2 Corintios 4

1Ti jech ta xc'uxul yo'nton yac'ojbuncutic cabtelcutic ti Diose, jech o xal un, mu xichibajcutic ta spasbel ti yabtele. 2Laj to ta alel ma' ti oy c'usi ta mucul ta jpascutic ti ta x'ac'van ta q'uexlale. Mi ja'uc ti ven xa xca'i jbacutic ta jyanijesbecutic smelol ti sc'op Diose. Le'e, ja' no'ox ta xcalcutic ti bu ja' melele yo' jech ta xilic scotolic ti lec co'ntoncutic ta stojol ti Diose. 3Ti buch'u mu xa'ibe smelol ti lequil ach' c'op ti ta xcalcutique, ja' no'ox ti buch'utic ta xbatic ta ch'ayele. 4Ti jech mu xc'ot ta yo'ntonic ta xch'unel ti lequil ach' c'op yu'un ti Cristo ti c'alal ja' yutsilal slequilal stuc ti Diose, ja' ta scoj macbil snopbenal, macbil satic yu'un ti sdiosic li' ta banomile. 5C'alal ta xcalcutic ti lequil ach' c'ope, ma'uc ta jvinajes ti jc'oplalcutique, ja' ta xcalcutic sc'oplal ti Jesucristo ti ja' Jcoltavaneje. Naca no'ox jtuneluncutic ta atojolic ta sventa xc'uxul yo'nton ti Jesuse. 6Yu'un ja' laj yal stuc ti Diose ti xojobinuc ti luz ta ic'al osile. Jech xtoc laj yac' xojobinuc ta co'ntontic ti luze yo' jech ta xcojtiquinbetic yutsilal slequilal ti Dios ti xojobin no'ox yutsil ta stojol ti Jesucristoe. 7Ja'uc ti c'ulejale, oy ta jbec'tal jtacopaltic ti ja' jech s'elan c'u cha'al bin ti pasbil ta lume yo' jech ta xvinaj ti mu albajuc smucul stsatsal Dios ti ma'uc cu'un jtuctique. 8Ti jech taj une, ac'o mi q'uelel ta jtojolcutic ti c'usiuc no'ox vocolale, ma'uc tsalbil ta xicomcutic yu'un. Ac'o mi yepal no'ox oy ti vul o'ntonale, mi ja'uc ta jtsiq'ues co'ntoncutic yu'un. 9Ac'o mi ilbajinbiluncutic, mu'yuc jipbil tenbiluncutic. Ac'o mi ta xijipatcutic ta lum, mi ja'uc xilajcutic o. 10Buyuc no'ox ti ta xixanavcutique, chapal jc'oplalcutic ta xquich'cutic milel jech c'u cha'al laj yich' milel ti Cristoe yo' jech ta xvinaj oyuc xcuxlejal ti Jesús ta jtojolcutique. 11Ti jech li' to cuxuluncutique, q'uelel ta jtojolcutic scotol c'ac'al ti milel ta sventa ta jpascutic yabtel ti Cajvaltic Jesuse yo' ta xvinaj xtoc ti quich'ojbecutic xcuxlejal ti Jesús li' ta jbec'talcutic ti oy sc'oplal ta xchame. 12Ti jech chapal sc'oplal xu' xichamcutic ta sventa ta xi'abtejcutic ta atojolique, yacal xa ta xataic ec ti acuxlejalique. 13Yu'un xi ta xal ti ts'ibabil ta ch'ul c'ope: “C'ot ta co'nton ta xch'unel, jech o xal lic'opoj.” Ti jech c'otem ta co'ntoncutic ta xch'unele, jech o xal ta xic'opojcutic. 14Yu'un jna'ojcutic lec, ti Dios ti laj xcha'cuxes ti Cajvaltic Jesuse, ja' jech ta xischa'cuxesuncutic jech c'u cha'al cha'cuxi ti Jesuse. Ti vo'oxuc xchi'uc ti vu'uncutique jmoj ta xijyic'otic batel ta stojol. 15Ti jech taje, ja' sventa alequilalic yo' avepalic no'ox ta xatabeic slequilal yutsilal ti Diose, xchi'uc yepal no'ox oy buch'utic ta xalbeic vocol ti Diose, ti ja' sventa yutsilal slequilal stuc ti Diose. 16Jech o xal mu xichibajcutic. Ac'o mi lubtsajem xa ta q'uelel ti jbec'tal jtacopalcutique, yacal ta stsac batel yip jujun c'ac'al ti co'ntoncutique. 17Ti jvocoltic li' ta banomile mu jaluc, ta x'ech' sc'ac'alil, ta xjoybij ta jlequilaltic ti jun yutsil sbatel osile, xloc' venta. 18Yu'un mu li'uc cac'oj jsatcutic ta sq'uelel ti c'usi xvinaje, ja' cac'oj jsatcutic ta sq'uelel batel ti c'usi ja' sventa sbatel osile. Ti c'usitic xvinaj ta q'uelele, mu xjalij, ja'uc ti c'usitic mu xvinaj ta q'uelele, mu sna' xlaj sbatel osil.


Copyright
Learn More

will be added

X\