c'usi chopole, 16yu'un c'ot ta pasel ti laj sta vulel yu'un ti smule. Yu'un co'ol s'elan sc'opojel cristiano c'opoj me' burro ta stojolal ti mu ja'uc x'ac'bat spas ti chuvajineb sjol xchi'uc ta spasel ti c'usi chopole. 17Ti jlo'lavanej jchanubtasvanejetic taje, co'ol s'elanic joc' ti ch'abal ti ya'lele, co'ol s'elanic toc ti ic'bil ta xbat yu'un ti iq'ue. Sbatel osil chapal xa sc'oplal ta xbat stojic ti bu spajebal ic' ta j'ech'el ti osile. 18Yu'un cajal xa ye sti' xa'i sba xchi'uquic ti c'usi xloc' ta yeic ti c'alal mu'yuc c'usi ta xich' tael yu'une. Ta scoj ti bic'tajem yo'ntonic ta pasel ti c'usi sc'an ti lum ach'ele, naca sc'unibtasbe yo'nton ti buch'utic ta xictaic ya'iic comel ti bu chopol stamojic batele. 19Utsuc xa xalbeic ya'iic ti mu'yuc xa c'usi smaquelic ta bee, ti c'alal mosovinbilic ti stuquic ta pasel ti c'usi chopol ta sc'an ti sbec'talique. Yu'un scotol ti buch'uuc no'oxe, ta xcomic o ta yajmosov ti bu tsalbil ta xc'otique. 20Buch'uuc no'ox ti laj xa yojtiquinic ti Jcoltavanej Cajvaltic Jesucristoe, ti laj yictaic comel ta spasel ti c'usi chopol li' ta banomile, mi ts'acal to ta xlic xchuc sbaic ta spasel ti c'usi chopole, ti tsalbil ta xc'otic yu'une, ech' to ta xjelav ti xchopolalique, ja' mu sta ti ba'yel to oxe. 21Ja' xloc' venta ti manchucuc laj yojtiquinic ti lequil tuq'uil bee, ti c'alal laj yojtiquinic ti lic xch'ac sbaic ta stojol ti ch'ul mantal ac'batique. 22Ja'uc le'e, ja' c'ot ta stojolic ti oy bu xi x'ale ti c'op xava'iique: “Ti ts'i'e ta xcha'lo' ti xenele. Ti chitom ti naca to laj yich' poquele, ta xbat xcha'balalin sba ta ach'el xtoc.”


Copyright
Learn More

will be added

X\