1 Corintios 7

1Avi tana une, ta jtac'boxuc talel ava'iic ti c'usi laj ajac'beicun ta jlic avunique. Melel, lec mi mu xnupi sts'aqui ti viniquetique. 2Ta sventa yo' mu stsalvan ti mulile, ja' lec mi oy yajnilic ti jujun viniquetique, mi oy smalalic ti jujun antsetique. 3Ti vinic ti nupul ts'acale, sc'an ti mu sjalan sba ta stojol ti yajnile. Ja' jech xtoc ti ants ti nupul ts'acale, sc'an ti mu sjalan sba ta stojol ti smalale. 4Ti ants nupul ts'acale, ma'uc yu'un stuc ti sbec'tale, ja' yu'un ti smalale. Ja' jech xtoc ti vinic nupul ts'acale, ma'uc yu'un stuc ti sbec'tale, ja' yu'un ti yajnile. 5Ja' yu'un un, sc'an ti mu smacbe sba yo'ntonic ta jujun tale. Yan mi co'ol ta scomonopic ti mu xchi'in sbaic ta sventa ta xc'opoj xti'inique, jechuc c'u sjaliluc. Ts'acal to ac'o xchi'in sbaic yo' mu tsalatic yu'un ti pucuje. 6Ti va'i s'elan ta xcalboxuque, ma'uc ta jpasoxuc ta mantal, ja' no'ox mi jech ta xac'anique. 7Ti vu'une jc'anuc ca'i jechuc a'elanic jech c'u cha'al ti vu'une. Ja'uc le'e, ti Diose yalel toyol ti c'u s'elan laj yac'otic talel ta jujun tale. 8Ti vu'un ta xcale, ti tojol tseb queremetique xchi'uc ti me'unal antsetique, lec ti mu xnupi sts'aquiic jech c'u cha'al ti vu'une. 9Mi mu xu' yu'unic ti jech stuquic xva'vune, ac'o nupij ts'aquijuc, altic ti xmacmun ti yo'ntonique. 10Ja'uc ti buch'u nupul ts'acalic xae, xi ta xcalbe ya'i mantal ti ma'uc jmantale, ja' smantal ti Cajvaltique: Ti ants ti nupul ts'acal xae, mu me xicta ti snup xchi'ile. 11Mi oy bu c'ot ta pasel un ti laj yicta smalal ti antse, jech va'vunuc o, mi mo'oje, ac'o slajesbe sba yo'ntonic. Ja' no'ox jech xtoc ti vinic ti nupul ts'acale, mu me sbaj sutel ti yajnile. 12Ti yane xi ta xcalboxuc ava'iique ti vu'un xa jmantal jtuque, ti ma'uc smantal ti Cajvaltique: Mi oy jun jch'unolajel vinic ti ma'uc jch'unolajel ti yajnile, ti mu'yuc c'usi sna'ic ta x'ech' yu'unic c'ac'al ti jech yic'oj sbaique, ma'uc me sbaj sutel yajnil ti vinique. 13Mi oy jun jch'unolajel ants ti ma'uc jch'unolajel ti smalale, ti mu'yuc c'usi sna'ic ta x'ech' yu'unic c'ac'al ti jech yic'oj sbaique, ma'uc me sten sjip comel smalal ti antse. 14Ti jun vinic nupul ts'acal ti ma'uc jch'unolajele, ventainbil c'ot yu'un Dios ta sventa ti yic'oj jun jch'unolajel antse. Jech xtoc ti jun ants ti nupul ts'acal ti ma'uc jch'unolajele, ventainbil c'ot yu'un Dios ta sventa ti yic'oj jun jch'unolajel vinique. Ti manchucuc jech s'elan taje, ma'uc xnich'nab jch'unolajeletic ti xnich'nabique, ja'uc le' une, c'otemic ta steclumal ti Diose. 15Ja'uc le' une, mi ta ono'ox sc'an ta xbajvan ti buch'u ma'uc jch'unolajele, ac'o me xch'ac sbaic. Ti buch'u bajbile, xocol ta xc'ot, mi ja' ti vinique, mi ja' ti antse, yu'un ti jech laj yic'otic ti Diose, yo' oyuc slamajemal avo'ntonic ta xacuxiic. 16¿Mi oy c'usi xavut xana', ants, mi xu' ta xcol avu'un ti amalale? ¿Mi oy c'usi xavut xana', vinic, mi xu' ta xcol avu'un ti avajnile? 17Ti c'u ono'ox a'elanic ti c'alal la'ataeic ta iq'uel yu'un ti Diose, xchi'uc ti c'u s'elan abijil laj yac'boxuc ti Diose, jechuc comanic o. Ja' jech mantal ta xcalbe scotol ti jch'unolajeletic ti oyic ta jujun tsobobbaile. 18Mi yich'oj circuncisión c'alal tae ta iq'uel yu'un ti Diose, comuc o xa jech. Mi mu'yuc yich'oj circuncisión c'alal tae ta iq'uel yu'un ti Diose, jechuc o xa. 19Yu'un ma'uc tsots sc'oplal mi yich'ojic, mi mu'yuc yich'ojic ti circuncisione, ja' tsots sc'oplal ti c'otuc ta pasel c'u s'elan ta sc'an ti Diose. 20Ti c'u s'elan la'ataeic ta iq'uel yu'un ti Dios ta jujun tale, jechuc xa o. 21Mi chonbilot ta mosovil c'alal laj staot ta iq'uel ti Cajvaltique, mu xavul avo'nton yu'un. Mi oy sc'oplal ti laj xa ata ti lacol loq'uel ta mosovile, mu xatoy aba, tsaco ich'o ta muc'. 