1 Tesalonicenses 4

1Avi tana li' une, Jchi'iltac, ta sventa ti Cajvaltic Jesuse, xi s'elan ta jc'ubanboxuc ta sc'anbeloxuc vocol ta atojolic jech c'u cha'al li'e: Jech c'u cha'al yacaloxuc ta spasel avi tana le'e, jechuc me staojuc yav xapasic jech c'u cha'al laj cac' avilique yo' jech ta xataic ti lec xayiloxuc ti Diose. 2Ti vo'oxuque xana'ic lec scotol c'u s'elan laj jtojobtasoxuc ta sventa ti Cajvaltic Jesuse. 3Ti c'usi ta sc'an ti Dios ta xapasique, ja' ti junuc avo'ntonic tunanic yu'une, ti mu'yucuc buch'u xmulivaje. 4Ti jujunoxuque, nopic lec ti c'u s'elan ta xacuxiic ta xchi'inel ti avajnilique, ti ya'iuc ti ich'biluc ta muc' avu'unique, ti oyuc stuq'uil ajolic ta stojole. 5Mu xavac'be aba avocolic yu'un ti xchopolal sc'upijel avo'ntonique jech c'u cha'al ta spasic ti jnaclejetic ta banomil ti buch'utic nom oyic ta stojol ti Diose. 6Mu me junuc oy buch'u yochel ta soquesel ta syanijesbel smelol ti va'i yelanil ti c'op ta yac'bel svocol ti xchi'ile. Yu'un ti buch'u jech ta spase, ta x'ac'bat tsots tsitsel yu'un ti Dios jech c'u cha'al calojboxuc ava'iique. 7Yu'un ti Diose laj yic'otic ta spasel ti c'usi leque. Ma'uc laj yic'otic ta spasel ti c'usi chopole. 8Ja' yu'un un cha'e, mi oy buch'u ta sbaj ta sten ti chanubtasel taje, ma'uc ta sbajbe sc'op jun vinic, ja' ta sbajbe sc'op Dios ti Buch'u laj yac'botic ti Xch'ul Espíritue. 9Ja'uc ti sc'oplal syail xc'uxul o'ntonal ta sventa ti achi'il abaique, mu xa tsotsuc sc'oplal ta xcalboxuc talel ta vun. Yu'un ja' stuc Dios laj xa yac'boxuc ana'ic c'u s'elan ta xac'uxubin abaic ta jujun tal. 10Yu'un jech ta xapasic ta stojol ti achi'ilic nacalic ta Macedonia banomile. Ja'uc le' une, ta jc'anboxuc vocol, Jchi'iltac, ti epajuc to ech'el ti syail xc'uxul avo'ntonique. 11Tsotsuc me sc'oplal ta avo'ntonic ta sa'el ti c'usi ta xtun avu'unique yo' jech mu'yuc c'usi xana'ic ti jech cuxuloxuque. O'ntolinic ti avabtelique jech c'u cha'al calojboxuc ono'oxe 12yo' jech ich'biloxuc ta muc' yu'un ti ma'uc jch'unolajeletique, yo' jech mu ja'uc xapat avo'ntonic ta stojol yan. 13Ti jech jchi'il jbatique, ta jc'an ti mu macaluc xcom avo'ntonic yu'un sc'oplal ti buch'u chamemic xae yo' jech mu xavat avo'ntonic jech c'u cha'al ti yan jnaclejetic ta banomil ti mu'yuc spatobil yo'ntonique. 14Jech c'u cha'al c'otem ta co'ntontic ta xch'unel cham cha'cuxi ti Jesuse, jch'unojtic xtoc ti ta xcha'cuxesatic yu'un Dios c'alal ta xcha'sut talel ti Jesús c'alal xch'unojic cham lajique. 15Jech ta xcalcutic ava'iic un, yu'un xi ono'ox yaloj comel ti Cajvaltique: Mi cuxulotic to ta xvul staotic ti Cajvaltic c'alal ta xcha'sut talele, ma'uc ti vo'otic ti ba'yel ta xijelavotic batel yu'unic ti buch'utic chamemic xae. 16Yu'un ba'yel ta xvinaj oy Buch'u tsots x'avet ta spas mantal, ta xvinaj sc'oplal ti ánjele, ta xvinaj ta x'oc' yoq'ues ti Diose, ja' o ta xyal talel ta vinajel ti Cajvaltic une. Ti buch'utic c'otem ta yo'ntonic ti Cajvaltic c'alal cham lajique, ja' ba'yel ta xcha'cuxiic. 17Ts'acal to un, ti li' to cuxulotic une, jmoj ta xij'iq'ue batel xchi'uc ta snupel ta be ta ba toc ti Cajvaltique, ti j'ech'el ta xba jchi'intic sbatel osil ti Cajvaltique. 18Jech o xal ti vo'oxuc une, patbo aba avo'ntonic ta jujun tal yu'un ti va'i s'elan laj calboxuc ti c'op taje.


Copyright
Learn More

will be added

X\