1 Corintios 14

1Ja' yu'un un cha'e, ac'beic yipal ti oyuc syail xc'uxul avo'ntonique. C'anic ach'ul-bijilic ta stojol ti Diose, ti ja'uc ta sventa ta xavalic ti c'usi ta xa'ac'bat ana'ic yu'un ti Diose. 2Ti buch'u ta xc'opoj ta yan c'opetique, ja' ta sc'opon ti Diose, yu'un ma'uc ta sc'opon ti jnaclejetic ta banomile, yu'un mu'yuc buch'u junucal xa'ibe ti smelole. Yu'un ti c'usi ta xal ta yan c'ope, mu a'yibaj smelol ta sventa ti oy c'usi ta x'ac'bat sna' yu'un ti Ch'ul Espíritue. 3Ja'uc ti buch'u ta xal ti oy c'usi ta xcaj'ac'bat sna' yu'un ti Diose, jech ta xc'opoj yo' ta sjambe sat ti yane, ta stsatsubtasbe yo'ntonic, ta spatbe yo'ntonic. 4Ja'uc ti buch'u ta xc'opoj ta yan c'opetique, ja' no'ox ta xac'be sba yip yo'nton stuc. Ti buch'u ta scaj'al ti oy c'usi ta x'ac'bat sna' yu'un ti Diose, ta xac'be yip yo'nton ti jch'unolajeletique. 5Jc'anuc ca'i ti acotolicuc xu'uc avu'unic ta xac'opojic ta yan c'opetique. Ja' xloc' venta ta xca'i ti xu'uc avu'unic ta scaj'alel ti oy c'usi ta xa'ac'bat ana'ic yu'un ti Diose, xloc' venta ma' taje, ja' mu sta sc'oplal ti c'opojel ta yan c'opetique. Ja' no'ox xloc' venta mi oy buch'u ta xalbe smelol ti c'usi ta xich' alel ta yan c'opetic yo' ta stsac yip yo'ntonic ti jch'unolajeletique. 6Ti jech jchi'il jbatique, mi naca xa ta yan c'opetic ta xic'opoj c'alal ta xtal jvu'lanoxuque, ¿c'usi bal o, c'usi xtun o avu'unic c'alal mu xava'ibeic ti smelole? Ja'uc le'e, mi ta xcalboxuc ava'iic ta ac'op atuquic ti c'usi li'ac'bat jna' yu'un ti Diose, mi ta xcalboxuc ava'iic ti oy c'usi ta xc'ot ta pasel yu'un ti Diose, mi ta xcalboxuc ava'iic ti c'u s'elan ta sc'an ti Dios ti ta jpastique, ta melel unbi, bal, xloc' venta, xtun avu'unic. 7Caltic no'ox ava'iic jech li'e, jech c'u cha'al ti músicaetique, ti amae, ti arpae, ti mi mu'yuc xbejlajan snuc' c'u s'elan ta xich' tijele, ti ta xich' oq'uisanele, mu xvinaj c'usi q'uejojal ta sliques. 8Jech xtoc yoq'ues ti soldadoetique, mi mu'yuc smelol ta xich' oq'uisanel ti oq'uese, mu sna'ic c'u s'elan ta xchapan sbaic ta ac'-leto. 9Ja' jech ti vo'oxuque, mi ta xac'opojic ta yan c'opetic ti mu stac' a'yiel ti smelole, mu'yuc buch'u xu' ta xa'i ti c'usi ta xavalique, jeche' no'ox ti oy c'usi ta xavalique. 10Ta melel ava'uquic, oy ep ta tos c'opetic li' ta sba banomile, scotol oy smelol. 