2 Corintios 8

1Avi tana une, ti co'ol jchi'il jbatique, ta jc'an ta xcalcutic ava'iic c'u s'elan abtej xc'uxul yo'nton Dios ta stojolic ti jch'unolajeletic ti buyuc no'ox ta stsob sbaic ta Macedoniae. 2Manchuc mi ep laj yich'ic lajeltsael yu'un ti vocole, ech'em no'ox xmuyubajic. Manchuc mi me'on mu'natetic, loc' ayan ta yo'ntonic ti matanal ti laj yaq'uique, co'ol s'elan banquilal jc'ulejetic ta j'ech'el. 3Ti jech ta slequilal yo'nton laj yaq'uic ti c'u yepal xu' yu'unique, vu'un rexticoun. Ech' to vu' yu'unic ti c'u yepal xu' yu'unic ta yaq'uele. 4Ja'uc le'e, ma'uc vu'un laj calbe ti ta xcoltavanique, yu'un ja' stuquic laj sc'anbuncutic vocol yo' jech xu' ta stic' sbaic ta scoltael ti yan jch'unolajeletique. 5Xcac'touc ti ja' no'ox jech yepal ta xaq'uique. Bu xata, xjelav to laj yaq'uic. Yu'un ba'yel laj yac' sbaic ta ventainel yu'un ti Diose. Laj taj une, laj yac' sbaic ta ventainel ta jtojolcutic yo' jech ta spasic ti c'usi ta sc'an yo'nton ti Diose. 6Ja' yu'un un, laj xa jc'anbecutic vocol ti Titoe ti ac'o sliques ta atojolic ec stsobel ti matanale, ta scoltaoxuc xtoc ta stsutsesel stsobel ti matanal ti ta yutsilal avo'ntonic ta xavaq'uique. 7Yu'un xi s'elan ti xu' avu'unic ta xquile: C'otem lec ta avo'ntonic ta xch'unel ti Cajvaltique. Xbejlajan lec ac'opic. Xavojtiquinic lec scotol. Xac' no'ox ajolic ti ta syail xc'uxul avo'ntonic ta xavac' abaic ta tunel jech c'u cha'al laj cac'boxuc avilique. Ja'uc o me jech ti ta yutsilal avo'ntonic ta xacoltavanique. 8Mu yu'unuc ta jpasoxuc ta mantal ti va'i s'elan ta xcalboxuque. C'ajomal no'ox ta jc'an ta xcac' ana'ic ti xmuyubaj xa yo'ntonic ti yan c'alal ta xcoltavanique, yo' jech ti vo'oxuc eque ta xavac' iluc ti oy xc'uxul avo'ntonic ta melele. 9Yu'un ti vo'oxuque xana'ic lec, ta sventa ti oy yutsilal slequilal yo'nton ti Cajvaltic Jesucristoe, joybij ta me'un c'alal jc'ulej ono'oxe, yo' jech c'ulej ta xac'otic ta sventa sme'unal ti Cajvaltique. 10Jech ta xcalboxuc ava'iic yo' jech lec oyoxuc. Ti stsobel ti coltaele, vo'oxuc laj aliquesic ba'yel. Jech o xal un, muyubajanic ta spasel, yu'un ti junabie lec laj aliquesic talel stsobel ti coltaele. 11Avi tana une, ti c'u yepal xu' avu'unique, jechuc yutsilaluc avo'ntonic ta stsutsesel stsobel ti coltaele jech c'u cha'al laj aliquesique. 12Buch'uuc no'ox ti ta sjunul yo'nton ta sc'an ta xcoltavane, ich'bil ta venta ta xc'ot yu'un Dios ti c'u yepal xu' yu'un ta xaq'ue. Yu'un ti Diose mu yu'unuc ta sc'anbe ti buch'u ch'abal c'usi x'ayan yu'une. 13Ma'uc sc'oplal ti ch'abal ave'elic ta xacomic ta sventa ta xacoltaic ti yane. Ja' no'ox sventa yo' co'ol talel batel xacolta abaic. 14Yu'un ti vo'oxuque, yepal to oy avu'unic yo' ta xtun yu'un ti yane. C'alal yepal oy yu'unic ec ti c'usi ta xtune, xu' ta xcoltavanic ec c'alal oy bu ta sta sc'ac'alil ti mu'yuc xa c'usi ta xataique yo' jech talel batel ti coltaele. 15Ja' jech ta xc'ot jech c'u cha'al ti xi ta xal ti ch'ul c'ope: “Ti buch'u yepal laj stsobe, mi ja'uc com scomelal yu'un. Ti buch'u jutuc laj stsobe, lec loc' o yu'un.” 16Coliyal Dios ti ac'bat sna' ta yo'nton ti Tito ti co'ol yo'nton jech c'u cha'al ti vu'une, ti ja' no'ox ta jc'an ti lec oyoxuque. 17Ma'uc no'ox laj xch'unbun ti Tito ti laj calbe ya'i ti ta xtal sq'ueloxuque. Ta sventa ti jech ono'ox ta yo'nton ta sc'an ti lec oyoxuque, avi tana une, ta yo'nton stuc ta xtal sq'ueloxuc. 18C'alal ta xtal sq'ueloxuc ti Titoe, ta jtaccutic talel jun ti co'ol jchi'il jbatic ti lec ojtiquinbil yu'un ti jch'unolajeletic ta jujun tsobobbaile, ti lec ta x'abtej ta yalel sc'oplal ti colebal lequil ach' c'ope. 19Ma'uc no'ox taje, yu'un ja' t'uje yu'un ti jch'unolajeletique yo' jech ta xischi'inuncutic batel ta yaq'uel ti coltaele, yo' jech ich'bil ta muc' ta xc'ot ti Cajvaltique, yo' jech ta xvinaj ti ta slequilal co'ntontic ta xijcoltavane. 20Yu'un mu jc'ancutic ti lo'iltabil ta xc'ot ti matanal ti yacal ta jtsobcutic batele. 21Yu'un ta jc'ancutic ti lecuc batuc ti sc'oplale, ta sba ta sat ti Cajvaltique, xchi'uc ta sba ta sat ti jnaclejetic ta banomil xtoque. 22Ti c'alal ta xtal ta atojolic ti Tito xchi'uc ti jun co'ol jchi'il jbatic xchi'uque, ta jtaccutic talel ta atojolic xtoc xchi'uc yan ti co'ol jchi'il jbatic xchi'uque, yu'un laj xa quilcutic ti oy xa ep ta coj ti sjunul yo'nton ta xcoltavane. Avi tana une, x'ech' to oy ta yo'nton ta sc'an ta scoltaoxuc, yu'un spatoj yo'nton ti ta xapasic ti c'usi sc'an ti Diose. 23Mi oy buch'u ta sjac'beic sc'oplal ti Titoe, albeic ya'i ti ja' jun jchi'il ta abtel yo' ta xituncutic avu'unic. Mi ta sjac'boxuc sc'oplal xtoc ti cha'vo' co'ol jchi'il jbatique, albeic ya'i ti ja' tacbilic talel yu'un ti jch'unolajeletic ti buch'utic ta xich'ic ta muc' ti Cristoe. 24Ta sventa ti jech ta xc'otic ta atojolic ti buch'utic co'ol jchi'il jbatic ta abtel xchi'uque, ac'beic yil ti yutsil slequilal avo'ntonic ta stojole yo' jech ta xc'ot yalic ac'oplalic ta stojol ti jch'unolajeletic ti bu liquemic talele, ti mu nacauc no'ox laj calcutic ac'oplalic ti lec avo'ntonique.


Copyright
Learn More

will be added

X\