1 Corintios 1

1Vu'un Pablo, ti jech laj sc'an ti Diose, laj yic'un yo' ta xicom ta yajtacbolal ti Jesucristoe. Jmoj xchi'uc ti jchi'il Sóstenese 2ta jts'ibaboxuc talel ta atojolic jlic vun ti vo'oxuc jch'unolajeloxuc yu'un ti Diose, ti nacaloxuc ta jteclum Corintoe. Ta sventa ti Cristo Jesuse, lac'otic ta steclumal, lac'otic ta yu'untac Dios xchi'uc ti yan buch'utic xvocoletic ta sc'anbeic vocol ti Cajvaltic Jesucristo cu'untique, ti ja' Ajvalil yu'unic ec jech c'u cha'al ti vo'otique. 3Ac'o sva'an sba ta yac'beloxuc slequilal slamajemal ti Jtotic Diose xchi'uc ti Cajvaltic Jesucristoe. 4Colaval, Dios, xichi no'ox ta aventaic ti laj ataic ti c'uxubinel yu'un Dios ta sventa ti Cristo Jesuse. 5Ta sventa ti Jesucristoe, ti Diose laj yac'boxuc ep ta tos xch'ul-c'ulejal, xana'ic yalbel sc'oplal, xava'ibeic smelol. 6Ti c'u s'elan sc'oplal ti Cristoe, vinajem ta melel ti c'ot ta avo'ntonique. 7Ti jech taj une, laj xa ataic scotol ti c'usi oy sc'oplal ta xac' ti Diose. C'ajomal xa no'ox ta xamalaic ti sc'ac'alil c'usi ora ta xvul ta loq'uel ti Cajvaltic Jesucristoe. 8Ti Diose ta xac'boxuc yip avo'ntonic ti c'u sjalil li' oyoxuque yo' mu'yuc c'usi quechel macaloxuc ta xvul staoxuc ti Cajvaltic Jesucristo ti c'alal ta xcha'sut talele. 9Ti c'u s'elan yaloj ti Dios ta spase, ta xc'ot ta pasel yu'un, yu'un ja' ta sventa stuc laj xa yic'oxuc talel yo' pas ta jun acuxlejalic xchi'uc ti Xnich'one, ja' ti Cajvaltic Jesucristo cu'untique. 10Ti jech jchi'il jbatique, ta jc'anboxuc vocol ta sventa ti Cajvaltic Jesucristoe ti jmojuc avo'ntonique, ti mu yanucuc ti snopobil avu'unique. Co'oluc avo'ntonic cuxianic. Jechuc snopbenal avu'unic jech c'u cha'al ti yane. 11Ti jech ta xcalboxuc ava'iic taje, Jchi'iltac, yu'un ti buch'u oyic ta sna ti Cloee laj yalbun ca'i ti it'ix ta xava'i abaique. 12Yu'un laj ca'i ti xi ta xavalique: “Ti vu'une sventainojun ti Pabloe.” Ti yan xtoque xi ta xale: “Ti vu'une sventainojun ti Apolose.” Ti jlom xtoque xi ta xale: “Sventainojun ti Pedroe.” Ti jvoc' xtoque xi ta xale: “Ja' sventainojun ti Cristoe.” 13Ti jech taje, ¿mi yu'un oy jayvo' xch'acoj sba ti Cristo avalojique? ¿Mi yu'un ja' laj yich' jipanel ta curus ti Pablo ta sventa ti acolelique? ¿Mi yu'un ja' ta sventa Pablo laj avich'ic ti vo'e? 14Coliyalbun ti Diose ti mu'yuc buch'u junucal avu'unic ti laj cac'be yich' ti vo'e, yu'un ja' no'ox laj cac'be yich'ic vo' ti Crispoe, ti Gayoe. 15Ti Jech taj une, mu'yuc buch'u xu' ta xal junuc ti laj yich'ic vo' ta jventae. 16Oy yan ti laj cac'be yich'ic ti vo'e, ja' laj cac'be yich'ic vo' ti c'u yepal oy ta sna ti Estefanase. Mu jna' un mi oy to buch'u yan laj cac'be yich' vo'. 17Yu'un ma'uc cabtel laj yac'bun Cristo ta yaq'uel ich' vo'. Ja' no'ox cabtel laj yac'bun ta yalel ti lequil ach' c'op yu'une. Ma'uc ma' ti jun xa yutsil ti que jti' ta jpas jba ti c'alal laj jchanubtasoxuque yo' mu xch'ay yip ti cham ta curus ti Cristoe. 