11Mi oy buch'u ta xisc'opon ta yan c'op ti mu xca'ie, co'ol s'elan jyanlumun ta stojol ti buch'u ta xisc'oponune. Ja' jech ti stuque, co'ol s'elan jyanlum ta jtojol ec. 12Jech o xal un, mi juteb ta avo'ntonic ti jbijiltic ti ta xac'botic ti Ch'ul Espíritu ta jujun tale, ja' c'ano abijilic ta yac'bel yip yo'nton ti jch'unolajeletique yo' jech ta xch'iic. 13Ja' yu'un un, ti buch'u ta xc'opoj ta yan c'ope, c'anbeic Dios ti oyuc buch'u ta sva'an sba ta svinajesbel smelol ti c'usi ta xal ta yan c'ope. 14Mi oy bu ta xic'opoj xiti'in ta yan c'opetique, melel un, ti jch'ulel canimae ta xc'opoj xti'in. ¡C'u stu un! mi ja'uc xca'ibe smelol ti c'usi ta xcale. 15Va'i un cha'e, ¿c'usi sc'an ta jpas? Sc'an jchi'ucuc jch'ulel c'alal ta xic'opoj xiti'ine yo' jech ta xca'ibe smelol. Sc'an jchi'ucuc jch'ulel c'alal ta xiq'uejine yo' ta xca'ibe smelol. 16Mi ja' no'ox ta xalequil-c'opon Dios ta yan c'op xchi'uc ti ach'ulel avanimae, ti buch'u ta xa'ie mu xu' ta xchi'inot ta yalbel vocol ti Diose, yu'un mu xa'ibe smelol ti c'usi ta xavale. 17Ac'o mi jun xa yutsil ta xavalbe vocol ti Dios ta yan c'ope, ¡c'u stu un! mu'yuc c'usi ta xich' tael yu'un. 18Col no'ox yalbun ti Diose ti xu' cu'un xic'opoj ta yan c'opetique, ja' mu sta ti vo'oxuque. 19C'alal oyun ta tsobobbail xchi'uc ti jch'unolajeletique, altic ta xcal lajunmil ta bel yan c'op ti mu a'yibaj ti smelole. Ja' lec ta xca'i mi vo'bel no'ox c'op ti stac' a'yibel ti smelole yo' jech ta staic chanubtasel ti yane. 20Ti jech co'ol jchi'il jbatique, mu me snopbenuc olol ti c'usi ta xanopique. Mu'yucuc c'usi chopol oy ta avo'ntonic jech c'u cha'al ti ololetique, vulemuc lec ach'ulelic ta snopel. 21Yu'un ti ts'ibabil ta ch'ul c'ope xi ta xale: “Ti muc' ta lum li'e, ta jc'opon ta yan c'opetic ta sventa ti jyanlumetique. Mi ja'uc ta xich'icun ta muc'”, xi ti Cajvaltic Diose. 22Ti jc'opojel ta yan c'opetique, ta xtun yo' ta svinajesbe stsatsal ti Diose ta sventa ti jch'unolajeletique, ma'uc ta xtun ta sventa ti ma'uc jch'unolajele. Ta scaj'alel ti c'usitic ta xc'ot ta pasel ti liquem talel ta stojol ti Diose, le'e, e'ch' ta xtun yo' ta svinajesbe stsatsal Dios ta stojol ti ma'uc jch'unolajele, ja' mu sta ta xtun ta sventa ti jch'unolajeletique. 23Ja' yu'un un, mi acotolic ta xac'opojic ta yan c'opetic c'alal tsoboloxuque, mi ta x'och batel jun uni j'a'yiej-c'op ti mu'yuc c'usi c'otem ta yo'nton ta xch'unele, ta snop ti lic achuvajilique. 24Ja'uc le'e, mi acotolic ta xavalic ti oy c'usi la'ac'bat ana'ic yu'un ti Diose, c'alal ta x'och batel ti ma'uc jch'unolajele, ta xa'i ti c'usi ta xavalique. Jech ti stuc une ta xlic ya'i sba ti oy smule. 25Ti c'usi mu xvinaj mucul oy ta yo'ntone, ta svinajesbat yu'un ti c'usi ta xavalique. Ta xlic squejan sba ta yich'el ta muc' ti Diose. Ta xlic yal ti j'ech'el li' xchi'inojoxuc ti Diose. 