1 Corintios 16

1Sc'oplal ti ta xatsob ataq'uinic yo' ta xacoltaic ti yan jch'unolajeletique, jech xapasic jech c'u cha'al laj calbe ya'iic ti jch'unolajeletic ti oyic ta jujun tsobobbail ta Galacia banomile. 2Ti jujunoxuque, ta sliqueb c'ac'al yu'un ti jujun xemunae, ch'aquic loq'uel ti c'u yepal laj apasic canale, ja' ti c'u yepal ta xloc' ta avo'ntonic yo' jech ta xacoltavanic. Jech tsobol xa avu'unic c'alal ta xic'ote. 3C'alal ta xivul ta atojolique, ta jtac batel ta Jerusalén viniquetic ti vo'oxuc ta xat'ujique. Ta xcac'beic batel scartaic xchi'uc scoltaelic ti jch'unolajeletic ti laj atsobique. 4Mi ta xca'i ti xu' ta xibat eque, ta xchi'inicun batel. 5C'alal ta xital ta atojolique, mu tuc'uc ta xic'ot, yu'un ba'yel ta xibat ta Macedonia banomil. Ts'acal to ta xic'ot ta ateclumalic Corinto. 6Xu' van ta xijalij ta atojolic. Xu' van tey ta x'ech' cu'un ti yorail sique. Mi lijalij teye, xu' nan ta xacoltaicun ta sventa stojol ti jbe ti bu xu' ta xibat ta ts'acal toe. 7Yu'un mu jc'an ti naca no'ox ta x'ech' jq'ueloxuque. Ta jc'an ta xijalij ta atojolic mi jech ta sc'an ti Cajvaltique. 8Li' to ta xicom ta jteclum Efesoe. Ja' to ta xiloc' batel c'alal mi ech' ti q'uin Pentecostese. 9Yu'un lec to jamal jbe ta xi'abtej yu'un ti Cajvaltique, ti xloc' venta ta j'ech'ele, ja'uc le'e, yepal no'ox xtoc ti contrainele. 10Mi ta xc'ot ta atojolic ti Timoteoe, junuc me yo'nton avu'unic, yu'un ta x'abtej yu'un ti Cajvaltique jech c'u cha'al ti vu'une. 11Jech un cha'e, mu me oy buch'u junuc sjip sten avu'unic ti Timoteoe. Ti leque, coltaic yu'un ti stojol sbe yo' jech jun yo'nton ta xtal sq'uelun, yu'un li' ta jmalacutic xchi'uc ti yan jch'unolajeletique. 12Ja'uc ti Apolose, ti co'ol jchi'il jbatic xchi'uque, laj xa jc'anbe ep vocol ti ac'o xtal sq'ueloxuque xchi'uc ti yan jchi'iltique. Ti li'e, mu'yuc to c'usi xut xtal. Ja' to ta xtal sq'ueloxuc mi oy bu xocobe. 13J'ech'eluc viq'uiluc asatic. Staojuc yav junuc avo'ntonic ch'unic o ti Cajvaltique. Pasic me tsatsal. Mu xatsiq'ues avo'ntonic. 14Scotol ti c'usi ta xapasique, pasic ta syail xc'uxul avo'ntonic. 15Ti jech jchi'il jbatique, xana'ic ti Estéfanase xchi'uc ti c'u yepal oy ta snae, ja'ic ti ba'yel c'ot ta yo'ntonic ta xch'unel ti lequil ach' c'op ti oy ta Acayae. Avi tana une, yac'oj sbaic ta tunel yu'un ti jch'unolajeletique. 16Ti jech jch'unolajeletic taje, ti jech ta x'abtejique, ti jech ta xcoltavanique, ta jc'an ti ac'o ach'unbeic ti c'usi ta xalboxuque. 17Ximuyubaj ti li' tal ta jtojol ti Estéfanase, ti Fortunatoe, ti Acaicoe, yu'un ti stuquique ja' ta xiscoltaicun ti c'usi mu xu' avu'unic ta xacoltaicun ti jech nom oyoxuque. 18Yu'un ti stuquique ja' laj stsatsubtasbun co'nton, ti ja' jech laj spasic ta atojolic xtoque. Ti buch'u jech jch'unolajel taje, mu xach'ay ta avo'ntonic. 19Chabanuc xayalboxuc ti jch'unolajeletic oyic ta jujun tsobobbail li' ta Asia banomile. Ja' jech xtoc ti Aquilae, ti Priscilae, xchi'uc ti c'u yepalic jch'unolajeletic ta stsob sbaic ta snae, chabanucoxuc xayalbeic ta sventa ti Cajvaltique. 20Scotol ti jch'unolajeletic li' oyic ta jtojole, chabanuc xayalboxuc. Ja' jech xtoc, chabanuc xavalbe abaic ta jujun tal. Tsacbo abaic ac'obic. 21Vu'unun Pablo, ta jc'ob ta jletra jtuc ti jech ta xcalboxuc chabanucoxuque. 22Mi oy buch'u mu'yuc c'ux ta xa'i ti Cajvaltic Jesucristoe, ac'o batuc ta ch'ayel. La' no'ox xch'a, Cajval. 23Ac'o sva'an stec'an sba ta atojolic ti Cajvaltic Jesucristoe. 24Ta sventa ti Cajvaltic Jesucristoe, ta jtac talel ta atojolic ti syail xc'uxul co'ntone. Jechuc.


Copyright
Learn More

will be added

X\