18Ti sc'oplal cham ta curus ti Cristoe, lo'il no'ox ta xa'iic ti buch'utic ch'ayel ta xbatique. Ja'uc ti vo'otic ti jch'unojtic ta xijcole, ja' smuc'ul stsatsal ti Diose. 19Yu'un xi ta xal ti ts'ibabil ta ch'ul c'ope: “Ta jch'aybe sbijilic ti buch'utic oy sbijilique. Ta jch'aybe snopbenal yu'unic ti buch'utic oy c'usi lec sna'ique.” 20¿Bu oy ti buch'u oy sbijile? ¿Bu oy ti buch'u sna' xchanubtasvane? ¿Bu oy ti buch'u ac'bat sna' ta sjol ta slo'iltael ti naca no'ox sc'oplal sba banomile? Naca jeche' lo'il c'op c'otem yu'un Dios scotol ti bijilil ta sba banomile. 21Ta sventa ti Diose, c'ot ta nopel yu'un ti mu cha'bel xtae ta ojtiquinel ta sventa sbijil no'ox stuquic ti jnaclejetic ta banomile. Ta sventa sc'op stuc, laj stic' sba ta scoltael ti buch'utic ta spat yo'ntonic ta stojole ac'o mi lo'il c'op no'ox ta xa'iic ti yane. 22Ti israeletique c'ajomal no'ox ta sq'uelic ya'iic ti oy c'usi ch'ayal ta xc'ot o'ntonal yu'une. Ti jyanlumetique yac'ojbeic yipal ta sa'el ti sbijilique. 23Ja'uc ti vu'uncutique ja' ta xcalcutic batel sc'oplal ti Cristo jipil ta curus chame. Ti israeletique q'uexlal sba ta xa'iic ti jech ta x'albatique. Ti jyanlumetique jeche' lo'il c'op no'ox ta xa'iic ti jech ta x'albatique. 24Ja'uc ti buch'u ic'bilic yu'un ti Diose, ac'o mi israeletic, mi jyanlumetic, ta xa'ibeic sc'oplal ti ja' ta sventa smuc'ul stsatsal Dios tal chamuc ti Cristoe. 25Ti bu co'ol s'elan jeche' lo'il c'op yilel laj spas ti Diose, x'ech' to xjelav sbijil ta j'ech'el, ja' mu sta sbijil ti jnaclejetic ti oy ta banomile. Ti bu co'ol s'elan yilel ti mu'yuc smuc'ul stsatsal ti Diose, x'ech' to xjelav ti smuc'ul stsatsale, ja' mu'yuc c'usi xu' yu'un ti jnaclejetic ti oy ta banomile. 26Jchi'iltac, na'ic lec ti c'alal laj staoxuc ta iq'uel ti Diose, jun chiboxuc no'ox oy avuni bijilic ta xalic ti jnaclejetic ta banomile. Jun chiboxuc no'ox ti avich'oj tsots avabtelique, ti jech ich'biloxuc ta muq'ue. 27Yo' jech q'uexlal ta xc'otic ti buch'utic oy sbijilique, t'ujeic yu'un Dios ti buch'utic ch'abal sbijilic ta x'albatic yu'un ti jnaclejetic ta banomile. Yo' jech q'uexlal ta xc'otic ti buch'utic tsots xa'i sbaique, t'ujeic yu'un Dios ti buch'utic ta x'albat ti mu'yuc c'usi xu' yu'unique. 28Ti buch'utic bajbilic li' ta banomile, ja' t'ujbilic yu'un ti Diose yo' ac'o vinajuc ti mu'yuc stu ti buch'u jtunel ta xalique. 29Ti jech taj une, mu'yuc buch'u xu' ta stoy sba ta stojol ti Diose. 30Yu'un ti Diose laj spasoxuc ta jun xchi'uc ti Cristo Jesuse, ti c'ot ta pasel yu'un ti ja' jbijiltic ti Cristoe. Ta sventa ti Cristoe, laj jtatic ti lec xij'ilee, lijc'ot ta yu'un, laj jtatic pojel colel. 31Taj une, co'ol jech c'u cha'al ti xi ta xal ti ch'ul c'ope: “Mi oy buch'u ta sta ya'i ti mu'yuc xa buch'u xtaune, ta sventauc Cajvaltic, ac'o spas ti jech mu'yuc xa buch'u jech xtaun ta xa'ie.”


Copyright
Learn More

will be added

X\