2 Corintios 2

1Ti jech taj une, laj jnop ti mu'yuc ta xbat jq'ueloxuc mi ja' no'ox ta xcac'oxuc ta at o'nton xtoque. 2Yu'un mi ja' no'ox ta xcac'oxuc ta at o'ntone, ¿buch'u xa ono'ox un ta spatbun ti co'ntone? Ja' no'ox vo'oxuc c'alal ja' no'ox ta xcac'oxuc ta at o'ntone. 3Jech o xal laj jts'ibaboxuc talel ti jlic vun ta ba'yele, yu'un mu jc'an xital ta atojolic c'alal ja' no'ox ta xavaq'uicun ta at o'ntone, c'alal ja' avabtelic ta xapatbeicun ti co'nton jechuque. Yu'un laj jnop ta xapatbeicun co'nton yo' jech co'ol xijmuyubaj c'alal ta xital ta atojolique. 4C'alal laj jts'ibaboxuc talel ti jlic ba'yel vune, mu x'ech' xjelav laj ca'i ti vul o'ntone, at o'nton xa oyun, ti xi'oc' xa yu'une. Ti laj jts'ibaboxuc talel ti jvune, ma'uc ta sventa yo' ta xcac'oxuc ta at o'nton. Laj jts'ibaboxuc talel ti jvune yo' jech ta xana'ic ti yepal no'ox c'uxoxuc ta co'ntone. 5Mi oy buch'u ac'van ta at o'ntone, ma'uc no'ox laj yac'un ta at o'nton ti vu'une, laj yac'oxuc ta at o'nton ec, ac'o mi mu acotolicuc. Ti jech ta xcal ti mu acotolicuc ti xichie, yu'un mu acotolicuc laj ataic ta maquiel ti tsots vulele. 6Ti yepal no'ox laj avalic c'alal laj atsob abaic ti ac'o stoj smul ti buch'u soquesvane, xu' o xa. 7Avi tana une, ch'aybeic xa smul, patbeic yo'nton, naca mi sten o sba ta j'ech'el yu'un ti at o'ntone. 8Jech o xal un, ta jc'anboxuc vocol ta atojolic, ac'beic yil xtoc ti xc'uxul avo'ntonic ta stojole. 9Ti jech laj jts'ibaboxuc talel ta jlic ba'yel vune, yo' ta xquil mi jun avo'ntonic ta xach'unic ta j'ech'el ti c'u s'elan laj calboxuque. 10Buch'uuc no'ox ti ta xach'aybeic ti smule, ja' jechun ec ta jch'aybe ti smule. Manchuc mi laj ca'i ti mu'yuc ono'ox smul ta jtojole, ta sba ta sat ti Cristoe, ta jch'aybe ti smule yo' jech ta xc'ot ta avo'ntonic ta xch'ayel ti mulile. 11Ti jech taj une, yo' mu xistsalotic ti pucuje, yu'un xcojtiquintic lec c'u s'elan ti smanyae. 12C'alal livul ta yalel ti lequil ach' c'op yu'un Cristo ta jteclum Troase, jamal laj jta ti be ta yabtelanel yabtel ti Cajvaltique. 13Ja'uc le'e, mu junuc co'nton, yu'un mu'yuc tey laj jta ti jchi'il ta abtel Titoe. Jech o xal un, laj jc'oponic comel ti jch'unolajeletique, libat ta Macedonia banomil. 14Coliyal ti Diose ti scotol c'ac'al ja' j'ic'vanej cu'uncutic ti Cristoe yo' jech xu' cu'uncutic ta yalel ti lequil ach' c'op yu'une, ti jun yutsil smuil ta xtanij batel ti buyuc no'oxe. 15Ti vu'uncutique, co'ol j'elancutic jech c'u cha'al smuil pom ta xac' ti Cristo Jesús ta stojol ti Diose, ti xpaq'uet smuil ta xtanij batel ta stojol ti buch'u ta xcolique xchi'uc ti buch'u ch'ayel ta xbatique. 16Ta sventa ti buch'u ch'ayel ta xbatique, jun to jmilvanej ta xa'iic smuil ti pom ta xc'ot ta stojolique. Yan ti buch'u oy sc'oplal ta xcolique, jun to j'ac'-cuxlejal ta xa'iic ti smuile. ¿Buch'u xu' yu'un ti jech ta spas taje? 17Ti vu'uncutique ma'uc c'otem ta jbolomalcutic ti sc'op Dios ti ta jyanijesbecutic smelol jech c'u cha'al ta spas ti yane. Ja'uc ti vu'uncutique ta slequilal yutsilal co'ntoncutic ta xcalcutic ti lequil ach' c'op ta sba ta sat ti Diose. Tacbiluncutic yu'un ta sventa ti jununcutic xchi'uc ti Cristoe.


Copyright
Learn More

will be added

X\