1 San Pedro 3

1Ja' jech ti vo'oxuque, antsetic ti nupul ts'acaloxuque, co'oluc avo'ntonic xchi'uc ti amalalique. Yu'un mi oy buch'utic mu xc'ot ta yo'nton ta xch'unel ti lequil ach' c'op ti amalalique, c'alal ta xilic ti oy c'usi lec ta xapasique, mu xa ta epal c'opuc ta xc'ot ta yo'nton ta xch'unel. 2C'alal ta xilic xa'ac'vanic ta ventae, ti ta xapasic c'usi leque, jech ti stuquique, ta xa'iic ti ich'bil ta muc' avu'unique. 3Ti anichimalique, mu me ja'uc no'ox ti ch'alaloxuc ta oroe, ti jun yutsil ta q'uelel stuset ti ajolique, ti jun yutsiquil ti ac'u'ic alapojic ti naca spat xocon no'oxe. 4Ti c'upil abaic ta q'uelele, ti mu xtub xlaj sc'oplale, ja' ti slequil yutsil avo'ntonic ti ayanem talel ta yutile, ti lamajem avo'ntonique, ti mu'yuc c'usi xal avo'ntonique. Ti jech avutsilic taje, ja' tsots sc'oplal ta xil ta sba ta sat ti Diose. 5Yu'un ja' jech yutsil slequil yo'nton ti antsetic ta vo'nee. Laj yich'ic ta muc' ti smalalique, yu'un spatoj yo'ntonic ta stojol ti Diose. 6Ja' jech ech' ta banomil ti Sarae, yu'un laj xch'unbe smantal ti Abrahame, xchi'uc “Tot”, xi laj yal ta stojole. Ti vo'oxuque, co'ol s'elan yantsiquil alab c'otemoxuc mi lec ti c'usi ta xapasique, mi mu'yuc xi'el ta xava'iic. 7Ja' jech ti vo'oxuque, viniquetic ti nupul ts'acaloxuque, a'yibeic sc'op ti avajnilique. Ac'o ya'i avu'unic ti ich'bilic ta muq'ue, ti oyuc ta ajolic ti ja' c'unique. Ma'uc no'ox ti jech c'unique, yu'un ac'bil xcuxlejalic ec ta sventa slequil yutsil yo'nton Dios jech c'u cha'al ta xavich'ic ti vo'oxuque. Jech xapasic un, yo' mu xmac ta be ti ac'opojel ati'inelic ta stojol ti Diose. 8Ja' yu'un un, ta xcalboxuc ava'iic acotolic, junuc avo'ntonic cuxianic, co'oluc junuc ti snopbenal avu'unique, ti c'uxuc xava'i abaic ta sventa ti jech jch'unolajeloxuque. Ta yutsiluc avo'ntonic, nijano chimano abaic. 9Mi oy buch'u oy c'usi chopol laj spasbote, mu jechuc xapacbe sutel ec. Mi oy buch'u oy c'usi chopol laj yalbote, mu jechuc xapacbe sutel ec. Ja' lec c'anbo slequilal Dios ta stojol. Yu'un ti Diose laj yic'oxuc ta stojol ta yich'bel ti slequilale. 10Yu'un xi ta xal ti ch'ul c'ope: “Ti buch'u mu jipbaj tenbaj ta xa'i ti xcuxlejale, ti ta sc'an ti mu'yuc c'usi sna' ta x'ech' yu'un ti jujun c'ac'ale, yictauc sba ta bet'bunel ye, xchi'uc ta sjutel ti c'ope. 11Q'uejo abaic ta stojol ti c'usi chopole. Ja' pasic ti c'usi leque. Ac'beic yipal ta stamel batel ti slamajemal avo'ntonique. 12Yu'un ti Cajvaltique ta xchabi ti buch'u oy slequil stuq'uilique, ta sts'etan sni' xchiquin ta ya'yibel ti sc'opique. Ta scontrain xtoc un ti buch'u chopol ti c'usi ta spasique.” 13¿Mi oy la buch'u c'usi chopol ta spasboxuc mi vo'oxuc avac'ojbeic yipal ta spasel ti c'usi leque? 14Mi ta xavich' avocolic ta sventa ti c'usi lec ta xapasique, toj yan no'ox yutsil. Laj to c'op ma' ti oy buch'u ta xaxi' yu'un junuque, ti batem xa ach'ulel ta xi'el yu'une. 15Comuc ta yajval avo'ntonic ti Cristoe. Chapalucoxuc me lec yo' jech xu' avu'unic ta staq'uel mi oy buch'u ta sjac'boxuc srazonal ti spatobil avo'ntonique. 16Ja'uc le'e, biq'uituc xavac' abaic ta stojol ti buch'u c'usi ta sjaq'uique. Yo' jech mu'yuc c'usi xal avo'ntonic, lecuc ta q'uelel ti c'usi ta xapasique, yo' jech ta ye no'ox stuc ta xq'uexav avu'unic ti buch'utic ta xaschopol-c'optaic ta sventa ti c'otem ta avo'ntonic ta xch'unel ti Cristoe. 17Mi jech ta sc'an ti Diose, jun yutsil mi ta xavich' avocolic ta spasel ti c'usi leque, yu'un ma'uc ta xavich' avocolic ta scoj spasel ti c'usi chopole. 18Yu'un ti Cristoe jcoj no'ox laj yich' svocol ta milel ta scoj ti jmultique. Manchuc mi ch'abal ti smule, laj ono'ox yich' svocol ta scoj jchopolaltic yo' jech ta xijyic'otic batel ta stojol ti Diose. Ta sventa ti oy sbec'tale, cham. Ja'uc le'e, c'alal cha'cuxie, cha'cuxi ta sventa ti Ch'ul Espíritue. 19Ti xch'ulele bat yalbe ya'iic scolelic ti ch'ulelaletic ti buch'utic chucajtique. 20Ti ch'ulelaletic taje, ja'ic ti buch'utic laj stoy sbaic ta vo'ne c'alal cuxul to ox ti Noee, c'alal ti Diose sjunul yo'nton smalaoj ti ac'o yicta sbaic ta spasel ti c'usi chopole, c'alal yacal ta smeltsan barco ti Noee. Yu'un oy no'ox vaxacvo' ta scotol ti colic loq'uel ta nojel ta vo'e. 21Ti nojel ta vo' taje, ja' ta xac' ta na'el sc'oplal ti ich' vo'e, ti ja' senyail ta xijcole. Yu'un ti ich' vo'e, ma'uc ta sventa ta spoc ti jbec'taltique, yu'un ja' no'ox ta sventa ac'o jc'anbeticuc spoquel jol co'ntontic ti Diose, yo' jech ta xijcolotic ta sventa ti cham cha'cuxi ti Jesucristoe. 22Yu'un muy xa batel ta vinajel. Oy xa ta sts'el sbats'i c'ob ti Diose. Yu'un yich'oj xa ta sventa ti ánjeletique, ti jpas-mantaletique, xchi'uc ti buch'utic tsots xu' yu'unique.


Copyrighted Material
Learn More

will be added

X\