26Ti co'ol jchi'il jbatique, ta xcal ava'iic ti xi s'elan sc'an xapasic jech c'u cha'al li'e: Lec mi oy jlom avu'unic ta xq'uejinic, ta xchanubtasvan, ta xal ti c'usi ta x'ac'bat sna' yu'un ti Diose, ti oy c'usi ta xal ta yan c'opetique, ta svinajesbel smelol ti c'usi laj yich' alel c'alal tsoboloxuque, ti ja'uc ta sventa yo' ta xch'i ti jch'unolajeletique. 27Mi oy buch'u ta xc'opoj ta yan c'ope, xu' ta sva'an sbaic ta yalel cha'vo', mi oxvo', ti ta jujun tal ta x'ech'ique, xchi'uc xtoc ti oy buch'u ta sjelubtas ta yalel ti c'usi laj yalic ta yan c'ope. 28Mi mu'yuc buch'u xu' ta svinajesbe smelol ti c'usi ta xal ta yan c'ope, ja' lec mu xc'opoj ta yan c'op c'alal tsoboloxuque, ac'o lo'ilajuc xchi'uc ti Dios ta yo'nton stuque. 29Ja' jech xtoc mi oy buch'u ta xalic ti oy c'usi ac'bat sna'ic yu'un ti Diose, ac'o c'opojicuc cha'vo', mi oxvo'. Ja' jech xtoc ti buch'u ta xa'i ti laj yale, ac'o snopilan lec c'usi laj yich' alel. 30Mi oy c'usi ac'bat sna' yu'un Dios ti buch'u tey chotole, jech ti buch'u yacal ta xc'opoje, ac'o to spajtsan sba. 31Acotolic xu' xavalic ti c'usi ta xa'ac'bat ana'ic yu'un ti Diose. Ta jujun tal ac'o ech' yalic yo' jech acotolic ta xachanic, ta xatsatsubtasbe aba avo'ntonic. 32Jech ti buch'u oy c'usi ta x'ac'bat sna' yu'un ti Diose, ac'o mi yo'ntonuc xa ya'i c'opojuc, ac'o smala ora. 33Ti Diose ja' ta sc'an ti xlaet cuxetuc ti banomile, ti oyuc smelol c'usi ta xich' pasele, ma'uc sc'an ti voch voch c'ope. Jech xapasic jech c'u cha'al ta spasic ti jch'unolajeletic ti buyuc no'ox ta stsob sbaique. 34Ti antsetique ts'ijlicuc c'alal oyic ta tsobobbaile, mu xtuch'ic ta be c'op. Yu'un ja' yabtelic nijil chimil ta stojol snup xchi'ilic jech c'u cha'al ta xal smantal ti Diose. 35Mi oy c'usi ta sc'an ta sjac' ya'iique, ac'o sjac'beic ti snup xchi'ilic c'alal oy xa ta snaique. Mi ta xtuch' ta be c'op jun ants c'alal oy ta tsobobbaile, mu lecuc ta q'uelel. 36Vuleso ta ajolic ma'uc li' lic ta atojolic ti sc'op Diose. Ma'uc no'ox vo'oxuc laj ach'unic ti sc'op Diose. 37Mi oy buch'u xch'unoj ti ja' ac'bil sbijil xu' yu'un ta yalel ti c'usi ta x'ac'bat sna' yu'un ti Diose, mi xch'unoj ti tojobtasbil yu'un ti Ch'ul Espíritu yaloje, ac'o ya'i lec ti ja' smantal Cajvaltic ti jech ta jts'ibaboxuc talel ti jvun li'e. 38Mi mu xac' ta venta ti c'usi laj jts'ibaboxuc talele, mu xavaq'uic ta venta ec. 39Jech o xal un, ti co'ol jchi'il jbatique, ayanuc ta avo'ntonic ta yalel ti c'usi ta xa'ac'bat ana'ic yu'un ti Diose, c'opojanic ta yan c'opetic, mu xamacbe aba avo'ntonic. 40Ja'uc le'e, scotol oyuc smelol stuq'uil ti c'usi ta xapasique.


Copyright
Learn More

will be added

X\