22Ti buch'u tiq'uil ta mosovil c'alal itae ta iq'uel yu'un ti Cajvaltique, avi tana le'e, ma'uc xa mosovil, colem xa, ochem xa ta yajtunel ti Cajvaltique. Ja' jech xtoc ti buch'u mu'yuc tiq'uil ta mosovil c'alal itae ta iq'uel yu'un ti Cajvaltique, avi tana le'e, mosovil xa, yu'un ochem ta yajmosov ti Cajvaltique. 23Yu'un toyol atojolic laj smanoxuc ti Diose, mu xavac' ave ati'ic ta xrioxinel ti jnaclejetic ta banomile. 24Ja' yu'un un, jchi'iltac, jechuc staojuc yav avo'ntonic ta jujun tal ti c'u s'elan la'ataeic ta iq'uel yu'un ti Cajvaltique. 25Ti buch'u mu'yuc to nupunemique, mu'yuc yan mantal ti laj yac'bun jna' ti Cajvaltic ti ta xcalbee. Ja'uc ta sventa ti jech xc'uxubinojun ti Cajvaltique, xu' xach'un ti c'u s'elan ta jbijubtasoxuque. 26Ta scoj ti liquem xa ti vocole, ta xcal ti vu'une, jechuc oyuc ti c'u s'elan oy ti viniquetique. 27Mi nupul ts'acalot xae, mu xajip xaten comel ti avajnile. Mi mu'yuc to nupul ts'acalote, mu to xasa'ic. 28Mi ta xanupij xats'aquij ava'ie, ma'uc mulil. Mi ta xnupij sts'aquij ti tojol tsebetique, ma'uc mulil. Ja'uc ti buch'u ta xnupij sts'aquije, ta x'ayan liquel svocol ti jech li' cuxule. Jc'anuc ca'i ti mu xataic ti avocolique. 29Jchi'iltac, xi s'elan ta jc'an ta xcalboxuc ava'iique: Mu xa jaluc batel ti c'ac'ale. Ja' yu'un un, ti buch'utic nupul ts'acalique, co'oluc s'elan ya'iic ti mu'yuc nupule. 30Ti buch'u oyic ta me'inale, co'oluc s'elan ya'iic ti mu'yucuc oy ta vul o'ntone. Ti buch'u xmuyubajique, co'oluc s'elan ya'iic ti mu'yucuc ti muyubajele. Ti buch'u yacalic ta manolajele, co'oluc s'elan ya'iic ti mu'yucuc laj smane. 31Ti buch'u staojic scotol yo' lec oyic li' ta sba banomile, co'oluc s'elan ya'iic ti mu'yucuc c'usi staojique. Yu'un scotol ti c'usi oy li' ta banomile yantic x'ech' batel sc'oplal. 32Jech ta jbijubtasoxuc, yu'un ta jc'an ti mu oyucoxuc ta vul o'ntone. Yu'un ti buch'u mu'yuc nupul ts'acale, ja' yac'oj sjol yo'nton ta spasel ti c'usi ta sc'an ti Cajvaltique yo' ta sta ti lec x'ilee. 33Ja'uc ti buch'u nupul ts'acale sujoj sba ta sa'el ti c'usitic ta xtun yu'unic li' ta banomile yo' jech lec oy xchi'uc ti yajnile. 34Slecoj slecoj ti c'u s'elan oyic ta jujun tale. Ti ants malijem xae mu xco'olaj xchi'uc ti buch'u mu'yuc malijeme. Yu'un ti buch'u mu'yuc malijeme ja' no'ox ta spas ti c'usi ta sc'an ti Cajvaltique yo' jech sjunul yo'nton yac'oj sba ta tunel yu'un ti Diose. Ja'uc ti buch'u malijem xae ta suj sba ta sa'el ti c'usi ta xtun yu'unic li' ta sba banomile yo' jech lec oy xchi'uc ti smalale. 35Ti va'i s'elan laj calboxuc taje, ma'uc ta jmac avo'ntonic, ja' alequilalic, ja' no'ox ta jc'an junuc avo'ntonic, ti mu'yuc macaloxuc ta xavac' abaic ta tunel yu'un ti Cajvaltique. 36Mi oy buch'u ta snop ti ja' lec ta xic' ti smacbil tseb ti yu'un ja' xa yorail xnupun ta xa'ie, ac'o spas ti c'usi lec ta xa'ie, ma'uc mulil, ac'o nupinuc. 37Ja' jech xtoc mi oy buch'u snop ti ja' lec mu xnupine, ti jech ta xa'i ta yo'nton ti mu tsotsuc sc'oplal ta xic' ti smacbil tsebe, ti xu' yu'un stuc ta xa'ie, ti mu'yuc buch'u sujat yu'une, toj lec ti jech ta spase. 38Va'i un cha'e, ti buch'u ta xic' ti smacbil tsebe, lec ti jech ta spase. Ja' jech xtoc ti buch'u mu tsotsuc sc'oplal ta xa'i ta xiq'ue, x'ech' to yutsil ti jech ta spase. 39Ti jun ants nupijem ts'aquijem xae, tsots sc'oplal yic'oj sbaic xchi'uc ti smalal ti c'u sjalil cuxule. Mi cham ti snup xchi'ile, mu'yuc xa pech'el chucul yu'un ti mantale. Xu' xmalij ta yan mi jech ta sc'ane, yavil mi ja' jun jch'unolajele. 40Ta jnop ti vu'une, ja' mu'yuc xa c'usi sna' mi mu'yuc xa ta xcha'malije. Ja' jech laj cac' ta na'el yu'un jch'ulelinojbe xch'ulel ti Diose.


Copyright
Learn More

will be added

X\